رواية ياسمين الفصل الثامن8 بقلم مروة الصافي
مشيت غرفتي وبقيت بتذكر في الحصل واكتر حاجة كانت غريبة علي انو لمن قلت امييييين لي دعوة خالتي ياربي انا فعلا ماعايزة حاجة تفرقنا انا وعلاء وهو شنو زاتو في شنو بربطنا غير القسيمة
شوية كدا وعلاء جاء داخل مديت ليه التلفون وشكرني على العملتو طبعا القرى ماف شمار بتدسى فيها قال لي ماكنت متخيل في ناس بالوقاحة دي انا اسف اني ختيتك في وضع زي دا بس انا ماكنت عارف هي منو والا كنت حا اتصرف براي معاها
قلت ليه ماتعتذر انت ماغلطان في حاجة ولا حتى عشمتها عشان هي تتعلق بيك بالطريقة المرضية دي
عموما انا عايزة نرجع بكرة قال لي البتحبيه اسه جهزي حالك نرجع بكرة من الصباح
ومشى كلم ناس امو وماشاء الله ماخلو حاجة ماجابوها عشان نشيلها معانا وجهزت حاجاتي وبعدها اتغدينا وقلت لي علاء اخر مرة لازم نمشي الخلا قال لي من غير تقولي كنت موديك
وفعلا مشينا ونحن في الشارع نشوف ليكم فلانة من شافتنا خلت الشارع واختفت انا وعلاء قعدنا نضحك
مشينا الخلا وقضينا وقت جميل هناك وجينا راجعين مع المغرب صليت ومشيت قعدت مع ناس خالتي واتونست معاهم مساااافة لحد ما العشاء اذن ومشيت صليت وجيت رقدت في غرفتي كنت مرهقة من اليوم الطويل دا
جاء علاء وقال لي اها جهزتي قلت ليه ماف حاجة الا الصباح نطلع بس
بنتكلم كدا نمت ما صحيت الا الصباح قمت سرعة صليت واتجهزت ولبنى جابت لي الشاي شربت واستنيت لحد ما علاء جاء وطلعنا وقدمونا لحد الباب والوداع بالدموع كان والحزن ووعدتهم اني حا زورهم كل فترة
يلا ركبنا العربية واتحركنا وطول الطريق شايفة علاء ساكت وحاساه شايل هم او في حاجة شاغلاه بس مافهمت في شنو وماحبيت اسألو مالو
وصلنا كافتريا كدا قلت ليه ممكن ننزل حاسة نفسي جيعانة طلبنا فطور أنا اكلت وهو كان بهبش في الاكل زي الخايف منو بالجد اتأكدت انو في حاجة قلت خلاص خلينا بعد نصل البيت وبشوف الحاصل عليه شنو
كملنا اكل واتحركنا ووصلنا البيت نزلنا وطلعنا الشقة ودخلت الغرفة ودخلت الشنطة وشلت الحاجات الجابوها لينا وديتها المطبخ
جيت لقيت علاء قاعد في الصالة وسرحان بعيد قعدت في الكرسي الجنبو وقلت ليه من نحن اتحركنا وانا حاسة بيك ماطبيعي زي الفي مشكلة او شايل هم حاجة ماعارفاك ممكن اعرف ؟
قال لي في قرار عايز اخدو وخايف منو ماعارف هل صح ولا مستعجل فيه
قلت ليه كدي قولو يمكن تلقى الحل عندي قال لي والله ماعارف اقول ليك كيف
سكت مسافة وانا بعاين ليه ومستنية يتكلم في النهاية قال لي ياسمين انا قررت ارجع قطر الاسبوع الجاي انا في لحظتها كانو صبت فيني مطرة حسيت بي وجع كدا غريب ماعارفة دا شنو الاحساس دا
قال لي اها رايك شنو قلت ليه في شنو قال لي السفر قلت ليه انت جادي يعني قال لي انا قررت بس لسه ماعارف انفذ القرار دا ولا لأ
قمت جارية دخلت غرفتي وقفلتها علي ومن غير احس بقيت ابكي ابكي 😭 😭 😭 😭 بي كل قوتي حسيت قلبي وجعني شديد سمعت الباب بدق خشيت الحمام وفتحت الموية خفت يكون حس بي حاجة غسلت وشي وعملت اني كنت بستحم
وجيت فتحت الباب قال لي انتي كويسة قلت ليه الحمدلله كويسة مالك يعني قال لي عشان جريتي فجأة استغربت في شنو
قلت ليه ماف حاجة بس حسيت نفسي مسخنة قلت اخد لي دش قال لي أها ماقلتي رايك حاولت اتماسك وما اظهر ليه ضعفي قلت ليه طبعا انت زول كبير وواعي وادرى بي مصلحتك
في اللحظة دي شفت حزن في عيونو ماطبيعي وانا من جوا حاسة بي الم شديد بس لازم يسافر واكيد لمن يمشي هناك حينساني واكون حققت العايزاه قال لي خلاص انا طالع شوية وبجي صراحة خفت عليه شديد قلت ليه ماشي وين قال لي طالع أشرب قهوة واجي ما بتأخر
وفعلا طلع وانا اول ما طلع انفجرت بالبكاء وماعارفة انا ببكي ليه اتصل على ايمان وانا ببكي قالت لي في شنو يابت قلت ليها علاء مسافر الاسبوع الجاي
قالت لي دقيقة دقيقة هم مسافر انتي المبكيك شنو قلت ليها والله ماعارفة نحن طبعا جينا الليلة من البلد اول ما وصلنا هنا كلمني انو قرر يسافر بعد دا
قالت لي ياسمين انتي حبيتي علاء؟
قلت ليها شنو ؟ لا طبعا ماف كلام زي دا
قالت لي الحالة الانتي فيها دي ماعندها تفسير الا انك حبيتيه وماهاين عليك يسافر يخليك
قلت ليها انتي بتقولي شنو طبعا اكيد بتستهبلي علب حب شنو كمان انتي عارفة رأيي في العرس دا من الاساس
قالت لي البتمري بيه دا شكلو الحب نفسو الانتي بتنكريه
قلت ليها هييي يلا مع السلامة انتي بديتي تخرفي اظنك
قالت لي عايني بكرة عايزة اقابلك تمام
قلت ليها طيب بكلم علاء اول وبوريك
وقفلت منها
بقيت أفكر في كلام ايمان واقارن بالحالة الانا فيها من ماقال مسافر واتذكر كيف كنت شفقانة عليه وهو عيان وكيف كنت بحس بي الغيرة لمن نادية كانت بتعاين ليه ناني قلت هييي ها دي اوهام ساي يابت ماف اي حاجة
علاء اتأخر وبالجد قلقت عليه شديد
اتصلت المرة الاولى ماف رد بالجد قلقت شديد رجعت ليه تاني رد قال لي جاي في الطريق ماتخافي
قفلت واستنيتو في الصالة لحد ما جاء واطمأنيت عليه لكن كان باين عليه حزن الدنيا وكان واضح انو ببكي حاول يدس مني بس واضح من عيونو
ختيت الغداء وقعدنا ماف واحد اكل حاجة وشلت الاكل زي ما هو
هو مشى رقد وانا دخلت غرفتي وتفكيري كلو بقى فيه مر اليوم حزين شديد بس قلت خلاص هو طالما قرر مامشكلة باقي الايام الفضلت لي اغير ليه مودو شوية نطلع نتفسح ونمشي ناس امي اهم شي اخليه يتذكرني بالخير ...