قصة سواد قلب الحلقة الخامسة للكاتبة مروة الصافي
فاطمة طلعت كدا نحن مافضل لينا الا نعمل حفلة ابوي طلع بي وراها يتكلم معاها ويرجعها بس هي رفضت كان نفسي اعرف الحصل بينهم شنو خلاها مصرة كدا
أمي قالت لي اتصلي لي اخوك شوفي الحاصل شنو خلينا نتبسط انا ولا كضبت خبر اتصلت لي عبدالرحمن بس ما رد امي قالت لي خليه شوية بعد يهدأ برجع ليك فعلا اخدنا زي ساعة كدا اتصل رديت عليه حسيت بيه متضايق قلت ليه خير مالكم الحاصل شنو
قال لي انا زاتي نفسي افهم الحاصل انا كنت يجهز لي فاطمة اسوقها فجأة من غير ما اعرف الحاصل علي شنو قلت ليها خلي الجية شوية وماعارف انا قلت كدا ليه لاسه مستغرب
فاطمة قالت لي ظروفك مابتسمح قلت ليها ابدا بالعكس بتسمح واكتر بس ماعايزك تجي الفترة دي المهم النقاش احتد بينا شوية كدا وشاكلتها ومن غير ما احس قلت ليها انا غلطان اني اتزوجتك وهي طوالي قالت لي خير اسه تصلح غلطتك دي وتطلقني وماقاعدة ليك ولا دقيقة والله
انا لحد اسه ماعارف قلت ليها كدا ليه وليه الحال وصل بينا للدرجة دي مع انو بالجد نحن كنا سمن على عسل ومن قبيل اشيل التلفون عشان اعتذر ليها بتحصل لي حاجة تخليني ما اتصل ماعارف في شنو انا ابتسمت ابتسامة عريضة مافضل لي الا ازغرت
قلت ليه خلاص ماتاخد في بالك بنمشى عليها ونحاول نفهمها قال لينا ياريت وانا هنا بتصل عليها وبشوف لو ردت بتكام معاها وبعتذر ليها
قفلت كدا وقعدت انطط في السرير قلت لي امي الفكي حقكم دا كاااارب ووريتها كل الاتقال
اها تاني يوم مشينا للفكي فرحانين اننا خلاص حنتخلص من العارض دي اول ما دخلنا قعد يضحك وقال لي تم المراد قلت ليه تم شغل تمام
قال لي خلاص حسب اتفاقنا قلت ليه طيب
المهم اديتو الحاجات قبل مانمرق
قال لي في حاجة اسمها تثبيت العمل ودا برضو عايز قروش
قلت ليه بجيك بكرة قال لي كويس.
مرقنا مشينا بيت ناس فاطمة قلنا ساي من باب الواجب نغشاها نتكلم معاها. وصلنا البيت دقينا الباب ماف زول فتح لينا بعد شوية سمعنا كواريك جاء سامي جاري فتح الباب ودخل بسرعة ونحن دخلنا وراه لقينا فاطمة في حالة صعبة شديد منكشة شعرها و بتكورك وبتقول انا ماعايزاه طلقوني منو
امها وابوها واخوها كلهم ماقادرين يمسكوها ولا يسكتوها وامها تمسك فيها وتبكي امي نزلت ليها دمعتين كدا وبقت تهدي في امها. فاطمة ابوها واخوها ساقوها دخلوا جوا وقفلو الباب وبقو يرقو ليها ابوها اصلا برقي. أمي بي هنا بتتكلم مع امها وهي المسكينة بتعتذر لي امي من موقف بتها وبتقول ليها ماعارفة فاطمة مالها فجأة كدا
وعبدالرحمن ما الزول البقولو ماعايزنو بالعكس ماحتلقى زيو امي قالت ليها الصبر بس ونحن لازم نتكلم معاهم بي رواقة عشان نقدر نفهم منهم الحاصل ونرجعهم لي بعض قالت ليها اي ان شاء الله امي قالت ليها اها نستأذن نحن وطلعنا
جينا راجعين البيت دخلت كدا الفكي اتصل لي قال لي قلت اذكرك القروش عشان ماتنسي قلت ليها ماناسية وانت العملتو لي دا شي كبير ومقيم
وقفلت منو مشيت أكلت تماااااام ومليت بطني وكأني اول مرة اكل ياخ كنت فرحانة فرح وكانت الدنيا ماسايعاني اخيرا حا انتقم لي نفسي ماكنت شايفة في الدنيا دي غير الإنتقام ماعاينت لي الحالة الوصلت ليها فاطمة ولا عاينت لي اخوي وإنو ممكن بتأذي بي سببنا المهم صبح الصباح ومشيت للفكي واديتو القروش طبعا انا بمشي ابيع حاجة من دهبي عشان اقدر ادفع ليه وخلاص بقى مافضل لي دهب زاتو عشان ابيعو
دا آخر شي مافضل الا أقبل على دهب امي مشيت بعت لي خاتم ووديت القروش للفكي واداني حاجات للتثبيت بس المرة دي حسيت الزول دا نظراتو ماياها وماحبيت اركز معاه طلعت سريع رجعت البيت
لقيت امي بتضحك لآخر ضرس قالت لي اخوك ضرب اسه لابوك قال ليه انا طلقت فاطمة ابوكي دا اول مرة اشوفو ببكي كدا وقال لي عبدالرحمن لو غربل الدنيا دي كلها مابلقى زي فاطمة انا قلت ليه اي صح.
قلت لي امي ياسلام واخيرا نلنا المراد قالت لي الحمد لله بلا وانزاح أثناء مابتكلم كدا تلفوني ضرب لقيت رقم من قطر ما اكذب عليكم حسيت بعدم راحة كدا رديت بي قلق
قلت الو الصوت قال لي انتي اخت عبدالرحمن قلت ليه ايوا( قال لي انا ايمن اخو فاطمة قلت ليه مرحب قال لي عبدالرحمن دا تعب فجأة ونحن اسه في المستشفى قلت ليه تعب كيف يعني وعندو شنو واسه كيف قال لي والله الدكتور قال ذبحة وحاليا في العناية انا اتجمدت في مكاني وكأنو صبت فيني مطرة حا اقول لي امي كيف واقول لي ابوي شنو امي بقت تقول لي في شنو يابت مالك ساكتة ومصدومة كدا اخوك مالو غايتو في النهاية اتشجعت وكلمتها
امي بقت تكورك ابوي جا جاري مخلوع في شنو كلمتو براحة كدا ابوي قعد في السرير وبقى يتشهد ويستغفر قلت ليهم ي جماعة اسه هو محتاج دعواتكم بس ادعوا ليه ربنا يشفيه ويرفعه البتعاملو فيه دا مابنفعو بي شي
فعلا ابوي قام اتوضى وصلى ليه ركعتين وقعد في المصلاية اكتر من ساعة يدعي وامي من زمن ماشفتها بتصلي قامت وصلت كمان ودعت ليه اخدنا ساعة كدا التلفون ضرب نفس الرقم المرة دي الصوت جاني مخنوق شديد من غير ما احس قلت ليه عبدالرحمن مالو بقى يتمتم ماقادر يتكلم قلت ليه في شنو وريني....