بسم الله نبدأ
لقيت رسالة من مؤيد كاتب لي ممكن نتلاقى بكره ومرسل لي موقع قلت ياربي مؤيد دا داير مني شنو المهم ما فكرت كتير واليوم مرا عادي الصباح مشيت لي بتاع الدكان جمبنا كنت دايره بيقن وكسلانه امشي السوق قلت ليهو عندك بيقن قال لي للأسف ما قاعد اجيبوا قلت ليهو البيقن بمشي ليك الدكان جيبوا وانا ببقى ليك زبونه لانو عندي كوفير وبحتاج ليهو كتير قال إن شاء الله بجيبوا المهم مشيت كم دكان كدا مالقيت فيهم اخر واحد كان في نهايه الحله لقيت عندوا شلتوا وحاسبتا المهم رجعت البيت ختيت البيقن في الصالون وقفلت الباب وطلعت إتزكرت كلام مؤيد امبارح قلت كدي امشي اشوفوا عايز شنو فتحت التلفون ورسلت ليهو قلت ليهو نتلاقى العصر الساعه ٤ كان نشط طوالي ردا قال لي تمام مافي مشكله...
مرا اليوم عادي لحدي ما جات الساعه ٤ لبست وكلمت امي إني طالعه مكان قريب وجايه المهم طلعت وركبت ركشه اصلا المكان ما كان بعيد من الحله مشيت لقيتو قاعد مشيت سلمت عليهو اشر لي قال لي اقعدي قعدت قال لي تشربي شنو قلت ليهو شكرا ما عايزه حاجه والله
قال لي نسمه اسمك حلو قلت ليهو شكرا ولو سمحت يا مؤيد ادخل في الموضوع قال لي تمام ،،انا ووجن لازم ننفصل !! قلت ليهو إنت ليه مصر على قرارك دا انت وجن بقت ما بتعني ليك حاجه ؟ قال لي القصه ما كدا يا نسمه بس إنتي ما بتعرفي وجن آتغيرت وبقت متوقعه مني في اي وقت اخونها يا نسمه إنتي عارفه يا نسمه انا بقيت لمن إتكلم مع وجن بضايق شديد وبتمنى انو اللحظات القليله البتجمعني بيها دي تمر سريع
قلت ليهو يا مؤيد دا إن دل بدل على إنك اساسا ما كنت بتحبها ياخ الانسان بخت للانسان البحبو الف عذر وعذر وبيتحملوا وبعدين ما تعمل نفسك المظلوم انا واثقه انو بت عمك ديك إنت بالجد كنت بتتكلم معاها وبجد قلت ليها الكلام داك اساسا كلامكم حق يوم داك ما بتصدق ودا بدل على إنو وجن احساسها في محلو!! البت دي بتحبك شديد بس إنت مصر على موقفك على الاقل هي احسن منك بالرغم من إنها عارفه عمايلك إلا إنها مصره ما تدمر العلاقه البينكم..
قال لي إنتي شايفه كدا
قلت ليهو ايواا
سكت تاني ما قال حاجه واثناء ما نحن قاعدين كدا سمعت صوت وجن جات مندفعه علينا وجرتني من يدي وادتني كف!! وقبل ما إستوعب حاجه نزلت في نبز يا ما مربيه يا قليلة الادب ياشلابه وانا اقول دايره تصلحي بينا ووثقت فيك لكن إنتي خبيثه ..
والله سمعتني كلام في حياتي ما سمعتوا قبل كدا اخر حاجه لمن ما قدرت إتحمل كوركت فيها وقلت ليها تعرفي اساسا انا الغلطانه ما إنتي كونو اخلي شغلي وحياتي واجري ورا موضوعك إنتي وخطيبك دا غلطي انا شلت تلفوني وطلعت خليتا تردح لي ما عارفه الحصل شنو وراي لكن انا طلعت بي قلب منكسر معقوله انا تقول علي كدا ما قدرت الصداقه ولا المساعدات الانا ساعدتهم ليها على الاقل كان تجي تستفسر تعرف الموضوع ما تحكم كدا ساي قعدت في مصطبه قريبه لي بيتنا وبكيت قدرتي بكيت على اي حاجه ما عارفه اساسا كنت ببكي لي شنو بس كنت ببكي إتزكرت ابوي واحمد وبيتنا وكل حاجه كنت مكسوره بي كلو بكيت قدرتي وفي النهايه مسحت دموعي ومشيت البيت رقدت ونمت طوالي كنت تعبانه صحيت مع بعد المغرب صليت المغرب وإنتظرت العشاء صليت وقلت لي ندى ما تصحوني لي العشى انا ما دايره ومشيت رقده نمتا...
