رواية عريس الغفلة كامله بقلم سلمي عصام
الام: نفسي أفهم إنتي رافضة ليه العرسان؟ اللي قدك اتجوزوا، وبطلي أكل وكلميني عدل
منه : يعني حتى الأكل بتعارضيني فيه يا ماما وياستي جواز دلوقتي مش هتجوز، أنا لسه قدامي أحلام وحاجات كتير عايزة أعملها.
الام :طيب والحاجات دي متعملهاش ليه وإنتي متجوزة؟
منه : افرضي اتجوزته وبعد الجواز رفض الشغل ورفض الأحلام دي.
الام :مش ممكن يوافق ويساعدك ويكون سندك؟
منه :أنا بقى مش عايزة الكلام ده، أنا عايزة أحقق أحلامي بمفردي يا ميمو.
الام :يابنتي بلاش تتعبي قلبي بقى، وقومي يا زفتة جهزي نفسك علشان نشوف عريس النهارده.
الام : برضو يا ماما أنا مش عايزة، قوليله إني مخطوبة وهو مش هييجي.
الام : لا والله أقوله إنك مخطوبة؟ واتخطبتي إمتى؟ والولد كان لسه سائل أبوكي لو مخطوبة أو في حد في حياتها، أبوكي قال لا لحق دخل حد في حياتك إنتي دلوقتي؟
منه : عايزة إيه يا أم منه؟
الام : تقومي تلبسي زي الناس الشاطرة الكويسة اللي بتسمع الكلام ونشوف العريس. مش ممكن ترتاحي؟
منه : ماشي، مع إني متأكدة إني مش هرتاح ليه أبداً وقلبي هيفضل مقبوض كده من الجواز.
الام :يابنتي قومي وإلا أقومك بالشبشب.
منه :خلاص يا حجة قايمة أهو. جواز إيه بس اللي بتتكلموا عنه؟ زي ما جه زي ما هيمشي.
الام :يابنتي بطلي تبرطمة وبصي قدامك بدل ما تتخبطي في حيطة ودماغك تتفتح، ولا هنطول عريس ولا عتريس.
---------------------------------------------
بتكلم أصحابها فيديو كول:
منه :مين دي بس اللي تتجوز وتعيش لتربية العيال وطبخ وزواج وبس ياض وبس يابت؟ أنا مش كده خالص، مستحيل.
ميرفت :يابنتي جربي، مش ممكن العريس يبقى كويس وخوفك ده كله يبقى ولا حاجة.
منه :يابنتي ولا هجرب ولا هتنيل، أنا لبست أهو بس وعد مني يا بنات هخليه يطفش في نفس الثانية وهتسمعوا خبر حلو. هقفل بقى وإلا ماما والبت ولاء أختي هيشدوني من طرحتي، سلام.
---------------------------
العريس (نور): يا عمي أنا عايزها هي بس، عايزها بشنطة هدومها وأنا هتكفل بالباقي، معنديش أي مشكلة.
بتكون واقفة هي سامعة كلامه بس مش بتشوف وشه.
منه: أوعي يا بت يا ولاء، ده بيقول عايزها بشنطة هدومها، يعني حتى اللحظة بتاعت اختيار الجهاز بيحرمني منها، أومال عايزه يعمل إيه بعد الجواز؟ هو أنا فقيرة ولا فقيرة علشان ياخدني بشنطة هدومي؟
الأم: يابنتي اتهدي بقى، رفعتي ضغطي.
منه: يا ماما خليكي إنتي بس على جنب، إنتي مش شايفة كلامه؟
ولاء: أوعي يا بت يا زفتة يا ولاء،
ولاء: يابنتي ده تعبير مجازي يعني هو عايزك حتى لو بشنطة هدومك، يعني عايزك إنتي وبس، يعني هو عايزك وشاريكي.
منه: روحي اتجوزيه إنتي يا ختي، ابعدي بقى
ولاء: يا ماما. بنتك اتجننت، إنتي عايزة علي يسمعك ده يطلقني فيها. قال أتجوزه قال.
منه :طيب خلاص يا جماعة ابعدوا عني، أنا هديت خلاص.
الأم: أنا خايفة أسيبك تجري
ولاء : أنا شاكة فيكي يا بت.
منه: يا جماعة عيب عليكم بقى، سيبوني بس ومستحيل أعمل أي حاجة.
ولاء متأكدة؟
منه: أكيد.
بيسيبوها ومش بيكملوا كلام، بيلاقوها خرجت من المطبخ جري وبيجروا وراها. بتدخل الأوضة اللي بيكون موجود فيها العريس وبييجوا وراها أختها وأمها.
الأم: روحنا فيها يا ماما.
بيلف لها أبوها.
الأب باستغراب: في إيه؟ مالك داخلة كده ليه؟
منه: هو فين العريس اللي عايزني بشنطة هدومي ده؟
بيشاور أخو العريس على العريس وهو مصدوم، وميقلش صدمة العريس عن أخوه.
أول ما بتشوفه منه بتتفاجئ بكتلة من الجمال قدامها، بترجع كام خطوة لورا وبتهمس لأختها:
منه: بت يا ولاء هو ده العريس؟
أختها بتهز رأسها بصدمة: آه.
منه: احم احم احم، أدخل أجيب شنطة الهدوم، أنا مجهزاها.
بيكونوا الكل مصدوم من فعلتها، فبتضحك وبتقول:
منه: ده تعبير مجازي معناه إني موافقة.
بعدها بترجع خطوة لورا: بت يا ولاء، ادخلي هاتي الصينية علشان أقدم العصير للعريس.
