قصة سواد قلب الحلقة الاخيره للكاتبة مروة الصافي
وصلنا المستشفى بالجد كنت حاسة بي خوفة كدا ماعادية مشينا للدكتور واديتو النتيجة اول مافتحها حسيت ملامح وشو اتغيرت شديد وسكت مسافة قلت ليه يادكتور لو في اي حاجة وريني مافارقة انا استقبلت صدمات كتيرة في حياتي ما اظن دي تكون أقوى من الحاجات الفاتت قال لي صراحة الصور ظهر فيها انك عندك ورم في المخ بس طبعا لسه ماحنقدر نحدد مالم تتشال عينة عشان نقدر نعرف نوع الورم شنو ومن هنا لحد ما تتعمل ياريت ماتتوتري وادعي ربنا انه يكون حميد سبحان الله اتلقيت الخبر بي كل برود حتى الدكتور زاتو اتحير فيني زول بقولو ليه عندك ورم ويكون بارد كدا صحبتي دي حسيت انها اتوجعت علي شديد قلت ليها عادي ودا كلو تخليص حق قالت لي ان شاء الله ربنا يخفف عنك. ويكون حميد ومسكتني وقعدت تبكي سبحان الله انا ولادمعة مانزلت مني ياربي قلبي مات للدرجة دي. قلت ليها ماعايزة ارجع البيت اسه ارح نقعد في أي مكان وياريت مكان مايكون فيه ناس قالت لي ليه عايزة تعملي شنو قلت ليها ما تخافي مابن*تحر كفاية العملتو في الناس كمان اجني على نفسي
ركبنا العربية ومشينا جمب البحر وقفت على حيلي وكوركت بأعلى صوت وهي ماسكاني وبتبكي وانا بكورك لحد ما اغمى علي صحبتي بقت تفوق فيني فتحت عيوني شفت خوف في عيونا عمري ماشفتو قلت ليها ما تخافي الكاتبو ربنا بجيني بس انا كل الواجعني امي وابوي حيعملو بعدي شنو لو حصل لي شي قالت لي ياخ ماتتشائمي إن شاء الله حتعملي العملية وتبقي كويسة وترجعي لي حياتك وتنسي كل الفات بس حتكون بقت ليك عبرة وعظة لي باقي حياتك وتكوني اتعلمتي من الدرس دا انو أذية الناس عقابها صعب قلت ليها ياااااااااااااااارب يكون كدا بس انا احساسي بقول لي غير كدا.
قلت ليها حاتصل على واحد من اخواني واوريه ماعايزة امي تعرف اسه عشان هي ماحمل صدمات قالت لي افضل حل فعلا اتصلت وقلت ليه عايزاك ووصفت ليه مكاني جا مخلوع في شنو قلت ليه ابرد شوية ويحكي ليك قعد حبة ووريتو الحاصل علي اخوي دا من غير مايقول حاجة دموعو جرت قلت ليه انا ماعايزة اشوف دموع ماعايزة أضعف خليكم مصدر قوة لي انا محتاجاكم بي شدة قش دموعو وقال لي ماتخافي نحن معاك قلت ليه بس امي وابوي مايعرفو ولمن اجي اعمل العملية بقول ليهم مسافرة شغل وانت حتمشي معاي أو أي حاجة قال لي تمام.
رجعنا البيت سلمت على امي وقعدت اتونست معاها شوية وهظرت معاها قلت اغير ليها جو ولي كمان بالمساء كدا طلعنا انا واخوي ومشينا للدكتور قلت ليه حدد لي اقرب زمن للعملية المهم حدد العملية بعد يومين بس سبحان الله نهائي ماكنت خايفة بس حسيت اخوي خايف على شديد
رجعنا البيت وكلمت امي انو عندي شغل كم يوم كدا وحاسوق معاي محمد اخوي قالت لي شغل شنو فجأة كدا في شنو انتو داسين مني شنو قلت ليها ماف حاجة ي امي شغل زي ماقلت ليك قالت لي كويس بس قلبي مامصدقك.
