رواية انهيار انثي الفصل الثالث3 بقلم مروة الصافي
هدى: الا اتصل على امي استشيرها
د. صلاح :كلامك صاح
هدى اتصلت على امها وقالت ليها الليلة في ضيف جاي معاي قالت ليها الضيف منو قالت ليها صلاح عمي
سعاد اتخلعت صلااااح ولقيتيه وين وعرفتيه كيف
قالت ليها بعد نجي بتعرفي اي حاجة
سعاد قالت ليها خلاص راجياكم انا
هدى طلعت مع عمها وريهام كانت مستنياها برا هي وطارق استأذنت عمها دقيقة واتكلمت مع ريهام وقالت ليها بعد اصل البيت بوريك الحاصل
وطلعت طارق في اللحظة دي حس بي ضيق بس ماحاول يوضح عشان مايلفت الانظار
*في البيت*
سعاد :صلاح!!!!
صلاح كيفك ي سعاد
سعاد: كويسة الحمدلله انت عرفت هدى كيف ولاقيتها وين
صلاح: ياسعاد انا كنت واقف معاك وكنت مستعد اتحدى اي زول عشان بت اخوي تتربى وسطنا ليه سقتيها ومشيتي على الاقل كان تشاوريني
سعاد: انت ماكنت شايف وعارف العملو معاي امك واخواتك لدرجة جدعو لي هدومي في الشارع تاني اقعد كيف وانتو ماقادرين تفتحو خشمكم ولا واحد يقول ليها غلطانة نعم انت ماكنت قبلان البحصل بس ماكان عندك الجرأة تقول ليها غلطانة
صلاح : عارفة امي اسه اتوفت وقبل تتوفى كانت بتفتش عليك عشان تعفي ليها امي ندمت شديد على العملتو معاك والحصل ليها ما هين الله يسامحها
سعاد: ربنا يسامحها انا ريحت نفسي وسقت بتي وجيت هنا وياها ماشاء الله من المميزين
لحد اسه ماوريتني انت لاقيت هدى وين
صلاح: انا بدرسهم في جامعتهم وقبيل اثناء التعريف لاحظت لاسم هدى واتكلمت معاها وعرفتها
سعاد: اها كويس طيب اعمل حسابك عليها بعد العمر دا كلو لاقيتها
صلاح : جوا عيوني ان شاء الله
كل الحوار دا وهدى كانت بتعاين ليهم ما اتكلمت الا بعد كملو كلامهم
طيب ي عمو انت ليه ماحميتنا انا وامي ونحن ماعندنا راجل في الوقت داك
صلاح: ي بتي دي حاجات مابقدر اقول شي فيها
سعاد: حبوبتك الله يرحمها الحاجة البتقولها حتى لو غلط ولو ظالمة اولادها مابقدروا يردو ليها كلامها وابوك اتوفى بي سبب انو كان كتوم وشايفها بتعمل معانا شنو وماقادر يقول حاجة بقى يكتم جواه لحد ماجاتو زبحة واتوفى
هدى: الله يسامحها
صلاح: انا من اليوم مسئول منكم واسه تلمو حاجاتكم وتجو تقعدو معانا في البيت بيتي كبير
سعاد:لا البيت دا شايلنا ومريحنا عايز تزور بت اخوك طوالي ماف اي مشكلة بس مابنقدر نمشي اي مكان
هدى قالت ليه نفس الكلام
قال ليهم خلاص البريحكم مامشكلة وودعهم وطلع
هدى اتصلت لي ريهام وحكت ليها اي حاجة وقالت ليها ياريت توضحي لي طارق
ريهام: وطارق علاقتو شنو اوضح ليه
هدى ارتبكت: لا بس قصدي عشان قبيل طلعت مع الدكتور مايقول دا بتطلع مع اي زول ويمنعك تاني تتعاملي معاي
ريهام : امممم خلاص كويس.... طبعا طارق فعلا سألني قال لي كيف تطلع مع زول غريب حتى لو كان دكتور في الجامعة
هدى: طبيعي يفكر كدا بس ما تنسي توضحي ليه...
