حسام يدخل بسرعة ويقف قدام الموظفة.
حسام
أنا الأستاذ حسام محسن اللي لسه مكلماني من ربع ساعة كده.
الموظفة تبص على الكمبيوتر وتقول:
الموظفة
حضرتك مقدم على قرض بقيمة 20 ألف جنيه يوم 20 ديسمبر، واتوافق عليه، بس محتاجين حضرتك تعبي الاستمارة دي عشان تقدر تسحبه.
حسام
بفرحة
يا ما إنت كريم يا رب، ألف حمد وشكر ليك يا رب. طيب هي فين الاستمارة وممكن أسحب المبلغ إمتى؟
الموظفة تناوله الاستمارة.
الموظفة
اتفضل، أول ما تسجل البيانات المطلوبة تقدر تسحبه على طول إن شاء الله.
حسام ياخد الاستمارة ويطلع قلم من جيبه وهو بيقول:
حسام
تمام، شكرًا جدًا لحضرتك.
—---------
في بيت المعلم جمعة
في الصالة، قاعد حسام مع جمعة. حسام يناول جمعة فلوس.
حسام
اتفضل يا عمي جمعة، دول 14 ألف جنيه إيجار الشقة المتأخر، والخمسة اللي دفعتهم في ولادة منى مراتي.
جمعة
لو محتاجهم خليهم معاك يا بني، إحنا هنروح من بعض فين يعني.
حسام
كترخيرك والله يا عمي جمعة، كفاية وقفتك معايا، والله ما هنسهالك أبدًا.
جمعة
عيب عليك يا حسام، إنت زي الواد زين ابني، ولو ما وقفناش جنب بعض في الزنقة، مين هيقف معانا؟
حسام يقوم وهو بيقول:
حسام
ربنا ما يحطك في ضيقة أبدًا يا عمي جمعة. يلا أنا هستأذن علشان سايب منى لوحدها بالعيال.
جمعة يقوم وهو بيقول:
جمعة
طيب اشرب كوباية الشاي.
حسام يسلم عليه بحب.
حسام
مرة تانية إن شاء الله. يلا سلام عليكم.
حسام يسيبه ويمشي.
جمعة
وعليكم السلام ورحمة الله وبركاته.في البنك
—---------
في الشارع
حسام ماشي، فجأة يشوف الراجل اللي كان في الصيدلية وجاب له اللبن. يجري عليه وهو بينادي:
حسام
يا عم الحج… يا عم الحج، لحظة من بعد إذنك.
الراجل يقف ويبص له باستغراب وهو بيقول:
الراجل
خير يا بني، محتاج حاجة؟
حسام
إنت مش فاكرني؟ أنا حسام أبو تلات عيال اللي جبت له اللبن من صيدلية الدكتور علاء، فاكر؟
الراجل
بتفكير
أيوه أيوه افتكرتك، معلش يا بني السن مأثر وكده، ماخدتش بالي.
حسام يطلع فلوس من جيبه ويناولها للراجل وهو بيقول:
حسام
أنا بحمد ربنا إني قابلتك علشان أردلك حقك، اتفضل دول حق الحاجات اللي جبتهالي.
الراجل
عيب عليك، قولتلك هزعل منك كده. بس قولي إنت من هنا صح؟
حسام
أيوه، أنا ساكن في الشارع اللي قدامك ده.
الراجل
طيب معلش يا بني هتعبك معايا، أنا حد دلني على مكتب هنا، للمحتاج موظفين، بس نسيت العنوان، ممكن تساعدني؟
حسام
من عيوني حاضر، بس إنت محتاج موظفين ليه؟ مش فاهم.
الراجل
محتاج مدير حسابات يمسك لي حساب ورشة العربيات بتاعتي، أنا بستورد عربيات وببيعها هنا في مصر، وحصل مشكلة بيني أنا ومدير الحسابات وساب الشغل.
حسام
طيب هو كان بياخد كام في الشهر أصلًا؟ أنا موظف حسابات في شركة برضه وعندي خبرة وممكن أشتغل عندك لو حابب.
الراجل
طيب والله يكون خير وبركة. الراجل كان بيقبض 25 ألف في الشهر، والله ومستعد أديك أكتر من كده، بس أهم حاجة الصدق والأمانة.
حسام يبرق بصدمة وبعدين يقول:
حسام
تعالى يا حج، الموضوع ده محتاج كوبايتين شاي مظبوطين.
حسام والراجل يمشوا مع بعض في الشارع.
—-----
في شقة حسام – بالليل
منى قاعدة مع العيال، باين عليها القلق وهي بتقول:
منى
يا رب استرها، حسام من الظهر لسه ماجاش لحد دلوقتي.
حسام يدخل فجأة وهو بيقول بفرحة:
حسام
منى… منموني، منونة قلبي، بنوتي حبيبتي!