منه: مالكم يا جماعة؟ محدش بيتكلم ليه؟ طيب هدخل أنا أجيب الصينية وتعالي ورايا يا ولاء.
ولاء ولاااااااء.
بتفوق ولاء من صدمتها: ها؟
منه: بقولك تعالي معايا. و...
بيقطع كلامها لما بتشوف مامتها مش بتبربش بعيونها.
منه: هي مالها ماما عاملة زي الصنم ليه؟
ولاء: هيكون من إيه؟ من عمايلك يا مصيبة.
منه: سيبك إنتي من كل ده، شايفة عريس قمر إزاي؟ ده شكله واقع، مش شايل عيونه من عليا.
ولاء: من الصدمة يعيني، ربنا يعينه عليكي والله.
بتدخل هي وولاء وبتجيب العصير وبتحطه قدامهم.
أبوها بتوتر: كنا بنقول إيه يا جماعة؟
العريس: إن أنا عايزها بشنطة هدومها.
منه: أقوم أجيبها؟
العريس: لا، هقوم أنا أمشي.
بتقوم منه : هتمشي فين؟ هو دخول الحمام زي خروجه ولا إيه؟ مش بتحبني وعايزني؟ يبقى انسى تخرج من هنا واسمي مش جنب اسمك.
بتضحك مامتها: احنا ما صدقنا وافقت، البضاعة لا ترد ولا تستبدل.
أبوها: الفرح الشهر الجاي.
العريس: إيه العيلة المجنونة دي؟
أخوه بضحك: اسكت يا عريس، أهي جاية معاك بشنطة هدومها.
بتعدي سنة على الموقف ده وبتكون قاعدة بتكلم أصحابها فيديو كول:
منه: خلاص يا شباب مش وقتها، قولتلكم هتسمعوا خبر حلو وأهو فرحتوا ولبستوا فساتين.
صاحبتها: وإيه اللي غير رأيك يا مصيبة؟
بتتكلم بهيام: جماله جمال رباني، وبعدين ما إنتي هتاخدي أخوه،
مرفت ربنا معاكي والله ده ورث الجنون من منه.
منه: طيب هقفل أنا بقى وأقوم أشوف قرة عيني، يلا سلام.
ملك : شوفوا البت، اللي يشوفها وهي بتقول بيت لا جواز لا مش يشوفها دلوقتي.
منه : يا جماعة الجواز سنة الحياة، مالكم كده؟ سلام يلا.
وبتقفل معاهم.
---------------------------
منه: خد تعال هنا، داخل البيت كده من غير ما تدفع علشان تدخل؟
هو: يابنتي هو أنا عايش في فندق؟ ده بيتي.
منه: كان يا حبيبي بيتك، بس أنا دلوقتي ربة منزل، يعني ده منزلي.
هو: طيب عايزة إيه دلوقتي؟
منه : ادفع
هو : ادفع ايه
منه: الشنطة بتاعت الحلويات.
هو: امسكي أهي، أدخل بقى.
منه: استنى أتأكد إنك جايب كل حاجة.
هو: يا ربي، كان يوم أسود يوم ما جيت أتجوز.
منه : إيهههه ده؟ فين المصاصة؟
هو: نسيت، أجيب بكره هبقى أنزل أجيبلك.
منه: لا، مش داخل يا نور غير بمصاصة، انزل يلا.
هو: نازل وأمري لله.
بينزل وبيطلع بيلاقيها بتجهز السفرة، بتبتسم ليه:
منه: صعبت عليا، قولت أعملك أكل من إيدي النهارده، ويلا ما عن حد حوش.
بيقرب منها: امسكي المصاصات بتاعتك أهي، أنا داخل أغير هدومي.
وبيمشي وبيسيبها.
منه: يعني مقالش حتى كلمة شكراً ولا قال تسلم إيدك؟ ناس تنكر العيش صح.
------------------------------
يبقى قاعد في البلكونة سرحان، بتقرب منه وبتبتسم:
منه: عملت هوت شوكليت وكيكة، تعال ناكل وتصدعني بتفاصيل يومك وأحكيلك تفاصيل يومي.
بيبتسم وبيقولها: يعني غريبة مسألتيش المرة دي كنت بفكر في إيه أو سرحان في إيه؟ مش ممكن أكون بفكر في واحدة كده أو كده؟
بترفع كتفها الاتنين وبتلوي بؤقها بحركة عفوية منها بمعنى مش عارفة ومش عايزة أعرف.
منه: أنا واثقة فيك، وواثقة إنك مش بتفكر في حد، ولو جيت تفكر في يوم هتكون أنا.
بعدها بتغمزله، فبيضحك وبيقولها:
هو: معاكي حق، كنت بفكر فيكي إنتي. مجنونة دخلت حياتي مرة واحدة، بقيت بحب طفولتك، بحب حركاتك وإنتي بتحاولي تبقي مغرورة، بحبك لما تقولي مستحيل أعمل كده وألاقيكي روحتي عملتيها في نفس الثانية. بحبك لما تعملي كل يوم أكل وتقوليلي عملتلك أكل أهو علشان قلبي حنين ومحبتش بعد كل اللي بتعمله علشاني أتعبك. اليوم اللي بدخل فيه البيت وإنتي مش بتقفيلي لحد ما بتاخدي مني شنطة الحلويات بحس إن يومي زي الزفت. وبحب آخر اليوم تعملي حاجة ناكلها وتيجي تقوليلي صدعني بيومك على أساس إنه مش مهم عندك، بس إنتي أكتر واحدة مهتمة لتفاصيل يومي. بحبك.
بتبتسم ليه: وأنا بحبك يا عريس الغفلة
تمت بحمد الله