جهزت حاجاتي وجا يوم العملية ودعت امي وطلعنا مشينا المستشفى وخلاص زمن العملية جريت جري من محمد عشان ماعايزة أضعف. المهم اتعملت العملية وشالو العينة وللأسف طلع ورم خبيث اصلا انا كنت حاسة ما انصدمت ولا خفت بس محمد دا بكى بكا شديد انا البقيت اهدئ فيه الدكتور قال ليه المفروض انت تكون أقوى من كدا. تميت ايامي في المستشفى وقلت ليه قبل ارجع البيت عندي مشوار لازم امشيو قال لي وين قلت ليه بيت ناس فاطمة فعلا مشينا ولحسن الحظ لقيت فاطمة اتحسنت بس امها قالت لي لحد الان ماكلمناها بإنو عبدالرحمن اتوفى قلت ليها احسن وانا عايزاها تمشي معاي بيتنا وانتو كمان معاها قالت لي خير قلت ليها خير بس موضوع ضروري شديد
لبسو وجو معاي بيتنا فاطمة اول ماشافت امي اتخلعت قالت الحصل شنو قلت ليها دا الجبتكم عشانو ناديت ابوي واخواني ونسوان اخواني وقلت ليهم عايزة احكي ليكم كلام بس ماعايزة زول يقاطعني لحد ما انتهي وبديت احكي ليهم من يوم ما اتخطبت لي سامي وخلاني ولحد ماعملت العملية ما اقول ليكم صدمة الناس كانت قدر شنو فاطمة دي بقت تصرخ وتقول لي حسبي الله ونعم الوكيل فيكم قلت ليها ربنا اخد حقك واسه انا في العد التنازلي عندي ورم في المخ وفي المرحلة الأخيرة يعني كلها مسألة وقت بس
انا مريت بي حاجات كتيييييرة وعرفت غلطي وللأسف كان متأخر شديد بعد خلاص بقت ايامي معدودة في الدنيا انا وريتكم كل العملتو لانو اصلا ماعندي شي اخسرو اكتر من الخسرتو خسرت اخوي وخسرت نفسي وخايفة اكون حتى آخرتي خسرتها تابعت الشيطان من غير ما افكر عواقب البعمل فيه دا شنو حبي لي نفسي والانتقام لي كرامتي عماني من الحق دمرت حياة اخوي ومرتو وقبلها دمرت حياتي بس كل البتمناه انكم تسامحوني مع انو العملتو صعب زول يسامحني عليه بس دا كل أملي قبل اموت فاطمة قالت لي وأصدق من وين انو عندك حاجة انسانة زيك مستحيل زول يصدقها أو حتى يثق فيها انتي اكعب من انو زول يأمن ليك أو حتى يعيش معاك وربنا بحب سامي اخوي انو ما ارتبط بي وحدة زيك انا دموعي جرت وقلت ليها معاك حق
محمد قال ليهم للأسف كلامها صح وانا كنت معاها من يوم النتيجة لحد ماعملت العملية وطلع الورم خبيث وفعلا يافاطمة معاك حق لو سامحتيها أو لأ بس العفو عند المقدرة وهي اسه بتصارع
قالت ليه ولمن انا كنت بصارع ولا لمن فرقتني من زوجي ولا لمن زوجي مات بي الحسرة دا كلو ماكان صراع وفتحت الباب وطلعت وأهلها بي وراها ابوي ضرب كف على كف وقال لاحول ولا قوة الا بالله ربنا يسامحكم بس اكتر من كدا ماعارف اقول شنو وانتي ياحنان الله يشفيك...
#انا الفترة دي بصارع بين الحياة والموت
وفي اي لحظة مستنية يومي بس وكل يوم بضرب لي فاطمة وكل ما احس نفسي قادرة امشي بمشي ليها وكل المستنياه انها تسامحني وفعلا في آخر مرة قالت لي ربنا يغفر لي ويغفر ليك وانا حاليا منتظرة يومي بس ياجماعة ابعدو من السكة دي انسان يكون سبب أذية لي غيرو عواقبها وخيمة ربنا مابخلي حق زول سيبو الناس في حالها المبسوط أدعو ربنا يزيد سعادتو والحزين أدعو ربنا يزيح عنو ويسعد قلبو الحياة مامستاهلة البنعملو عشانها دا كلها ايام معدودة حنعيشها وحنخليها لي غيرنا يتصارعو برضو فيها ...
تمت