قصة سواد قلب الحلقة الثالثه للكاتبة مروة الصافي
تم اسبوع كامل وهو خالص مابرسل لي وانا بالجد زعلت شديد لاني برسل ليه كمان مابرد المهم فجأة جاني اتصال من رقم خارجي رديت الو انا سامي قلت ليه اهلا وكانت من غير نفس طبعا قال لي انتي كويسة قلت ليه الحمدلله قال لي تمام يلا مع السلامة وقفل بسم الله الرحمن الرحيم الزول دا جادي يعني رجعت اتصلت مارد لي رسلت ليه رسالة طويلة عريضة ردحت فيها ردح شديد قلت ليه وقت انت مافاضي لي للدرجة دي وماعندك لي اي زمن ماكان تربطني بيك ماتقنعني انك مالاقي خمسة دقايق تتكلم معاي فيها واتصالك الاسه دا زي المجبور عليه وكلام كتير اخدت عشرة دقايق كدا لقيتو مرسل لي دا طبعي ومن الأول كلمتك مابحب الكلام الكتير حكاية اتكلم معاك اليوم كلو دا ماعندي انا زول مابحب استهلك مشاعري بي الكلام وأظن بالفعل وريتك انا متمسك بيك ياريت الكلام دا ما يتكرر
كلامو هداني شوية بس جواي مامبسوطة انا زيي وزي اي بت بحب الاهتمام وهو الحاجة دي خالص ماعندو غايتو بس قلت اصبر عليه بعد العرس بغير طبعو دا. وكنت متوقعة انو بعد رسالتي دي شوية يتغير ويتصل أو يرسل بس طبعا كنت بتخيل المرة دي تم اكتر من اسبوعين لاحس لاخبر اها قام اتصل مارديت اتصال واحد مازادو عليه رسلت ليه رسالة انت فاكر انك تغيب بي راحتك وتتصل بي راحتك كنت مفكرة انو حيعتذر لقيتو مرسل لي يابت الناس انا كل مرة حا اعيد نفس الكلام انتي لو مابتقدري تتحملي نحن لسه على البر عشان مانبقى في مشاكل تانية المهم انا هنا حسيت اني ممكن افقدو اعتذرت ليه وقلت ليه آخر مرة قال لي خير
تاني طبعا كرر نفىس الحاجة وما اتصل وانا حسيت الزمن الاتحدد للعرس خلاص قرب وانا لسه ماعملت شي اتصلت ليه مابرد اتصل تاني فصل الخط رسلت ليه قلت ليه انت فاكر نفسك شنو انا زاتي غلطانة الارتبطت بيك والمرة دي ردو كان صعب جدا و الكلام دا كان السبب في كل الحصل تاني (للمرة التانية والأخيرة انا كنت واااااضح معاك من الأول ويابت الناس لحد هنا نحن حلوين انا اكتر من كدا مابقدر اواصل معاك واي حاجة جبتها ليك عافيها ليك ماعايزها وشكرا) انا في اللحظة دي اتجرحت جرح كبير بكيت بكاء عمري مابكيتو ماكنت متخيلة أنو بالصرامة دي مشيت كلمت امي ومسكتها وقعدن ابكي ومن اللحظة دي بدينا في خطة تفريق عبدالرحمن من مرتو انتقاما لي العملو سامي معاي.
عبدالرحمن أجازتو انتهت وسافر قال لي فاطمة اقعدي فترة مع اهلي وبعد كدا ارجعي اقعدي مع اهلك وطبعا كانت دي فرصة ظابطة عشان نبدأ انتقامنا. وفعلا جات الفرصة دي لمن عرفنا أنها حامل الانتقام كان عامي قلوبنا وكل ألفي بالنا لازم نخليها تجهض فكرنا ووصلنا اننا نكب ليها زيت في عتبة الباب وياريت لو ماعملنا كدا وحدة فينا كانت واعية لانو دا غلط وحرام ماف. بقينا بنراغب فيها من بعيد وفعلا جات من الحمام وهي داخلة اتزلقت ووقعت على ضهرها وحصل الكنا عايزنو بقت تكورك ونحن عملنا فيها مخلوعين في شنو وشلناها وجرينا المستشفى طبعا امي بي ورانا مسحت المكان عشان تخفي اي معالم
وصلنا المستشفى كشفو عليها قالو لينا ربنا يعوضكم الجنين نزل بس هي الحمدلله كويسة انا من جواي فرحت وحسيت اني انتقمت لي نفسي وياريت لو وقفت على كدا يمكن عذابي يخف شوية
فاطمة قالت يودوها بيتهم انا طبعا ماعايزة كدا عايزاها تقعد في بيتنا عشان لازم اعمل بينهم مشاكل وافرقهم المهم وديناها بيتهم امها اتخلعت بس هي زوله طيبة شديد هدأت امها وقالت ليها قضاء وقدر ودي حاجة مكتوبة لي ولسه العمر قدامنا طويل ان شاء الله بتعوض
زولة ايمانها قوي ماشاءالله.
رجعت البيت وقلت لي امي لازم بعد دا نفرقهم من بعض قالت لي عندي خطة كدا بس ماعارفة حتظبط ولا لأ في فكي كدا بتعرفو خالتك سامية نمشي ليه بس قلت ليها ياامي انتي ضامناه قالت لي خلي نمشي ليه نحن خسرانين شنو. أمي ضربت لي خالتي كلمتها خالتي قالت ليها اسه البسو وتعالو بوديكم ليه
فعلا عشرة دقايق بس ونحن لبسنا وطلعنا مشينا لي خالتي وركبنا ركشة مشينا للفكي طبعا اول مادخلنا قال لينا عايزين تفرقو بين فاطمة وراجلها صح انا قلت ليه عرفت كيف قال لي دي حاجات بنعرفها برانا ماتسألي. سكت ساااااي. اها قام طلب مننا سلسل وخاتم دهب قال لي عايز السرقتيهم من دولاب اخوك انا بقيت مخلوعة دا كلام شنو قال لي لو كذبتي مابعمل ليكم حاجتكم العايزنها قلت ليه خلاص تمام وطلب حاجة من أثر فاطمة وطبعا حاجاتها قاعدة في البيت قلت ليه خلاص بكرة من الصباح بجيب ليك الحاجات بس عايزنك تفرقهم بأسرع وقت قال ولا يكون في بالك
مشينا البيت جريت غرفة فاطمة لقيت في جلباب كان ملبوس لقيتو في كيس وجيت غرفتي دسيتو مشيت اتغديت وشربت الشاي ورجعت غرفتي نومة وحدة للصباح
الصباح بدري لبست وشلت الحاجات وطلعت مشيت للفكي لقيتو قاعد مستني طبعا قعد يضحك لمن جيت داخلة وشايلة الحاجات قال لي خلاص أمرك مقضي تب ايام بسيطة وتسمعي البفرحك بس بعد يتفارقو حتجيبي لي ضعف الحاجات دي قلت ليه ابشر المهم بس هم يتطلقو وطبعا الغل كان عاميني نهائي ماكنت عارفة الصاح من الغلط كل الهمني انتقم لي نفسي حتى لو اكون سبب أذى لي اخوي...