مرت الايام وطارق بقى يتردد على الجامعة كتير واعجب بي هدى كتير وكان متخوف انو يصارحها خصوصا انو عندو اخت وخايف عليها كمان
فكر انو بس يشوف راي ريهام شنو وفعلا اتكلم مع ريهام وحلف ليها انو هو عايز يتزوجها بعد تخلص الجامعة واسه يتقدم لي امها وعمها. وفعلا صارحها ولقى انها بتبادلو نفس الاحساس واتفق معاها انها بعد تخلص السنة يتقدم ليها رسمي
كل يوم حبو ليها زايد وما اتخطى حدودو معاها خالص كان بخاف عليها وبحترمها شديد
طبعا طارق عشان وسيم وغني كل البنات المع ناس هدى وريهام كانو بحاولو يجذبو انتباهو بس هو ماشايف غير هدى
معاهم وحدة كدا اسمها سمر جات لي طارق وقالت ليه: هدى دي عايز بيها شنو شكلك ماعارف عنها حاجة امها بتبيع الكسرة وانت ماشاء الله عليك
طارق: انا عارف اي حاجة عن هدى وانا غير هدى ماف وحدة بتملى عيني. وبعدين انتي الدخلك شنو اصلا
سمر حاولت بي كل الطرق تشوه صورة هدى قدام طارق بس ماقدرت
هدى بقت بتستنى متين الصباح يجي عشان يجو طارق وريهام يوصلوها وطبعا حكت لي والدتها اي حاجة
سعاد: ي بتي طارق دا كويس واي حاجة بس ماتنسي وضعهم شنو اهلو مابقبلو انكم ترتبطو وبعدين عمك عارف ولا لأ
هدى: طارق بعمل عشاني اي حاجة عارفاه وهو مستني سنة بس وحيتقدم رسمي
مرت الايام وجدول امتحان نص السنة نزل والامتحانات بدت وانتهت وخلاص النتيجة قربت
سعاد: بت يا هدى قومي امشي وشوفي النتيجة وطمنيني
هدى: اتطمني ي امي عارفة بتك انتي
ريهام وطارق مرو على هدو ومشو الجامعة وطارق قال ليهم طمنوني
هدى وريهام: ان شاء الله ...
النتيجة طلعت هدى الاولى على الدفعة وريهام جيد ريهام اتصلت على طارق
طارق: اها طمنوني
ريهام : هدى الاولى على الدفعة بي تقدير ممتاز
طارق : ياسلاااااااااام اديني ابارك ليها
ريهام: وانا مابتسال من نتيجتي ليه 😡
طارق: اووووف نسيت اها طمنيني
ريهام : جيد
طارق: ماتخجلي من صحبتك كدي اديني ليها
ريهام: هاك ي هدى
هدى: الو
طارق: الف مبروك حبيبتي شرفتيني والله
هدى: الله يبارك فيك
طارق: خلاص الليلة بالمناسبة دي عازمكم غدا
هدى: الا اشاور امي
طارق : طيب
يلا اتصلي وورينا
هدى: الو امي كيف الليلة طارق عازمنا غدا ممكن امشي
سعاد: بس ماتتأخرو
هدى: طيب
اتصلت على طارق وقالت ليه موافقين
طارق مر عليهم ومشو اتغدو وكان احلى يوم في حياتهم وطارق جاب لي هدى شنطة وساعة هدية بي مناسبة التفوق
هدى: مابقدر اقبلهم والله
طارق: ي هدى انتي حتكوني زوجتي وانا جبتها ليك قدام ريهام اختي عشان ماتفكري في حاجة
ريهام: ي هدى انتي مش امك عارفة انو طارق عايزك رسمي يعني مافيها حاجة لو قبلتي منو هدية
هدى: طيب خير
وصلو هدى للبيت
سعاد: تذغرد الف مبروك يا بتي دايما رافعة راسي
هدى: دا كلو من دعواتك ي حجة بالمناسبة طارق جاب لي ديل هدية في البداية رفضتهم بعد تحنيس حتى شلتهم
سعاد: بس دي اول واخر مرة
هدى: حاضر ي امي
سعاد: يلا انتي اجازتك كم
هدى: شهر
سعاد: خلاص نسافر لي امي في الشهر دا
هدى: حاضر
سعاد: خلاص امشي جهزي شنطتك باكر ان شاء الله نسافر
هدى : طوالي كدا ي امي
سعاد: طولت شديد من امي المرة دي
أثناء الكلام قاطعم صوت الباب
هدى مشحت فتحت الباب لقتو عمها صلاح
هدى : عمو صلاح اتفضل
صلاح :الف الف مبروك ي بتي قبيل فتشتك عشان ابارك ليك لقيتك ماف
هدى:والله شفت النتيجة وطلعت مستعجلة
صلاح: اتفضلي هدية بسيطة بي مناسبة نجاحك
هدى عاينت لي امها (سعاد هزت راسها بالموافقة) شالت الهدية وفتحتها طلعت تلفون وشكرت عمها وقعدت تتونس معاه وسعاد عملت ليهم الشاي شربو واتونسو وودعهم وطلع
بعدها هدى دخلت غرفتها وجهزت شنطتها واتصلت على طارق وورتو انها حتسافر الشهر حق الاجازة دا طارق حزن شديد بس ماباليد حيلة واتكنى ليها اجازة سعيدة وقال ليها خلاص الصباح ان شاء الله بجي اوصلكم الميناء
هدى:بشوف راي امي اول
هدى كلمت امها ووافقت
الصباح جا وهدى وسعاد اتجهزو وطارق جاهم ووداهم الميناء وحجز ليهم المقاعد ومافات الا لمن اتأكد انو البص اتحرك...