إتلفتنا لقينا بت والصراحه كانت حلوه حلا مبالغه جات قعدت جمبنا ووجن تسكت وتحدر ليها قالت ليها يا وجن مؤيد دا بحبك شديد والله بس إنتي شكاكه اكتر من اللازم المهم انا بت عمو وفي مقام اختو وجن نطت قالت ليها متين بنات العم بقن اخوات كمان اجي دايره تغيري الشرع كمان
قالت ليها وكمان ما بتصبري تسمعي الكلام لحدي النهايه
إنتي عارفه مؤيد امو متوفيه ومن زمن صغير امي ربتو معانا يعني ممكن تقولي مؤيد إضافه لانو ود عمي هو اخوي من الرضاعه 😒
وجن بس اكتفت تعاين ليها وتسكت...
مؤيد قال ليها اقتنعتي ولا لسه يا وجن ماهو ما كلو مره تلقيني مع بت تقولي لي إنت بتخوني وإنت ما بتحبني انا البنات ديل كلهم ما شايفهم شايفك إنتي وبس ف خلي الحركات دي.. ويلا تطلبوا شنو عازمكم على حسابي بمناسبة الصلح دا😊
وجن قالت ليهو متين قلت ليك انا صالحتك؟ وقايل كلامك وكلام بت عمك بمشي علي الشي البعرفو يا مؤيد امك ماتت وإنت في تالت اساس إنت الزمن داك كنت بترضع؟!
مويد كورك فيها وقال ليها وجن احسن ليك وبعدين ياخ فعلا انا ربتني مرة عمي امي صاح ماتت وانا في تالت بس حصلت ظروف منعتا انتي اي حاجه إلا تدققي فيها كلموها يا جماعه وطلع غضبان البت عاينت لي وجن وطلعت لحقتو...
قلت لي وجن بالمناسبه الدور دا كدا اوفر الصراحه
شوفي ياوجن إذا عايزه تحافظي على علاقتك خففي من الغيره دي انتي كدا مافي علاقه إنتي في معركه عديل وصدقيني كان واصلتي فيها ح تفقدي مؤيد وللابد كمان
قالت لي والله يا نسمه انا ما بغار من فراغ انا مؤيد دا بعرفو من زمان ما من الليله نسمه مؤيد دا زمان لمن يشوفني بحس في عيونو سعاده زي الملك الدنيا بس هسي انا وجودي وعدمو في حياتو بقى واحد إنتي عارفه با نسمه بقت تمر ايام وما بتصل علي ولا يسأل مني مع آنو انا خطيبتو...
قلت ليها انا متفهمه وضعك بس يا وجن انتي الاحساس دا احسن تواجهيهو بيهو هسي صالحيهو واديهو وقت ينسى زعلو منك واقعدي معاهو بي رواق وقولي ليهو اي حاجه حاسه بيها صدقيني يا وجن مؤيد دا لسه بحبك لكن إنتي بي يدك ممكن تخربي اي حاجه وبالمناسبه حتى انا ما صدقت إنو البت دي اختو من الرضاعه والسناريو الاتعرض دا ...ودا إن دل يا وجن بدل على إنو مؤيد بقى يميل للبت دي فما تسمحي للحاجه دي تحصل خليك زوله واعيه...
ما ردت على كلامي بس قعدت تبكي حضنتها لحدي ما هدت وقلت ليها ارح نمشي واسمعي كلامي بعدين إتصلي ليهو وإتكلمي معاهو تمام قالت لي تمام
طلعنا مشينا البيت لقيت امي معاها مره قاعدين يتونسوا دخلت سلمت عليها وإتونست معاهم حبه المره صحبت امي قالت لي ما شاء الله حلاتك اسمك منو قلت ليها نسمه قالت لي حتى اسمك حلو ربنا يحفظك قلت ليها اللهم امين قالت لي انتي مخطوبه او متزوجه؟ عاينت ليها مسافه زكرتني بي احمد ما قدرت إتحمل قعدت ابكي وطلعت خليتهم
امي حكت ليها القصه كلها قالت ليها ربنا يصبرها والله المهم امي نادت ندى قالت ليها جيبي قهوه لي عفاف ندى جابت القهوه شربوا القهوه وإتونست معانا حبه وطلعت ...
