قصة سواد قلب الحلقة السابعة للكاتبة مروة الصافي
صبح الصباح جيت اشوف امي لقيت الدكتور معاها سالتو اها وضعها كيف قال لي ماشة في تحسن وتقريبا عدت مرحلة الخطر بس تاني ننتظر تفوق ونشوف بعد كدا العمل شنو انا فرحت اتصلت على ابوي سألتو مشيت لي فاطمة قال لي مشيت وياريت لو مامشيت البت دي عليها حال مايعلم بيها الا الله
والله لمن بكيت عليها وقالو ليها فترة في الحالة دي انا ماعارف أصابهم شنو هي وولدي في سري قلت ليه ياريت ماف زول يعرف قال لي بجيك اسه ارجعي البيت في ناس عايزنك قلت ليه كويس فعلا جاني ومشيت البيت لقيت أهلنا جو من سفر يعزونا بالجد أصعب إحساس انا لحد اسه ماقادرة أصدق الحصل وانا ماشة كدا سمعت اتنين بتكلمن وحدة قالت للتانية شفتهن بي عيني دخلن للفكي انا هنا خلاص الخوف قطع قلبي ياربي قاصدننا نحن ولابتكلمو عن ناس تانين مشيت سريع قلت ما احسسهم اني سمعتهم يمكن ماقاصدني وكلامهم دا بقى داير لي في راسي الكلام دا لو قاصدننا بيه والكلام دا طلع برا الموضوع دا حتحصل فيه مشاكل كبيرة نحن ماقدرها ورطنا نفسنا
جات مرة اخوي قالت لي أم فاطمة برا بتسأل منك طلعت ليها وخايفة شديد مسكتني وقعدت تبكي وقالت لي عبدالرحمن كان ولدي مانسيبي بس ماعارفة الشي الحصل دا سببو شنو حسيت من كلامها زي العارفة شي ولا انا براي بتخيل لي قلت ليها ربنا يرحم عبدالرحمن ويشفي فاطمة انا بكرة بحاول اجي اشوفها قالت لي فاطمة في حوجة لي وقفة الناس معاها بتي لو وعت من الفيها دا صدمتها حتكون أقوى وخايفة عليها شديد
قلت ليها إن شاء الله كل شي بتسهل وكلنا حنقيف معاها. طلعت وانا رجعت غرفتهم ياخ كل ما ادخل بحس بي خنقة شديدة لاني كنت السبب في فراقهم اتصل علي ابوي قال لي تعالي المستشفى اتخلعت قلت ليه في شنو قال لي ماتخافي الأمور كويسة وامك دي فتحت واسه الدكاترة معاها قالو يقيمو الوضع قلت ليه خير.
طلعت من الغرفة ودخلت غرفتي وغيرت هدومي ومشيت المستشفى فعلا لقيت الدكاترة واقفين جنبها وبتكلمو معاها وسامعاها زي البترد عليهم حسيت بي راحة شوية اها اخدو معاها زي نص ساعة كدا وطلعو جيت سألتهم اها الحاصل شنو والوضع كيف
واحد قال لي الوضع كويس المهم انو امك فاقت من الغيبوبة وبتتكلم وذاكرتها كويسة بس للأسف تاني ماحتقدر تمشي على رجليها لانها أصيبت بي شلل انا هنا من غير ما أشعر صرخت ودموعي نزلت كيف يعني امي ماحتقدر تمشي قلت ليه لو هنا ماف علاج ممكن نسفرها قال لي لو بس حابة تطمني وترضي ضميرك سافري بيها بس لو عايزة تسمعي كلامنا ماف فايدة للسفر وممكن تسافرو بيها تغير جو وتتفسح بس عشان تغير نفسياتها وتحسن معنوياتها وربنا يشفيها ويعافيها وأهم شي ماتنسي انها عدت مرحلة الخطر قلت ليه الحمدلله الحمدلله.
جيت لي ابوي حكيت ليه كل الكلام القال الدكتور ابوي قال لي شوفي يابتي نفسياتها أهم حاجة في العلاج تعدي ايام البكا دي ونسوق امك ونمشي بيها مصر تغير جو ومالو منها نقابل بيها دكتور هناك قلت ليه طيب يا ابوي اسه ارح عليها. دخلنا عليها وأول مادخلت جريت جري مسكتها وقعدت ابكي وهي دموعها ابت تقيف قالت لي يابتي انتو متأكدين عبدالرحمن مات عبدالرحمن السند الليلة وووب علي انا الانكسر ضهري ابوي ماقدر يستحمل طلع طوالي فكيتها وقعدت امسح ليها في دموعها واسكت فيها. قلت ليها ي امي اسه هو محتاج دعواتنا ونحن لازم نتصبر وندعي ليه ربنا يرحمه ويعوض شبابه الجنة ويصبرنا على فراقه امي قالت لي انا السبب انا الكنت عميانة ماكنت فاكرة عمايلي دي حتخليني افقد ولدي قلت ليها ي امي اسه دا ماوقتو المهم صحتك ونرجع بيتنا عشان نجهز ورقنا ونسافر قالت لي نسافر وين ولي شنو قلت ليها في علاجات كدا مابتتلقي هنا بس ماتشيلي هم حاجة بسيطة كدا ومنها نغير جو قالت لي حليييييل الكان بغير لي جو الكان لو شافني متضايقة يعمل المستحيل عشان يفرحني وماكان برضى يشوف زعلي بس اهم شي اكون ضاحكة تاني وين الضحكة شال معاه اي حاجة حلوة
قلت ليها يا أمي نحن كلنا حوالينك واخواني كمان راجين ترجعي تنوري بيتك قالت لي تاني وييييين نلقى النور بعد لمبتو اطفت قلت ليها انتي نورنا كلنا. الدكتور جا داخل تاني وكشف عليها وقال لي حنخليها ٣ ايام كدا تحت الملاحظة وبنكنب ليكم الخروج أن شاءالله. ابوي جا داخل وسلم وقعد شوية اتكلم مع امي ويهدي فيها ويصبرها وهو كمان عايز البصبرو بس حيعمل شنو كان لازم يقوى قلبو في اللحظة دي ضربت لي اخواني عشان يجو لي امي لأنها سألت منهم.
أول ماجو ودخلو أمي مسكتهم وبكت معاهم بكا وهم كمان كانهم مابكو قبل كدا اخدو قعدتهم شوية وقالو لي لازم نرجع عشان جايبين الجثمان بعد شوية انا في اللحظة دي انهرت شديد وماحسيت بي نفسي. طلعو وساقو ابوي معاهم وخلوني مع امي ماف طريقة ارجع وهي هنا براها. جابو الجثمان وصلو عليه ودفنو هنا بقيت ادعي ليه ربنا يثبتو وينور قبرو وانا هنا البثبتني شنو.
اتصلت لي ابوي قلت ليه تعال اقعد مع امي شوية انا ماشة اشوف فاطمة لاني مالاقيتها لحد اسه قال لي اي والله احسن ي بتي خلاص اسه بجيك وفعلا ما اخد كتير جا علي وانا طلعت في الطريق بتخيل ياربي فاطمة حتكون بقت كيف وهل وعت وعرفت الحصل لي اخوي ولا لسه في حالتها وانا زاتي حا اقابلها بي أي وش وانا كنت السبب في الحصل دا انا بالجد اتختيت في امتحان أكبر مني وانا الختيت نفسي فيه بي سبب حقدي وجهلي وعماي...