منى
باستغراب
سبحان من غير الأحوال، مالك إنت؟ اتهبلت ولا خدت ضربة شمس ولا إيه؟ إيه الهبل ده: منموني منونة قلبي إيه وزفت إيه؟
حسام
تصدقي إنك فقر وخسارة الواحد يدلعك.
منى
يا حبيبي إنت مش بتدلعني، إنت بتشوهني. بس قولي إيه الهنا ده؟ شايفاك رايق كده.
حسام
بفرحة
لما تعرفي هتروقي إنتي كمان. خلاص، كل مشاكلنا اتحلت. سبحان الله، الهم ممكن يقعد سنين وفي لحظة يتزاح ولا كأنه كان موجود.
منى
بسعادة
اتوافق على القرض وهنسدد الديون اللي علينا، صح
حسام
بفرحة
مش بس كده، ده أنا ربنا وفقني في مصلحة هنعيش منها ملوك بإذن الله.
منى
بشك
خير يا حسام، مصلحة إيه دي؟
حسام يحكي لمنى كل اللي حصل.
حسام
ومش بس كده، ده الراجل طلع كريم أوي معايا، وهيحاسبني على الشهر بـ30 ألف جنيه. الفرحة مش سيعاني والله.
منى
بدموع وسعادة
الحمد لله يا رب، ما إنت كريم. رزقنا ورزق عيالنا يا حسام.
حسام يحضنها جامد وهو بيقول:
حسام
مافيش رزق في الدنيا أحلى ولا أكبر منك يا منونة قلبي إنتي. بحبك أوي يا منى.
منى
بسعادة
وأنا كمان بحبك أوي يا حسام. بقولك طالما الحمد لله فرجت، إيه رأيك نعمل سبوع العيال؟
حسام
بحب
ودي حاجة تروح عن بالي؟ طبعًا هنعمل لهم أحلى سبوع في الدنيا يا قلبي.
—-------
بعد أسبوع في شقة حسام
حفلة سبوع الأطفال، والكل موجود ما عدا مرفت. ومنى وحسام شايلين عيالهم بسعادة. منى تبص لحسام وهي بتقول:
منى
بزعل
حسام، أنا رغم إن الفرحة مش سيعاني، بس زعلانة أوي. أمي مش معايا في يوم حلو زي ده، والفرحة ناقصة من غيرها.
حسام
والله رحت لها مرتين يا منى، هي حرة بقى.
حسين يقرب منهم شايل طفل.
حسين
مالكوا سايبين المعازيم واقفين ليه كده؟
حسام
مافيش، بس منى مضايقة شوية علشان حماتي ما جاتش.
حسين
ولا يهمك يا حبيبتي، أنا معاكي وحسام كمان، وما تنكديش على نفسك في مناسبة حلوة زي دي.
منى
بدموع
لو الدنيا كلها معايا، إنت وماما فوقها، ومن غير واحد فيكم الفرحة ما تكملش أبدًا.
مرفت تدخل، تسمع كلام منى، وتقول بدموع:
مرفت
وأنا كان يهون عليا أزعلك في يوم حلو زي ده؟
منى
بفرحة ودموع
ماما…
تجري عليها ويحضنوا بعض، وحسام يقول:
حسام
بابتسامة
نورتي بيتك يا حماتي والله.
مرفت
بحنق
وأنا مش جاية علشانك، أنا جاية علشان بنتي. نوري خسارة في واحد زيك.
حسام
ما أنا عارف إنك جاية علشان بنتك، هو إنتي هتجي علشان لا؟ ما تكوني عاوزة تنكدي على أهلي. وما تقلقي شويه والنور يقطع ونور بيكي اصلا نورك مغرقنا.
حسين
الله، ما تعقل بقى يا عم حسام وتلم الدور.
حسام
حاضر يا عمي، والله إنت منحوس في جوازتك، وأنا كراجل زيك عذرك، والله، وسبحان الله جايبلنا قمر في وسطكم.
يغمز لمنى، منى تقول بزعيق:
منى
حسااااام!
حسام
بخوف
مالك يا بت؟ ما أنا بدلعك اهو.
مرفت
بحنق
وإنت علشان تدلعها تهزقنا إحنا وتمسح بكرامتنا الأرض؟
حسام
بابتسامة
هو إنتي عندك كرامة زينا يا حماتي؟
منى
بغضب
حسااااام، اسكت وخلي يومك يعدي.
حسام
حاضر، أنا هسكت خلاص اهو. نورتي يا حماتي يا حبيبتي، ونورك خربتيها ارتاحي. عن إذنكم أنا بقى.
حسام يسيبهم ويمشي. منى ومرفت يبصوا له بغيظ، وحسين يهز راسه بيأس ويقول:
حسين
الواد عمره ما هيعقل…
تمت بحمد الله