رواية انهيار انثي الفصل الرابع4 بقلم مروة الصافي
البص اتحرك وهدى حزنت حزن شديد حتغيب شهر كامل عن طارق بس عزاءها الوحيد انها فترة و حترجع
وصلوا اخيرا لوالدة سعاد سلموا واتغدوا وناموا بعد كدا بقو اهلهم كل يوم عزومة في مكان واخر اليوم بتتكلم مع طارق . بس للأسف ام سعاد مرضت شديد و انتهى الشهر وبعد كدا هدى جامعتها حتفتح
هدى:ي امي مفروض بكرة انزل الجامعة اها الحاصل شنو
سعاد: خلاص ي هدى ارجعي بس تمشي تقعدي مع ناس عمك عشان ماتقعدي براك لمن ارجع
هدى: مع اني مابحب اقعد مع زول بس حاضر ي امي حامشي ليهم ...
هدى رجعت ولقت طارق منتظرها في المينا البري مع ريهام وهي كانت فرحانة وهو فرحان كمان
طارق: اها حتعملي شنو ي هدى
هدى: حامشي اقعد عند ناس عمو صلاح لحد ماتجي امي
ريهام :😡 عمك شنو انتي حتقعدي معانا
هدى: ياريت بس مابقدر اخالف رأي امي وممكن مرة مرة امشي معاك بس برجع بيت عمي
ريهام : ان شاء الله
طارق حزين طبعا كان خاتي املو انو هدى تقعد معاهم وتكون قدامو على طول
مشو السوق اول شي هدى اشترت ليها حاجات ومن هناك. وصلوها ناس عمها
طارق: ي هدى خلي بالك من روحك ولو احتجتي اي حاجة اتصلي علي طوالي وتلفوني بالليل بخليه جنبي تمام حبيبتي
ريهام: احم احم نحن هنا
هدى خجلت طبعا قالت ليه: حاضر
هدى دخلت بيت ناس عمها وسلمت عليهم
عمها عندو بت وولدين البت في غرفة قالو ليها تقعد معاها وفعلا دخلت حاجاتها بس الوضع دا كان مامريح لا بت عمها لا امها حست بانها مامرحب بيها بس ماعندها حل وماحتقدر تزعل عمها
مرت الايام وهدى شافت مضايقات شديدة منهم كل يوم في مناقشة مع بت عمها وكان حتى النفس مامريحنها فيه وبت عمها بقت تغير منها عشان شايفة بعامل هدى كيف وكمان بقو خايفين واحد من الاولاد يحبها ولا يقول عايز يتزوجها المهم ضايقوها شديد أرادفي النهاية قررت تشوف ليها داخلية تقعد فيها
كلمت طارق وريهام في الاول اصرو تقعد معاهم بس هي طلبت منهم تكون على راحتها وتمشي داخلية وفعلا مشو سجلو ليها في داخلية ومشو اشترو ليها مرتبة وحاجات ومنها ودوها الداخلية وطارق وصاها في اي لحظة تحتاج ليه تتصل
دخلت الداخلية واختارت الغرفة الحتقعد فيها وكان معاها وحدة بس في الغرفة طبعا اول ما دخلت قابلتها بي ابتسامة كدا
هدى : انا اسمي هدى بقرا هندسة
البت: انا امل
هدى: تشرفنا امولة
تلفون امل رن
وبقت تتكلم مسافة
هدى طارق اتصل عليها كلمتين وقفلت ولسه امل بتتكلم
بعد خلصت قالت لي هدى: شنو دقيقة وقفلتي ي بتي هنا ماف موضوع تتكلمي في التلفون ساعتين تلاتة
هدى: انا ماقاعدة اتكلم كتير والله مابحب البري
امل : بتتعودي هنا ههههههههههه
هدى: هي انا وراي قراية كتيرة مافاضية للحاجات الفارغة دي. يلا تصبحي على خير نعسانة شديد انا
امل: وانتي من اهله.
