قصة سواد قلب الحلقة الاول1للكاتبة مروة الصافي
انا اسمي حنان عمري ٣٥ سنة لسه ما اتزوجت وماف اي زول دق على بابي بنات اهلي كلهم اتزوجو والقدري أولادهم قربو يدخلو الجامعة بطبع أهلنا بعرسو صغار قبل العشرين. انا عايشة مع امي وابوي واخواني ٢ (عندي ٤ اخوان اتنين منهم متزوجين وديل قاعدين معانا في البيت محمد وعبدالله وزوجاتهم قريباتنا) الاتنين التانين برا السودان واحد شغال في قطر (عبدالرحمن) وواحد في ماليزيا بقرأ (ابوبكر) . انا قعدت العمر دا كلو يمكن عشان قلبي الأسود دا ولا عشان بقيت سبب في فراق اخوي ومرتو.انا طبعا ماخليت وحدة من نسوان اخواني الا عملت معاها مشكلة بس (فاطمة ودي غريبة اخت صاحب عبدالرحمن) مرة عبدالرحمن دي العملتو معاها كان أكبر غلط ارتكبتو في حياتي وبي سببو اتعاقبت شديد. للأسف امي كمان وقفت معاي رغم غلطي عمرها مابقول لي انتي غلطانة أو ظالمة ويمكن دا سبب في إني بقيت كدا...
القصة بدت قبل ٥ سنين (يعني كان عمري ٣٠) لمن عبدالرحمن اخوي في يوم اتصل علينا واتكلم مع ابوي وامي وقال ليهم بالبت العايزها امي في الأول رفضت وقالت عايزة ليه بت اختها (طبعا امي مسيطرة على اخواني شديد ماف واحد بقدر يقول ليها حاجة) عبدالرحمن قال ليها لو ما اتزوجت فاطمة دي ماحاتزوج وما حارجع السودان وتنسوني نهائي وقفل على كدا ابوي الله يديه العافية وقف معاه وقال العايزو عبدالرحمن هو البكون وماعايز اي نقاش
رجع لي عبدالرحمن وقال ليه حدد ليهم يوم نمشي ليهم تعارف وربنا يقدم الفيه الخير ماتتخيلي فرحة عبدالرحمن كانت قدر شنو ياريتني لو كان شفت الفرحة بي نظرتو هو يمكن كنت خليتهم في حالهم. المهم حدد ليهم يوم الخميس وطبعا الليلة الأربعاء رسل لي قروش قال لي ماتمشو يدينكم فاضيات قلت ليه كويس مشيت كلمت امي قالت لي مابنشيل اي شي ابوي سمعنا قال لي جيبي القروش دي وماعندكم اي شغلة تاني لو مامشيتي معانا يكون احسن اديتو القروش وسكت
ابوي مشى السوبر ماركت وجاب حلاوة وبارد وقال لي باقي القروش دي بخليها معاي لو قالو موافقين نديها ليهم قولة خير انا طبعا خشمي وعندي
اها الخميس جا واتجهزنا ومشينا ليهم ناس ماشاء الله مرتاحين واستقبلونا احسن استقبال بس للأسف نحن طبعا كان سيء وماكنا بنستحق الحفاوة دي (طبعا الكلام دا انا وامي) فاطمة عندها اخوان اتنين (واحد في قطر مع عبدالرحمن وواحد في السودان دا اسمو سامي ودا العشانو حصلت كل المشاكل دي) واختها وحدة اسمها سهى. أهلها ديل اي حاجة سمحة عملوها لينا لاحظت انو سامي دا كان بعاين لي ودي اول مرة زول يعاين لي كدا
لقينا انو الناس ديل موافقين وبعرفو عبدالرحمن كويس ابوي طوالي اداهم قولة خير وأدى العروس قروش في يدها تشتري بيها ملابس وكريمات الحاجات العايزاها وانا هنا النار منطلقة فيني ابوي قال ليهم عبدالرحمن اجازتو بعد شهر ونص وقال عندو اجازة شهرين لو ماعندكم مانع تجهزو اسه طوالي والعرس يكون أول مايجي امي دي خشمها مافتحتو بس الحال ماعاجبها اها أهل فاطمة قالو خير وحددو العرس بعد جية عبدالرحمن بي اسبوع بس. جينا راجعين اتصلت لي عبدالرحمن قلت ليه عايزين قروش لي تجهيز البيت للعرس وتياب لي امي وفساتين لي هو اصلو مارفض رسل لينا واتجهزنا للعرس والليلة عبدالرحمن جاي.
مشيت المطار استقبلتو كنت متوقعة القى فاطمة هناك قايلها خفيفة بس لا ماجات رجعنا البيت شفتو شايل شنط ادانا شنطة انا وامي فيها حاجاتنا وشنطة لي نسوان اخواني الاتنين وأولاده وفي شنطة قال لينا ماتتفتح وشنطة تانية صغيرة دخلها الدولاب بس انا قلبي اكلني وقلت الا افتحها وفعلا خليتو نام فتحتها لقيت فيها دهب وكتير كمان انا قلبي قال لي ليه الدهب دا كلو شيلي منو وفعلا شلت لي سلسل وخاتم ومسكتهم امي...