الضرب استمر وقت طويل يمكن قريب الساعه اربعه نحن سامعين صوت الضرب امي قالت لي نحن نعمل شنو في اي مكان نحن نسمع الصوت دا بقينا ياخ نحن لو ما متنا في الحرب ح نموت من شدة الخوف قلت ليها يا امي ما تقولي كدا بعيد الشر عليك
زي الساعه اربعه صباحا الضرب وقف حبه رقدنا نمنا بعد إطمنا على الاوضاع هدت لمن الصباح اصبح سمح قمنا طبعا الكهربه قاطعه والجو حار شديد بقيت شايله هم الكوفير لانو اساس الشغل هو الكهربه استمر القطع قرابة اسبوع والكهربه لسه ما جات...
يلا يوم بالعصر خالتو عفاف جاتنا قالت لي يا نسمه تعالي اوريك دا فتحت تلفونا وورتني صوره والصوره دي بالزات كانت لي مؤيد انا بقيت مستغربه علاقة خالتو عفاف بي مؤيد شنو قالت لي دا ولدي هو ما ولدي والداهو من بطني بس مربياهو انا يا نسمه مؤيد ولدي دا من امو إتوفت بقيت ليهو الملجأ الوحيد البلجأ ليهو وسط زحمة الحياة دي لكن يا نسمه انا راجلي كان صعب شويه وما كنت والده غير بنات فكان صعب انو مؤيد يقعد معانا ولمن وصل عمر ١٢ سنه طلع مشى بيت ابوهو وطبعا ابوهو كان متوفي من زمان بقى قاعد فيهو وإشتغل على نفسو قدر ما اوصف ليك هو عانا قدر شنو ما بقدر اوصف ليك ولمن خطب وحده كان إسمها وجن ساكنه كانت جمبك لو بتعرفيها ،،هزيت ليها راسي بمعني اي بعرفا قالت لي يلا دي البت الوحيده الاقتنع يخطبها بس هي ما إنسترت معاهو كل يوم مشكله جديد على المشاكل العندو وهو يا حليلو ما كان برضى زعلا كان بجيب ليها كل حاجه نفسها فيها مرات يطلع من شغلو عشان يراضيها يا نسمه مؤيد دا حنين شديد وفي نفس الوقت كتووم مابقول لي زول حاجه انا الوحيده العارفه معاناتو ما اكزب عليك وجن رغم المشاكل الكانت بينهم كانت ماليه عليهو دنيتو وهسي بعد مشت بقى حيران يا بتي انا نفسي اعرس ليهو بت هديه ورضيه تصونو وتحفظوا في عيونا وبي صراحه يا نسمه انا دايراكِ ليهو انا عارفه انو إنتي بتحبي احمد ولسه ما نسيتيهو بس ادي نفسك فرصه وبعدين الزواج يا بتي سنة الانبياء بعدين احمد مات وتاني م ح يرجع لو عايزه تفيديهو بي حاجه افيديهو بالدعوات والصدقه يا بتي قلت ليها يا خالتو انا مقدر كل الكلام القلتيهو لي بس... قالت لي عشان خاطري يا نسمه اعملوا خطوبه بس شوفوا بعض واعرفوا بعض يمكن تغيري رأيك عشان خاطري انا قدر امك ما تكسريني..قلت ليها ضغطي علي يا خالتو لكن ربنا يسهل قالت لي موافقه يعني،،ما قدرت اكسر بي خاطرا هزيت ليها راسي بس قعدت تزغرد وحضنتني قالت لي إن شاء الله تبقى مرت ولدي والله من شفتك حبيتك...
مشت كلمت امي امي جات قالت لي ربنا يوفقك يا بتي ويجبر بي خاطرك يارب وندى برضو جات باركت لي
مره كم يوم كدا ومؤيد جا إتقدم لي وعملنا خطوبه طبعا خالتو خديجه وبناتا وقفوا معانا وقفه حلوه خلاص رتبوا البيت وقاموا بالضيافه كامله وإستقبلوا اهل مؤيد معانا المهم عملنا خطوبه عاديه من غير جوطه ومرت الايام بقيت اتعود على مؤيد في حياتي يوم رسل لي قال لي عازمك في مطعم قلت ليهو امي ما بتخليني قال لي يابتي كلمتها بس تعالي مشتاق ليك المهم طلعت ورسل لي المكان مشيت ليهو قعدنا نتونس قال لي اخبار الشغل شنو قلت ليهو مع عدم الكهربه دا مافي شغل الكوفير واقف قال لي الطاقه بتشغلوا قلت ليهو فكرت فيها بس الطاقه ما بتشغل المكاوي قال لي البابور بشغلهم صح؟ قلت ليهو اي بشغلوا لكن البابور غالي وبصرف جاز ولا بنزين ما بعرف المهم بصرف كتير قال لي انا عندي واحد في البيت اصلا ما شغال بيهو لانو مركب طاقه ممكن اجيبوا ليك والبنزين خلي علي قلت ليهو لالا ياخ..قال لي اسكتي مالك انا قلت ليك اصلا قاعد ساي قلت ليهو اخبار وجن شنو قال لي الزكرِك ليها شنو قلت ليهو إتزكرتها بس قال لي والله ما عارف عنها حاجه وانا اصلا نسيتا قلت ليهو البت دي مسكينه ما تستاهل منك كدا قال لي انا المسكين والله🤣 المهم إتونسنا مسافه وبعدها طلعنا وصلني بالركشه لحدي باب بيتنا نزلت وهو مشى...