○○○○○○
_إنتي مجنونه دا شنو العملتي دا
=شنو ؟ ما شايفه نفسي عملت حاجه
_شوفي يا وجن اخر حاجه بقولا ليك واسمعيها مني كويس عشان ما ح اعيدها تاني انا وإنتي إنتهينا لا إنتي خطيبتي لا انا خطيبك فهمتي اي حاجه إنتهت ياريت تاني ما تتدخلي في حياتي وربنا يديك البسعدك
=معقوله يا مؤيد نحن وصلنا لحدي هنا 💔 معقوله😭 انت نسيت اي حاجه كانت بينا مؤيد إنت إتغيرت شديد تتزكر زمان لمن كنت بتقول لي انك مستحيل تكسري ولا تخليني زعلانه منك في يوم هسي انا زعلانه شديد ومكسوره يا مؤيد انا إتخزلت فيك
_اي ما بنكر إني قلت كدا بس الكلام دا كان من مؤيد الانتي بتعرفيهو وداك مات للأسف وهسي دا مؤيد جديد وما تسمي تحكمك وقلة ثقتك دا حب دا ما حب دا هوس يا وجن هوس!!
=تمام يا مؤيد انا ح امشي بس ما عافيه ليك كسرت خاطري دي لي يوم الدين ما عافياها ليك...
○○○○○○
من يوم اختلفنا انا ووجن تاني ما إتلاقينا الأ يوم صدفه شفت دفار جمب بيتهم وبنقلوا في عفش ولمن سألت عرفت إنهم راحلين مشيت ليهم وودعتهم ولمن جيت اودع وجن عاينت لي مسافه وقالت لي ما عافيه ليك اي حاجه عملتيها وربنا كريم مؤيد انا خليتو ليك وخليت ليك الحي كمان اشبعي بيهو عاينت ليها مسافه وضحكت قلت ليها تعرفي انا ما ندمانه على حاجه إلا مساعدتي ليك انا مؤيد دا نهائي ما عاينت ليهو بالنظره الانتي بتتكلمي عنها دي لكن زي ما قال إنتي إنسانه شكاكه وما عندك ثقه في زول لازم تعرفي يا وجن انو الثقه اهم حاجه في اي علاقه اعتبريها نصيحه من وحده جمعتك بيها ايام بسيطه بس ختتك مقام اختها وياريتك حفظتي المقامات...
طوالي طلعت منها ومشيت البيت لقيت امي معاها خالتو عفاف كان جاتنا يوم داك وسألتني اذا متزوجه ولا مخطوبه المهم بقت طوالي تجينا وتتونس معانا وبالأخص انا لازم تلاقيني وتتكلم معاي وانا برضو كنت بحب الونسه معاها كانت مره روحها حلوه وفرفوشه يلا قامت قالت لي نسومتي تعالي من قبيل منتظراك امي بقت تعاين لي الصراحه من نظرات امي عرفت في حاجه سلمت عليها وقعدت معاها قعدت تتونس معاي وقالت لي عاد يا نسومه إنتي حلوه حالفه إلا اعرسك لي ولدي لمن قالت كدا انا إنصدمت وما قدرت اقعد معاهم إستأذنتهم ومشيت طوالي خالتو عفاف قالت لي امي شفتي الصمت علامة الرضا وكمان كان شافت ولدي انا واثقه ح توافق عليهو امي قالت ليها إن شاء الله
○○○○○○
بقيت افكر في احمد وونستنا سواا وإتزكرت مره قال لي عازمك في مطعم عندي ليك مفاجئه قلت ليهو امي ما بتخليني قال لي امك انا ح اخطفك منها ونشوف كيف ح تجي تشيلك مني قعدت اضحك قلت ليهو بقيت مجرم ولا شنو قال لي اي يا زوله
ومره ايام العيد جونا في البيت مشيت جبت الضيافه وجيت مديت ليهم قال لي حلاوه وشايله حلاوه قدام امو وامي قلت ليهو اتلم قعد يضحك خالتو خديجه قالت ليهو يا احمد مالك على بتي احسن ليك خليها في حالا..
