قصة سواد قلب الحلقة السادسة للكاتبة مروة الصافي
قلت ليه في شنو وريني قال لي البركة فيكم احسن الله العزاء ربنا يرحم اخونا عبدالرحمن انا رميت التلفون وبقيت اصرخ باعلى صوت ناس البيت كلهم جو جارين في شنو مالك عبدالرحمن عبدالرحمن
امي قالت لي عبدالرحمن مات؟ وووووووووب علي ي ولدي احيييييييا على صغرتك و تكورك وفجاة وقعت من طولها ابوي دا بقى يقوم ويقع وكل زول مصدوم وكل واحد مامصدق خبر كان صدمة كبيرة بالنسبة لينا عبدالرحمن دا كان سند البيت كلو من أكبر زول لي أصغر طفل عبدالرحمن كان الابو بعد ابوي رغم انو هو الثالث بس كان رقم واحد البيت كلو معتمد عليه حتى اخواني فقدنا الضهر والسند فقدنا أعز إنسان ودا كلو كان بي سببي انا وامي الانتقام والانانية كانوا عامين عيوننا من أي حاجة
مافكرنا انو ممكن هو يحزن كدا ويكتم جواه لحد مايموت بقيت في ياريت لو خليتو هو ومرتو عايشين حياة حلوة ومتفاهمين
لكن ياريت مابتنفع ولا بترجع لي اخوي انا بقيت ادخل غرفتو واطلع وادخل غرفتي ماعارفة دا شنو البعمل فيه دا.
المهم البيت اتملى من الأهل والجيران وحتى أهل فاطمة جو وشلنا امي وجرينا بيها المستشفى امي في غيبوبة تااااامة مابتحرك لايد لا رجل دخلوها العناية المكثفة وقالو لينا يقعد زول واحد بس انا قلت لي ابوي واخوني ارجعو انتو الناس قاعدين في البيت انا بقعد معاها
وفعلا رجعو وخلوني. بقيت ماعارفة ابكي اخوي ولا امي البين الموت والحياة ولا ابكي على المصيبة العملناها وكانت سبب في موت اخوي سندي وبقيت ارجع شريط الذكريات ذكريات طفولتنا ولعبنا مع بعض وكيف كان لو عايزة حاجة من نحن أطفال مابرتاح الا اجيبها لي ولحد ماكبرنا وسافر وماقصر معاي في أي شي حتى الدهب جابو لي دا كلو ماقدرتو في يوم من الايام
وكسرت ليه فرحتو وهو لسه عريس ياداب ليه ثلاثة شهور
معقول سواد القلب وصل بي لدرجة احسد اخوي على فرحتو دا كان أسوأ يوم يمر علي في حياتي يوم طويل واتذكرت فاطمة فجأة ياربي الحصل معاها شنو ويارب وعت وعرفت الحاصل ولا لسه في حالتها الصعبة ديك انا
في سبيل ضحكتي اذيت ناس كتار شديد ماكان هاميني شي الا نفسي. المهم جا الدكتور كتب لي حاجات امشي اجيبها مشيت وجيت قلت ليه حالة امي كيف قال لي بس ادعي ليها لو عدت ال٧٢ ساعة الجايات إن شاء الله مابكون في خطر على حياتها هي الغيبوبة دي جاتها قبل كدا قلت ليه ابدا بس الليلة اخوي اتوفى ومن سمعت الخبر وقعت قال لي البركة فيكم ربنا يرحمه امك محتاجة تنسى الصدمة دي عشان تقدر تفوق ربنا يقدرنا ونحن بنعمل العلينا
الدكتور مشى قلت في سري تنسى شنو تنسى انها كانت سبب في وفاة ولدها تنسى انها عشان تشوف فرحتي تكسر فرحة اخوي انا طول عمري ماحاقدر اسامح نفسي اتصل لي ابوي يطمئن على امي وريتو كلام الدكتور قال لي ربنا يشفيها ويعافيها قال لي البيت ملام شديد ومصرين يجو المستشفى قلت ليهم المستشفى صعبة عليكم بخلي حنان تجي البيت تعزوها انا اسه بجي عليك المستشفى وانتي ارجعي ليهم قلت ليه طيب
ابوي جاني وانا رجعت انا من بداية الشارع محل كان بقعد زمان بقيت ابكي بأعلى صوت والنسوان جو جارين علي دي تمسكني وتبكي ودي تسكت فيني ووحدة بتقول لي في كلام انا مامركزة معاهم دخلت غرفة عبدالرحمن وفاطمة اول مرة اشوفها بالترتيب دا اول مرة اشوف قدر شنو كانت ملانة حب والليلة بقت فاضية بقيت الملم في الحاجات وادخل الدواليب لقيت صندوق في الدولاب فتحتو لقيت فيه صور وذكريات طفولتنا سوا بقيت اتكلم وحاسة انو هو برد علي.
قفلت الصندوق ودخلت وانا طالعة انتبهت في شنطة صغيرة كدا الفضول خلاني افتحها لقيت فيها هدايا مكتوبة باسمي من فاطمة وعبدالرحمن ومكتوب كلام حلو وتهنئة بي عيد ميلادي شوفو هم كانو بعملو في شنو وانا بعمل في شنو مسكت الشنطة وبقيت ابكي بأعلى حس لي جا اخوي مسكني وبقى يهدي فيني بعد شوية هو بقى يبكي معاي قلت ليه ارح وديني المستشفى
طلعنا مشينا المستشفى وشلت معاي الشنطة طبعا دي كانت آخر ذكرى من اخوي دخلت عاينت لي امي وطلعت قلت لي ابوي انت ارجع البيت مابتقدر على القعدة صعبة عليك ابوي قال لي كلمة كسرتني زيادة قال لي ماف أصعب من فقد ولدي انا في اللحظة دي انهرت شديد اتمنيت الموت ١بوي قال لي اول حاجة حا امشي لي فاطمة اشوفها أهلها جو عزو ورجعو وهي ماجات تكون مصدومة
ابوي للأسف ماعارف الحالة العايشاها فاطمة.ابوي بعد طلع فتحت الشنطة لقيت تحت فيها سلسل وخاتم وكاتب لي رسالة ديل بدل الاتفقدو وكاتب لي اختي الوحيدة بحبك قدر شنو انا كنت مابشوف ومابفهم وماعندي الا نفسي. الدنيا ضاقت بي شديد مشيت اتوضيت وجيت اصلي وادعي ربنا يغفر لي ويشفي امي ويقومها بالسلامة...