قصة سواد قلب الحلقة الثانية للكاتبة مروة الصافي
مسكت امي السلسل والخاتم وهي بدل تقول لي الكلام دا حرام وغلط منك شالتهم طوالي وقال لي في الحفظ والصون وابتسمت. عبدالرحمن اخد ليه نومة وقام استحم وغير وشال الشنطة الكبيرة ومعاها الصغيرة وطلع وانا وامي هنا النار ماكلانا قلت لي امي يمكن موريها الحاجات الجايبها ليها قالت لي مااظن يركزو شوية كدا امي قالت لي كدي اضربي لي اخوك شوفيه وين نظام مستنينو بالاكل
شلت التلفون ضربت مارد علي المهم اخد ليه ساعتين كدا وجا داخل وخشمو مافتحو مع زول دخل الغرفة طوالي سريع سريع جريت اتدسيت ورا الباب اشوفو بعمل في شنو لقيتو بفتش في الدولاب بعد شوية فتح الشنطة حقتو فتشها برضو انا جريت كلمت امي
قالت لي الله يستر مايكون بفتش في السلسل والخاتم بنتكلم كدا جا داخل وشايل علبة في يدو قال لينا انا الليلة فقدت حاجة مهمة شديد بس يارب اكون نسيتها في قطر وماتكون اتسرقت
الحاجات الفي العلبة ديل حقاتك ي امي جبتهم ليك
وجبت ليك سلسل وخاتم ي حنان بس فقدتهم ماعارف وين
انا وامي اتخلعنا وبقيت اعاين ليها وهي تعاين لي انا مافضل لي الا ابكي قال لينا مالكم سكتنا مسافة قلت ليه ماف حاجة مامشكلة لو قسمتي بلقاهم اها امي فتحت العلبة لقتو جايب ليها غويشات مبااااالغة هو طلع كدا امي قالت لي بركة الماشلتي العلبة دي
قلت ليها اها نعمل شنو ياامي قالت لي بعد دا لو ظهرن حيشك فيك لانو كلمك انهم حقاتك خلي يعيش على أنهم راحو ولمن يرجع يجيب غيرهم وانتي ديل امشي غيريهم بي حاجة تانية (امي طبعا معلمة كبيرة)
تم الأسبوع وجا يوم العرس وكان عرس خيالي وانا بالجد ماكان عاجبني الحال ليه يعمل ليها كل الحاجات دي أجر ليها احسن صالة ولبست عند أفضل خبيرة تجميل والفنان بالشي الفلاني.
مشيت معاه الكوفير جبنا العروس ومشينا اتصورنا الكان سايق العربية طبعا سامي اخوها انا كنت قاعدة قدام لاحظت الزول دا مركز معاي وانا طوالي عملت فيها تقيلة وما اديتو ريق حلو. حاول يتظارف معاي بس برد ليه قدر كلامو
وصلنا الصالة وكانت احلى زفة وهم ماشاء الله كانو كريمين جدا عشاء بوفيه مفتوح ماناقصو شي نص الحفلة كدا حسيت بي جوعة شلت صحن ومشيت اشيل اكل لقيت سامي واقف سلمت ومن الخجل شلت عينات من الاكل مع اني كنت جيعانة شديد قلت لو فات تاني برجع اشيل لي اكل بعد شوية أتلفت لقيتو ماف قلت احسن رجعت مليت صحني وجيت ضربت تماااااام ومشيت رقصت رقيص لاحظت برضو سامي دا بعاين لي ياربي الزول دا مالو. المهم عملنا الجرتق ورجعنا البيت والعرسان كانو حاجزين مسافرين تايلاند قعدو شهر حتى جو راجعين بعد جو عملنا ليهم كرامة وعزمنا أهلها جو كلهم اتغدو ومشو بعد مشو فاطمة نادتني مشيت ليها قالت لي عايزة أسألك انتي مرتبطة عاينت ليها بي استغراب قلت ليها لا بس ليه السؤال دا قالت لي سامي اخوي قال من يوم شافك عجبتيه ولو ما مرتبطة حيتقدم ليك طبعا الخبر كان صعب شديد علي لانو اول مرة في حياتي زول يقول عايزني لكن قلت يابت اتقلي حبة قلت ليها بس انا مابعرفو كويس ولا حصل اتعاملت معاه قالت لي هو مانوع الناس البتكلمو كتير أو بطلعو كتير ونحن زاتنا ماصدقنا انو قال عجبتو وحدة دي اول مرة انا هنا فرحت شديد قلت ليها طيب خليه يتصل علي اول اشوف فهمو شنو وبعد كدا نشوف البحصل قالت لي طيب
رجعت غرفتي شوية كدا والتلفون ضرب رقم غريب رديت وانا اصلا متأكدة انو سامي قال لي الو كيفك انا سامي (طبعا انسان مختصر شديد ومابتكلم كتير) قلت ليه مرحب بيك قال لي فاطمة ورتك طلبي وحسب ردك انا اتصلت قلت ليه ايوا اها اتكلمت معاه وعرفت هو عايز يعمل شنو قال لي عايز اعمل خطوبة ٣ شهور كدا لاني عندي مأمورية بعد أرجع يكون العرس انا طبعا مافضل لي الا ازغرت قلت ليه خير بشاور امي ويديك خبر
جريت جري لي امي كلمتها عايزة تزغرت مسكت ليها خشمها قلت ليها انا قلت ليه اشاور امي انتي عايزة تزغرتي عشان يقولو الناس ديل ماصدقو. نادينا عبدالرحمن طبعا رحب بيه شديد وقال لي اكتر حاجة عاجباني في الزول دا دغري وكلامو محدود قلت ليه يعني أوافق قال لي طوالي مابتلقي زيو في سري قلت ليه (هو غيرو انا لقيت خلي زيو)
اتصلت عليه ورديت ليه بالموافقة حسيت بيه فرح قال لي تمام زي ما اتفقت معاك وانا زي ماشايفة مابحب الكلام الكتير قلت ليه احسن حاجة؛
انا زاتي عايزة زول يكون عملي مابتاع كلام قال لي بعدين ماتشتكي وتزعلي قلت ليه ابدا ماف حاجة (انا ماكنت متخيلة انو الزول دا حتى السؤال مايسال مني ولا يراسلني ماكنت مفتكرة عدم الكلام دا للدرجة دي)
حددنا الخطوبة قبل سفرو بي يوم صراحة الزول دا ماقصر معاي في حاجة مشتري لي لبسات وكريمات وجايب لي ست دهب رهيب و داني لبست في أحسن كوفير خطوبة كأنها عرس وانا طبعا كنت بغيظ في صحباتي وبنات اهلي عاد وحدة حصل ليها كدا ماف قلت ليهم صبرت ونلت ما استعجلت زيكم واشيل واخت صور الحاجات في الحالة حقتي بس بيني وبينكم ماكنت مبسوطة لانو ما اداني اي اهتمام لمن مسافر مارضى لي امشي المطار ومن مشى اخد اسبوع كامل لابتصل لابرسل برسل ليه بقرأ ومابرد}