اليوم التاني جانا مؤيد شايل البابور ركبوا لي ووصل لي توصيلة الكوفير كلها إنتهى بعد الظهر عملت ليهو قهوه ووديتا ليهو في الكوفير شغل البابور ما شاء الله الكوفير كلو إشتغل والمكيفات قلت ليهو بس دا ما حموله عليهو قال لي فيهو نظام رشاشه كدا كل شويه بتبردوا قال لي بس ما تنسي امليها كلو ما تفضى قلت ليهو كويس قال لي ما بتعملوا صنفره هنا عاينت ليهو وقعدت اضحك قلت ليهو ما قاعدين نعمل لكن لو داير بنعملا ليك وبنحلق ليك كمان🤣🤣 قال لي ياريت بس تعمليهم لي إنتي قلت ليهو طيب وقعدنا نضحك أمي جات لقت البابور شغال والهواء بارد قعدت طوالي قالت لي مؤيد نحن ننوم هنا ولا شنو مؤيد قال ليها هو بعمل توصيلات للبيت كلو لانو كبير بس ما بتحمل المكيفات كلها قلت ليهو ما مشكله بوقف جزو من ديل لانو اساسا م ح احتاجهم كلهم وقفت جزو وهو عمل توصيلات لي باقي البيت ماقصر معانا غايتو يا حليلو ..طلع مننا بعد العصر كتبت في المجموعه إنو الكوفير رجع إشتغل ما شاء الله خمسه دقائق ما تميتا الناس بدت تجي اشتغلت ليهم لمن خلصتا امي جاتني قالت لي نسمه قالوا الخرطوم بقت آمنه ونحن زاتنا قعدنا في بيوت الاجار دي كتير قلت ليها يعني نرجع ولا شنو قالت لي إشتقت لي بيتنا وحلتنا ندى جات قالت لي اي والله يا نسمه كفايه انا نهاي ما قادره اتعود على الحله هنا مع انهم ناس طيبين واي حاجه لكن عشرة سنين بتفرق عن عشرة شهور قلت ليهم إن شاء الله نرجع بس خلو الاوضاع تهدأ حبه ونمشي كمان خلو الكوفير يشتغل حبه نحن محتاجين قروش عشان نسافر بيها ولا شنو؟ ندى قالت لي اي والله فعلا...
مره زي كم يوم كدا لميت لي قروش قلت اوديهم لي مؤيد حقات البنزين كل يوم بجيب لينا جركانه ما مقصر نهائي لكن كمان انا ما دايره اضغط عليهو مشيت ليهو في الورشه لقيتو مافي قلت إنتظروا قعدت مسافه وهو ما جاء إستغربت كيف يخلي المحل فتره قدر دي من غير حراسه بعد مسافه شفتوا جاي ومعاهو بت لمن وصلوني لقيتا وجن!! جاتني وقالت لي خطبتي خطيبي يا عديمة الحياء يافاشله اصلا ياها حركاتكم اصلا الحرب دي ما جاتكم ساي من عمايلكم يا وسخه ياا ... بأختصار كدا سمعتني كلام كعب شديد طوالي ولا إتلفته اديتا كف بي اقوى ما عندى وقلت ليها إحترمي نفسك نحن الجانا إبتلاء ما عشان نحن كعبين وبالمناسبه إنسانه اسوأ منك مافي وخطيبك اشبعي بيهو انا ما دايراهو مؤيد إدخل قال لي يا نسمه ما تسمعي كلاما دي بتقول اي حاجه وخلاص قلت ليهو معليش يا مؤيد بس انا من البدايه وافقت عشان خاطر امك طلعت الخاتم وختيتو ومعاهو القروش وقلت ليهو بالمناسبه تعال شيل البابور لانو نحن بكره راجعين الخرطوم وطلعت....