المهم اليوم مرا بي خيرو بي شرو مرا صباح اليوم التاني جوني كم مره كدا قعدت احنن فيهم قربت اخلص جاتني وجن تبكي عاينت ليها قعدت إنتظرتني لحدي ما إنتهيت ناديت ندى قلت ليها جبي للحريم قهوه واقعدي معاهم سقت وجن غرفتي وقلت ليها مالك إنفجرت بكى قدر ما حاولت اهديها ما قدرت خليتا تبكي لحدي ما بكت قدرتا قلت ليها اها احكي لي
قالت لي مؤيد يانسمه 😭😭 امبارح إتصلت ليهو زي ما قلتي لي😭😭 وإعتزرت ليهو تصدقي قال لي شنو😭😭😭 قال لي البينا إنتهى 😭😭 إنتي إنسانه مستحيل اواصل معاها حياتي 😭😭 قلت ليها قال ليك كدا!! قالت لي اي بقيت اعاين ليها بس ياخ وجن دي طيبه شديد ما تستاهل كدا قلت ليها ممكن تتصلي عليهو او اقول ليك اديني رقمو انا بتصل ليهو إتكلم معاهو ادتني رقمو كتبتو وإتصلت عليهو وفتحت الاسبيكر بعد الجرس التالت ردا قال الو قلت ليهو السلام عليكم قال لي وعليكم السلام منو معاي ما عرفتك قلت ليهو انا نسمه صحبت وجن كان جيت معاها امس قال لي عرفتك قلت ليهو ممكن إتكلم معاك في موضوع وجن عارفه إنو انا ما لي دخل بس وجن صحبتي قال لي يا نسمه وجن طول عمرها كدا كل مره تخترع مشكله وانا اراضيها ومشكلتها ما بتعترف إنو هي الغلطانه قلت ليهو انا اتكلمت معاها بالخصوص دا وهي اتفهمت الموضوع بس كمان يا مؤيد. إنت ما تكون قاسي عليها اديها فرصه اخيره قال لي والله يا نسمه انا وصلت لي مرحلة الانفصال دي بعد تفكير طويل ،وصحبتك ربنا يديها البسعدا قلت ليهو بي بساطه كدا داير تنهي علاقتكم إنت لو بتحبها بجد بتديها فرصه قال لي انا بحبها وشديد كمان لكن يا نسمه في حاجه إتفقدت في علاقتنا الثقه والامان ديل اهم حاجتين في العلاقه والاتنين إتفقدوا وجن بقت ما بتثق فيني وانا بقيت ما بشعر بالامان معاها على طول خايف إنو تحصل مشكله تفرقنا لحدي ما بقيت احس إنو المشاكل دي بقت روتين حياتنا قلت ليهو وإنت قبل تنهي العلاقه دي ليه ما حاولت تعرف سبب المشاكل دي وجن قالت لي إنها بقت حاسه إنو إنت بقيت متغير معاها ما زي اول قال لي يلا هي ما سألت نفسها انا إتغيرت ليه؟ ليه ما جات واجهتني بدل المشاكل والدرامات دي ؟ قلت ليهو هسي اديها فرصه اسمعوا بعضكم يمكن تتصالحوا وترجعوا لي بعض وانعلوا الشيطان هو البخرب بيناتكم ما تقوموا في لحظة غضب تخربوا البينكم قال لي انا إتخزت قراري قلت ليهو مؤيد فكر سمح وما تتخز حاجه تندم عليها بعدين روق وفكره براحه هسي إنت منفعل ما ح تقدر تتخز قرار... قال لي طيب ح افكر بس عشانك إنتي لكن حاولي اقنعي صحبتك تتغير قلت ليهو تمام ما تخاف من الناحيه دي وعاينت لي وجن قفل الخط وقلت ليها سمعتي كلامو... قالت لي يا نسمه عليك الله حنسيهو ما يخليني انا لو خلاني بموت
قلت ليها بعيد الشر إن شاء الله ترجعوا لي بعض واحسن كمان يا وجونه قالت لي إن شاء الله قعدت معاي حبه وطلعت
مرت تلاته يوم على الكلام دا وفي اليوم الرابع قاعده في الصالون كان معاي كم بت كدا ندى كان بتكوي ليهم وانا بمكيج ليهم كان عندهم عرس المهم إنتهينا منهم قريب المغرب ندي قالت لي هوي انا ما شغاله معاك فاعل خير قعدت اضحك قلت ليها بحول ليك حقك ما تخافي قالت لي ايواا كدا ماشه اعمل شاي اعمل ليك معاي قلت ليها ياريت هي مشت وانا فتحت التلفون لقيت رسائل كتيره في الواتس ومن ضمن الرسائل لقيت رساله من مؤيد كاتب لي فيها ممكن نتلاقى...