الصباح هدى لبست وطلعت ماشة على الجامعة فجأة وقفت عربية فخمة ونزل القزاز : ي عسل اتفضلي اوصلك ماشة على وين
هدى: انت اهبل ولا حاجة وبعدين ياخ احترم شيبتك دي انا قدر بتك
الشخص: انتي كدي اركبي وبنتفاهم
هدى:انت حتمشي ولا اشوف لي عسكري افتح فيك بلاغ الشخص :ماشي ي ستي بس كل يوم حتلقيني هنا مستنيك هدى رفضت تركب نهائي ومشت بي رجلينا الجامعة
لاقت ريهام جنب الباب معاها طارق سلمت عليهم وشها كلو ضيق طارق حس بي هدى بس ماحب يسألها قال بسأليها بعدين ودعهم ومشى : بعدين عازمكم غدا
هدى: طيب
طارق مشى
ريهام: هدى مالك ماعاجباني
هدى: وانا طالعة من الداخلية وقف لي واحد بي عربية راجل كبير وسخيف قال الا يوصلني قفلا معاي
ريهام: اصلا الرجال الكبار ديل مامحترمين ماتشتغلي بيه انتي مشيتي وخلاص
هدى: يلا على المحاضرة
بعد المحاضرة دكتور صلاح نادى هدى: هدو ي بتي انتي كويسة
هدى:الحمدلله ي عمو كويسة
د. صلاح :انتي اصريتي نمشي وانا خليتك بي راحتك بس ي يتي كدا ماصاح انا عمك تمشي تقعدي في داخلية
هدى: والله ي عمو كدا احسن لي
د. صلاح :بس لو تكلميني في شنو خلاك تمشي
هدى : ابدا ماف حاجة بس حبيت اكون قريبة للجامعة وسكتت
د. صلاح : خير ي بتي هاك دي شوية مصاريف خليها معاك
هدى: والله عندي ي عمو
د. صلاح: انتي مامعتبراني في مكان ابوك صح
هدى:خلاص طيب بشيلهم
شالت ال قروش وطلعت مشت عندها محاضرة.
انتهت المحاضرات ومشو هي وريهام مع طارق اتغدو سوا ووصلو هدى للداخلية..
المساء هدى لسه موضوع الزول داك مضايقها اتصلت على والدتها وطمنتها عليها واتطمنت على حبوبتها وقفلت
امل: ي هدو مالك شكلك زي المتضايقة
هدى حكت ليها بالراجل بتاع العربية
امل: ياخ باااااالغتي وليه ماركبتي ياخ انتي كان حتتفتح ليك طاقة القدر لبس وطلعات وقروش وموبايلك الشين دا كان حتغيريو عاد لكن ما بسألك
هدى: اركب كيف مع راجل غريب وبعدين انا شبه مخطوبة
امل:شبه مخطوبة كيف مافهمت يعني
هدى حكت ليها عن طارق
امل:هاهاهاها (ضحكت بي اعلي صوت) انتي مفتكرة انو حيعرسك ولا اهلو حيخلوهو يعرسك يابت انتي بتحلمي فوقي احسن ليك الزينا ديل مابعرسوهم الاغنياء وفرضا كلامك صاح وحيعرسك مالو الكلام دا عادي انتي مش واثقة في نفسك يابت اركبي خلي يوصلك وشيلو رقمو تاني مصاريفك طلعن
هدى: مصاريف شنو الحمدلله مستورة
امل: براك قلتي مستورة يعني بالعافية بتمشي يومك لكن لو سمعتي كلامي حتعيشي ملكة ياخ
هدى: مستحيل طبعا وبعدين انا قعدتي ماحتطول امي حتجي قريب وارجع البيت هي يلا نومي خلاص
هدى مانامت بقت تدور كلام ريهام انها ماتشتغل بالفارغ دا وكلام امل والترطيبة الحتكون فيها بقت مشوشة وماعارفة تعمل شنو بقت تقول ريهام عشان ماضاقت طعم الفقر بتقول كدا ماحصل نامت جيعانة بالعكس بتاكل افخم الاكل ولابسة احسن لبس ودهب وكل شهر مغيرة تلفون والله امل معاها حق واهو ادس من ريهام وفي النهاية طارق بحبني والراجل دا اسفو بس ....
هدى صحت وجهزت وطلعت لقت العربية المابتغباها مستنياها الراجل: اها ماقررتي تركبي
هدى: لا
قال ليها والله ما اسالك بس اوصلك محل ماشة
هدى للاسف خضعت للكلام وركبت ودي كانت بداية النهاية نست كل مبادئها الاتربت عليها رمت وراها تقاليد وجرت ورا المادة
الراجل:انا خالد
هدى: هدى
خالد: اكتبي لي رقمك
هدى كتبت الرقم وقالت ليه نزلني بعيد شوية عشان ماعايزة زول يقول حاجة
خالد: اصلا حا انزلك بعيد الشارع الجنب الجامعة زحمة...
نزلت ولقت ريهام براها طارق الليلة ماوصلا
هدى: طارق وين
ريهام: الليلة بابا قال ليه امشي المحل بدري عشان هو مشغول واتصل عليك مارديتي جيت بالمواصلات انا.
اها الليلة تمشي معاي البيت نتغدى هناك وطارق يوصلك
هدى: مابقدر الليلة يوم تاني ان شاء الله
ريهام ماحبت تضغط على هدى قالت ليها اوك مامشكلة بس حست بانو في تغيير في تعامل هدى بس قالت يمكن عشان فراق امها وكمان الليلة عشان طارق ماجا
طارق اتصل ليها اتكلمت معاه شوية وقال ليها بعدين بجيكم وعازمكم غداء
هدى : والله الليلة مابقدر وراي حاجات في الداخلية وقبل شوية رفضت لي ريهام وماعايزاها تزعل وتقول قبلت عشانك
طارق :خلاص طيب نخلي العزومة لي بكرة ان شاء الله