رواية ياسمين الفصل التاسع9 بقلم مروة الصافي
طال علي الليل شديد والصباح جا بعد سل روح قمت من محلي داك على الحمام واتوضيت وصليت الصبح وطلعت لقيتو ماف استغربت من الصباح كدا مشى وين
الساعة ٧ جات وهو لاسه ماجاء بتصل تلفونو مغلق خفت عليه شديد وماعارفة امشي وين اشوفو راسي بقى ضارب وبقيت اخش وامرق وافتح باب الشقة اعاين ليه وارجع
شوية اعاين من البلكونة وانا واقفة في البلكونة عاينت شفتو جاي جريت فتحت الباب شوية ووصل قلت ليه كنت وين من قبيل قال لي اسف بس مشيت الصلاة ومن هناك حسيت نفسي عايز اشم هواء اتمشيت شوية
قلت ليه طيب مش كان تكلمني عارفني بخاف براي (كنت عايزة اقول ليه بخاف عليك بس مسكت نفسي )
مشيت عملت الشاي وجيت قعدت وقلت ليه ايمان صحبتي طلبت مني نتلاقى وانا قلت اشوف رايك انت اول طيب ولو عايزين تقعدو هنا براحتكم انا طالع ماشي عندي ورق عايز اجهزو
قلت ليه طيب لكن خت في بالك المساء نمشي ناس امي قال لي كويس
فعلا اتجهز وطلع شوية وجا راجع شايل معاه أكل وعصاير قال لي عشان ماتتعبي تعملي حاجة طبعا لحظتها حسيت قدر شنو انا حافقد انسان وراجل زي دا ودعني وطلع
وانا اتصلت لي ايمان تجيني نص ساعة كدا وايمان كانت معاي اول ماجات داخلة مسكتها وقعدت ابكي 😭 حست اني موجوعة وبقت تهدي فيني
قالت لي اسه انتي مالك كدي فهميني قلت ليها علاء مسافر قالت لي ودا المخليك تبكي وتبكي ليه دل مش علاء نفسو الضريتي لي وكنتي ماطايقاه وانك مغصوبة عليه اسه الحصل شنو
ياسمين احسن تعترفي انك بقيتي بتحبيه ماف داعي تكابري وانا اكتر زولة فاهماك
قلت ليها تصدقي لو قلت ليك انا ماعارفة متضايقة وموجوعة ليه عارفة انا من امس ما اكلت حاجة ومانمت وفكرت في كلامك كتير
لمن كنا في البلد وجاتو ملاريا انا كنت بساهر للصباح عشان انزل ليه الحمى ولمن بت خالتو كانت بتعمل حركات لمن تشوفو انا كنت بتضايق وماكنت عارفة ليه
والليلة الصباح طلع واتأخر انا خفت عليه شديد لانو كان زعلان من امس انا اتوترت وبقيت اخش وامرق ولمن شفتو جاي كان نفسي انزل ليه جري عشان اطمن عليه
انا حبيتو ي ايمان (في اللحظة دي انهرت وبكيت بي قوة ) متين وكيف ماعارفة انا لقيت نفسي متعلقة بيه شديد وللاسف اكتشفت دا متأخر
قالت لي متأخر ليه لسه الكورة في ملعبك لازم تعترفي ليه قلت ليها اعترف اكيد ماجادة انا بعد جرحتو من اول يوم وفي اهم لحظة في حياتو معقول تاني ارجع واقول ليه لا انا طلعت بحبك وداك كلو كان طيش مني
قالت لي ايوا بالضبط كدا تقولي ليه الكلام دا بالنص وبعدين دا لازول مابتعرفيه ولا زول متقدم ليك ياداب دا زوجك ولو ماكسبتيه اسه بكرة حتجي وحدة وتشيلو منك وساعتها هو ما ملام لانك انتي الفكيتيه من يدك
قلت ليها انتي ماعارفة انو انا فعلا خلاص خسرتو ومن اول يوم اكيد هو ماحيصدقني
قالت لي جربي (حسيت نفسي ارتحت شديد وقررت اني لازم اعترف ليه والتبقى تبقى)
قلت ليها تخيلي انو قبل مايطلع مشى جاب اكل وعصاير عشان انا ما اتعب اعمل حاجة ونكون قاعدين بي راحتنا قالت لي زول زي دا بفرطو فيه