ياخ انا محظوظه إني كنت خطيبتو ربنا يرحمو كان حنين شديد كان باقي لينا السند حتى في عز إنشغالو كان بتزكرنا ،، بتزكر يوم كان عندهم إجتماع مهم ومكلمني بيهو من قبل يوم قال لي إنتي عارفه يا نسمه بكره الاجتماع دا ح يحضروا الامين العام ومدير المحليه وكم زول كدا من الناس المهمين عشان كدا لازم اقدم فيهو اقتراحاتي طبعا احمد كان شغال مهندس المهم صحى بدري تاني يوم وطلع مشي السوق جانا زي عشره كدا دقه الباب فتحت لقيتو احمد قال لي الله ما طالا فتحتي إنتي يومي كلو ح يكون سمح مدى لي اكياس قلت ليهو دا شنو قال لي دا خضار وشويه حاجات كدا اعملي لي طبخه ظابطه من يدك بعدين جاي إتغدى معاكم قلت ليهو احمد إنت مصر إنك تنفق علينا ،، احمد والله نحن عندنا قروش وهسي الكوفير بقى شغال كويس الحمد لله ف تاني يا احمد..
قاطعني قال لي تاني شنو يا نسمه وبعدين ما كل مره نفسي السناريو انا حصل شكيت ليك ،، بعدين انا ح اظل اجيب ليكم حاجات لحدي ما اموت ما تتخيلي انو إنتي كبرتي وفتحتي كوفير وبقى ماشى دا بعني إني اوقف صرف انا شايف إنو امك امي وندى اختك في مقام اختي اما إنتي مرتي إلا يكون عندك اعتراض في دي؟ قلت ليهو ما تقلب الطاوله قال لي تمام لا نقلب طاوله ولا نتكلم كلام مافي محلو امسكي مني انا مستعجل عندي إجتماع اجي القاك طبختي تمام
قلت ليهو ربنا يوفقك يارب قال لي اي عليك الله كتري من الدعوات دي...
بقيت ابكي وادعي لي احمد ربنا يرحمو ويغفر ليهو😭😭 ما قادره اتحمل فراقو ربنا يصبرني..
ندي جات لقتني ابكي قالت لي مالك قلت ليها مافي حاجه إتزكرت لي حاجه بس
قالت لي نسمه ما يكون البكى دا عشان كلام خالتو عفاف اكيد اتزكرتي احمد،، نسمه إنتي لي متين ح تفضلي كدا؟ نسمه احمد مات خلاص انسيهو وكملي حياتك قلت ليها انساهو كيف يا ندى انا ما بقدر انساهو ندى احمد القدمو لينا في حياتو مستحيل لو كان عايش نقدر نوفيهو حقو
قالت لي عارفه والله لكن يا نسمه الحياة ما ح تقيف على زول الحياة ماشه احمد بقى ماضي عيشي حاضرك يا نسمه والصراحه ولد خالتو عفاف دا زول خلقه واخلاق ما أظن تلقي زيو
قلت ليها يا ندى انا ما دايره ادخل في علاقه تاني نهائي من بعد احمد ودا اخر كلام عندي فاهمه قالت لي كدي ادي الولد فرصه وادي نفسك فرصه قلت ليها ندى!! ما اعيد كلامي تاني ولو سمحتي امشي خليني براي قالت لي سمح بس فكري ...