جبت دفار ورفعنا عفشنا كلو بعد خلصنا مؤيد جا وقال لي يعني جاده ماشين؟ خلو الاوضاع تهدأ حبه حتن ارجعوا قلت ليهو الاوضاع كويسه في الخرطوم ونصيحتي ليك يا مؤيد ارجع لي وجن البت دي بتحبك قال لي بعد الكلام القالتو ليك دا كلو وبتقولي كدا ؟! إنتي قلبك ابيض بالجد يا نسمه قلت ليهو ربنا يسامحها بس قال لي انا عارف إنو انتي لا حبيتيني ولا ح تحبيني بس إتمنى ربنا يرزقك كل الخير يارب ويديك الاحسن مني انا بالجد فخور إني عرفتك في يوم من الايام وكنتي خطيبتي كنت بتمنى علاقتنا تستمر لكن كل حاجه قسمه ونصيب بس كل البقدر اقولوا ليك إنو ربنا يوفقك في كل خطوه تخطيها ويديك الفي مرادك قلت ليهو إنت برضو والله زول كويس شديد وطيب ربنا يسعدك كان مع وجن كان مع غيرا بتاع الدفار جا قال لي تاني مافي حاجه قلت ليهو كويس بعد دا نركب ركبنا وودعنا مؤيد وخالتو عفاف وبناتا وجيرانا وإتحركنا على الخرطوم...
ماشين ١٥ ساعه متواصله إسترحنا حبه وإتحركنا وصلنا بيتنا بعد خمسه يوم لقينا بيتنا فاتح دخلنا لقينا البيت فاضي مافي اساس مافي اي حاجه حيط واقفه بس مشيت الكوفير والبوتيك نفس الحاجه رتبنا حاجاتنا في البيت ورتبت حاجات الكوفير لقيت رجولي لا إرادياً بتشيلني لي بيت ناس احمد دخلت بقيت إتأمل في البيت ودموعي ماشه قدر ما حاولت امسك نفسي ما قدرت فتحت المجال لي دموعي كانت مشتاقه ليهم شديد قعدت في الارض وقعدت ابكي وادعي ليهم
رجعت البيت وحالتي بالبلاء دخلت الحمام إستحميت وغيرت هدومي لقينا جزو من ناس الحله رجعوا وفي ناس اصلا ما طلعوا سلمنا عليهم ومشيت ناس إبتهال طبعا بيتهم صلحوهو والجزو المكسور رمموهو رجعت حياتنا شويه شويه زي ما كانت وفي يوم قلت لي أمي طالعه ماشه السوق عندي حاجات عايزه إشتريها طلعت اول حاجه مشيت المقابر دعيت لي احمد وطلعت مشيت السوق إشتريت حاجاتي ومن دون مقدمات سمعنا صوت قوي زي صوت الموتر جاي علينا ودا ما كان صوت موتر للأسف....
○○○○
واي يا أمي نسمه !!نسمه فاتت خلتنا امي نسمه فاتت
=يا ندى إستهدي بالله امك الفيها مكفيها يا بتي نسمه ماتت شهيده يابتي عارفه يعني شنو شهيده نسمه عمرها ما اذت زول وكانت الكلمه الطيبه هي الوحيده البتطلع من خشمها نسمه طويره جنه يابتي🥺❤️
○○○○
يقال ان المحب اذا احب إشتاق وان للشوق نار تحرق قلب المحب الى حبيبه فلا سلم الله النوى وقرب الله القلوب❤️
○○○○
بعد مرور ٧ سنه
=يلا يا ندى اطلعي سريع عشان ماشين
_اي جايه يا حازم لكن قبل نمشي لي إبتهال في بيتا خلينا نمشي المقابر انا دايره ازور امي ونسمه
=صح إنتي بي مناسبة نسمه وينا نسمه بتنا ❤️ وعمار
_قبيل مشوا العربيه منتظرننا
=طيب ارح عشان ما نتأخر
_حازم إنت ليه ما علقت على التوب انا زعلانه منك
=معقوله ياخ دا ح ياكل منك حته
_شكرا🙈
○○○○
في الشماليه...
مؤيد:با نسمه يابت جيبي لي مويه
جات وجن شايله المويه
وجن: هسي يا مؤيد إنت لمن تنادي نسمه بتكون قاصد نسمه ياتا
مؤيد: والله يا وجن عمرك ما بتتغيري🤣🤣
وجن:عشان بغار عليك يعني اصلا سجمان ورمدان وما مستاهل زاتو وحده زي
مؤيد:اي اي ما انا متزوج تاجوج🤣🤣
وجن:والله احسن ليك وبعدين تاجوج انا احلى منها
مؤيد:اي صح🤣❤️
○○○○
ختاماً هل للشوق نار؟ وهل يلتقي المشتاق ب الذي يشتاقه ولو بعد سنين من الفراغ؟ ربما نعم وربما لا
ولكن فل نتفق كلنا ان للشوق نار توقد في قلوبنا جميعا الى ان نلتقى في قصه اخرى🤭
تمت بحمد الله