قصة سواد قلب الحلقة الرابعة للكاتبة مروة الصافي
الفكي اداني موية ارشها في بيتها وكمان حاجات قال لي ادفنيها في المقابر وانا المقابر دي كنت بخاف منها شديد لو جيت بي جنبها بس برجف لكن سبحان الله عشان الاذية ماكنت شايفة حاجة وفعلا مشيت رشيت من الموية في بيتهم الفاصلنو من بيتنا
ومشيت ليها في بيت أهلها نظام جاية اطمئن عليها ونزلت لي دمعة دمعتين تماسيح طبعا و رشيت باقي الموية الاداني ليها الفكي. ومن هناك اتصلت لي امي قلت ليها تعالى لي المقابر الجنبنا قالت لي في شنو قلت ليها في حاجات الفكي اداني ليها ادفنها في المقابر دقايق بس وامي جاتني وانا وهي خايفين نمشي خطوة ونرجع واخيرا اتشجعنا ودخلنا حفرنا سريع سريع ودفنا العمل وبعدها رجعنا.
رجعنا وكأنو ماف شي عملنا الفطور وفطرنا وشربنا الشاي وبعده بي شوية القهوة قلبنا ميت شديد كان بنشرب في القهوة كدا عبدالرحمن اتصل قال لي ليه أمس ماكلمتيني انو فاطمة اجهضت مع اني كنت بتكلم معاك تقريبا نفس الوقت الكنتو في المستشفى
ارتبكت شوية قلت ليه اااا انا كنت خايفة عليك وقلت ما اقلق وبعدين نحن كنا متوترين قال لي متوترين شنو المفروض انا اعرف في لحظتها بالله ماتتصرفي تصرف غبي زي دا تاني.
المهم ماعلينا هي حتقعد اسبوع اسبوعين كدا في بيت اهلها وحتجي تقعد معاكم فترة قلت ليه في عيوننا وهو ماعارف انو جايبها لي فراقهم.
قلت لي امي عشان مانحسسهم بي شي ارح نمشي ليهم نقيل معاهم ونشيل ليها حاجات قالت لي ايوا صاح
كلمنا ابوي انو نحن ماشين لي فاطمة نقيل معاها ابوي قال لينا احسن ماعملتو ادانا قروش قال لينا شيلو ليها فواكه شلنا القروش وطلعنا مشينا السوبر ماركت جبنا ليها فواكه وفراخ وكم حاجة كدا ومشينا ليهم اول ماجينا داخلين حسيت فاطمة متغيرة شوية في شكلها زي العيانة كدا وبس راقدة مابتتحرك اول ماشافتنا ابتسمت شوية ورحبت بينا (وهي ماعارفة نحن شنو ولا العملناه شنو طيبة وعلى نياتها) مسكت امي وقعدت تبكي معاها وامي طبعا نزلت ليها كم دمعة كدا من حقات الاستهبال وبقت تقول ليها يابتي انتي لسه صغيرة والعمر قدامكم إن شاء الله ماتزعلي وربنا يعوضكم قالت لي امي امين يارب المهم قعدنا معاهم لي المساء كدا وطلعنا وطبعا كعادتهم أكرموما كرم مبالغ فيه ونحن طبعا مابنستاهلو.
عدى زي اسبوعين كدا والحال لسه ماف شي جديد أو عشان هي بعيدة ماعارفين الحاصل شنو وكنا منتظرين جيتها لمن تكون قريبة مننا بنعرف الحاصل. الباب دق مشيت فتحت لقيتها فاطمة سلمت علينا ودخلت ومشت غرفتها طوالي انا مشيت وراها براحة براحة سمعتها بتتكلم في التلفون قالت اها جيت بيتكم كدا ارتحت انا لسه مابقيت كويسة وانت مصر اجي كدا مرتاح و طوالي قفلت
انا جريت جري لي امي كلمتها قلت ليها شكلها دي بداية المشاكل امي قالت لي خالتك شكرت الفكي دا شديد
بعد شوية امي مشت تتصنت عليها وجات قالبة وشها قلت ليها خير مالك قالت لي ماسمعتي اخر ونسة وضحك وحب وسمعتها بتقول ليه عندي بت خالتي شغالة في وكالة بسألها من التفاصيل لحد التذكرة لقطر بي كم انا اتخلعت قلت ليها سايقها كمان
قالت لي شكلو قلت ليها من دربي دا وماشة لي الفكي الكذاب دا ماف اي شي اتعمل. لبست وطالعة لاقاني ابوي قال لي ماشة وين ارتبكت ااااااا ماشة لي صحبتي قال لي صحبتك منو كمان من الله خلقني ماسمعت ليك صحبة قلت ليه من الجامعة بمشي عشرة دقايق واجي قال لي اسه المغرب جا ماف طلعة امشي بكرة الصباح
رجعت غرفتي والنار منطلقة فيني بقعد كدا للصباح كيف غايتو عديت الليل كلو سهر الله يجيب الصباح صبحت الواطة طوالي جري مشيت الفكي اول مادخلت ماسلمت قلت ليه ياحرامي ياكذاب
قال لي ماتغلطي عشان ما انقلب عليك في شنو حكيت ليه الحاصل قال لي دي البدايات لازم تثبتي العمل قلت ليه كيف قال لي بديك حاجات تاني تعمليها وكمان تجيبي لي حاجات تانية قلت ليه طيب
رجعت البيت شلت الحاجات القال عايزها ومشيت واداني حاجات اعملها في البيت مشيت البيت وطبقت الحاجات كلها الصباح جا فاطمة جات شربت الشاي وقالت طالعة مستعجلة قلت ليها على وين
قالت لي بي كل حسن نية ماشة الوكالة لي بت خالتي اديها الجواز حقي عشان عبدالرحمن عايز يرسل لي قلت ليها كويس بمشي معاك قالت لي طيب
مشيت جهزت وجيت ماشة معاها ركبنا العربية طبعا هي السايقة مشينا اول ماوصلنا الأمور كلها انعكست لقينا بت خالتها ماف سالما منها قالو المدير طردها انا هنا ابتسمت ابتسامة عريضة من غير ما احس بي نفسي
قالو لينا محتاجين شنو وريناهم انو فاطمة دي مسافرة لي زوجها شالو مننا صورة جوازها وطلعنا مشينا فطرنا وشربنا العصير ورجعنا البيت جيت كلمت امي وهي بي هناك تكلم في عبدالرحمن بعد شوية نسمعها جايطة جرينا نشوف الحاصل شنو لقيناها بتقول ليه انا ماعايزاك انا عايزة ارجع بيت اهلي وبس
انا وامي فرحنا ومشينا غرفتي زي الماعارفين الحاصل بعد شوية نشوف ليك الزولة شايلة ليها شنطة وطالعة مشينا نظام بنسأل فيها مالك إن شاء الله خير
قالت لينا وين الخير انا بس عايزة ورقتي وماعايزة من ولدكم اي شي قلنا ليها مالو عمل شنو طلعت طوالي حتى من تتكلم...