قمت ختيت الاكل وفطرنا واكلت اكل كنت جيعانة شديد وكنت حاسة نفسي اتفتحت للاكل وايمان تعاين لي وتتبسم قلت ليها مالك قالت لي الحب بعمل كدا 🤣🤣
قلت ليها حب في عينك 😒
وبعد الاكل قمت ظبطت قهوة وجبتها وكبيت ليها وكبيت لي نفسي عاينت لي كدا 😳 من متين بتشربي القهوة كمان
قلت ليها من اول يوم اتزوجت فيه 😶
قعدت تضحك وبأعلى صوتك وقالت بركاتك يا شيخ علاء ضربتها في كتفها وقعدت اضحك معاها
قلت ليها تصدقي حاجات كتيرة ماكنت بحبها يقيت أحبها
بعد شربنا القهوة واتونسنا قالت لي انا ماشة بعد دا قدر ماحنستها تقعد رفضت قالت لي مابقدر اقعد راجلك دا في اي لحظة ممكن يجي
قلت ليها هو مشى عندو ورق وحاجات بجهز للسفر قالت لي لازم تلحقي تتكلمي قبل السفر عشان ماتفقديه صدقيني الزول دا لو سافر تاني انسيه
ايمان طلعت واتصلت على علاء اشوفو وين
قال لي قريب من البيت خلصت قبيل بس قلت الا تتصلي عشان ما اجي ازعجكم قلت ليه تعال ايمان مشت خلاص شويتين وجاء داخل
قلت ليه عايزاك في موضوع مهم قال لي اتفضلي وخت الورق الكان شايلو في التربيزة قبل ما افتح خشمي عاينت في الورق شفت في تذكرة سفر
شلتها وقلت ليه دي شنو قال لي تذكرتي حجزت يوم السبت ان شاءالله يعني بعد ثلاثة ايام
انا حسيت كأنو في حاجة ضربتني في قلبي حسيتو حيتقلع من مكانو ليه كدا وانا كنت عايزة اعترف ليه اني بحبو وكنت عايزة اعوضو عن اي لحظة ظلمتو فيها بس يلا خلاص بعد دا مافضل شي يتقال
عاين لي قال لي مالك ساكتة منتظرك تتكلمي قلت ليه لا خلاص ماف حاجة قدر ماحاول يسألني رفضت اتكلم وبس قلت ليه بعدين ماتنسى ماشين ناس امي
واستأذنت منو ومشيت غرفتي وقفلتها علي وقعدت ابكي لحد ماحسيت حيغمى علي من البكاء
ياداب عرفت اني خلاص خسرتو خسرت اول انسان قلبي يدق ليه طول عمري كنت قافلة نفسي عسان خايفة اتوجع ولمن قلبي اتفتح لي انسان خلاص فقدتو
وقررت اني انساه واقفل قلبي على كدا واكيد هو يومو اليسافر من هنا ماحيشتغل بي تاني وطالما هو قرر السفر معناها قنع مني وانا فعلا استاهل لاني ماختيت ليه اي قيمة وجرحتو من اول يوم
في الوقت دا نمت من غير احس وماصحيت الا بي صوت الباب بدق بي قوة قمت مخلوعة شديد فتحت لقيتو دا علاء ومخلوع ياسمين انتي كويسة قلت ليه الحمدلله بس انت مالك مهجوم كدا في شنو
قال لي دقيت ليك الباب دا اكتر من مرة وما فتحتي حتى صوت ماعندك اتخلعت قلت يكون في حاجة قلت ليه اسفة والله بس كنت نايمة امس مانمت بالليل قال لي نوم العافية بس عليك الله تاني ماتخلعيني كدا
قلت ليه الساعة كم
قال لي خمسة
قلت ليه لاحول ولاقوة الا بالله انا نمت الوقت دا كلو لا ضهر لا عصر قال لي خلاص قومي صلي وانا جهزت الغداء عشان ما نتأخر على ناس عمي
من مكاني داك مشيت اتوضيت وصليت وقعدت ادعي ربنا يسهل لي علاء امورو
طلعت لقيتو فعلا مجهز الاكل قعدت بس ماكان عندي نفس نهائي وماحبيت اوضح ليه عشان مايقول في حاجة
شوية كدا وقمت قال لي مالك قلت ليه الحمدلله شبعت ماشة اجهز عشان نطلع