رواية وليد وسلمي الفصل السابع7 بقلم مروة الصافي
سلمى صحت بدري شديد وصلت الصبح وقرت شوية قران عبد الكريم نايم طبعا الصبح ماقام يصلي سلمى في نفسها ( احسن اكسب فيه اجر اصحيه يصلي)
مشت ليه: عبد الكريم .. عبدالكريم.. عبدالكريم صحى في شنو مالك بتصحيني بدري كدا
سلمى: لا ماف حاجة بس قوم صلي الصبح
عبدالكريم : انتي مش صليتي مالك ومالي بقوم على راحتي تاني مرة اوعك تصحيني لأي سبب كان
سلمى حست بي كسرة نفس: راحتك العلي عملتو
مشت عملت الشاي وشربت منو حبة ماقدرت تكملو من الضيق وفي نفسها ( اسه ي ابوي انا ذنبي شنو تعرس لي الراجل دا بس بقول كلو لي خير ودا نصيبي خلاص) ياربي وليد كيف اخبارو نفسي بس اعرف عنو خبر انا احسن اضرب لي مديحة واعرف خبرها شنو واخبار وليد
اتصلت لي مديحة:مديحة كيفك انا سلمى وبكت من غير ماتحس
مديحة:اهلا سلمى الحمدلله كويسة انتي كيفك
سلمى:مديحة انا ماكويسة( ولسه بتبكي)
مديحة:انتي وين ممكن نتلاقى
سلمى:انا ممنوعة من الطلعة ومن اي شي لكن لو لقيت طريقة بجيك لحد البيت. اها وليد كيف
مديحة:بقول كويس بس وليد اتغير كتير
سلمى:ربنا يسهل امورو
مديحة:بالمناسبة بكرة خطوبتي
سلمى:ماشاءالله ودا منو سعيد الحظ دا
مديحة :لمن نتلاقى بحكي ليك ان شاء الله يلا انا طالعة للجامعة بسجل رقمك وبتواصل معاك عشان اعرف اخبارك
في بيت ناس وليد...
وليد: ( الليلة الخميس والجامعة انتهت وماعندي اي حاجة ياربي بعد صليت ماجايني نوم ليه قلبي دا مامرتاح نهائي يارب خير)
حجة فاطمة: ولي الليلة ماقلت ماعندك جامعة المصحيك بدري شنو
وليد: ي حجة ماجاني نوم بعد مشيت الجامع وجيت ماقدرت انوم تاني
حجة فاطمة: خلاص قوم اشرب الشاي وودي اختك المدرسة وتعال
وليد: حااااااااضر
حجة فاطمة: يحضر ليك الخير اصلك من يومك ود رضى ومابتزعل زول ربنا يديك لمن يرضيك عافية منك وراضية عليك رضايا يخدرك ويكترتك ويغزرك ويقضي حوايجك ويهل امورك
وليد: ياسلاااام الواحد بعد يسمع الكلام دا بتتفتح في وشو اكيد
يلا امشي اجيب بسكويت واجي
مشى الدكان وجا وشربو الشاي ووصل اختو المدرسة وجا راجع بس برضو قلبو ماكلو شديد في شنو ماعارف...
سلمى سارحة وبتتذكر في وليد فجأة دخل عبد الكريم: سلمى
سلمى: اي ي وليد
عبدالكريم: وليد. وليد دا منو كمان ايوااااا دا المخليك تتجنني علي صح
سلمى: معليش ماعارفة الاسم جا كيف
عبدالكريم: بتعرفي كويس سريع وليد دا منو
سلمى: قلت ليك مابعرف
عبدالكريم ضربها كف
سلمى بكت شديد وحست وقلبها حيقيف الحزن و من فراق وليد كمان يقوم دا يضربها
عبدالكريم: سلمى سلمى انا اسف ماعارف عملت كدا كيف
سلمى قبلت منو
وهو مصر انها تسامحو بس نهائي ما اتلفتت عليه عبدالكريم طلع الشغل وسلمى غرقانة في الدموع ...
وليد عرفنا المخلي قلبو ياكلو شنو لحظة الكف حس زي الجاتو طعنة في قلبو بس بقول يارب خير يارب خير
وليد اتصل على مديحة: العرووووووس صباح الخير
مديحة: متين هو ههههههههه صباح النور
وليد: اها التجهيزات ماشة كيف
مديحة: تجهيزات وين انا في الجامعة عشان انت بقيت عاطل يعني
وليد: ياخ انا زاتي طاشي الليلة
خلاص اخليك برجع ليك بعدين
مديحة : وليد سلمى اتصلت علي
وليد: مش قلت ليك ماعايز اسمع اسمها
مديحة : خلاص اسفة يلا مع السلامة
وليد قال ياريت لو كان سالتها من سلمى وقالت ليها شنو يلا كدا احسن عشان انساها لبس وطلع ماشي على مصطفى حجة فاطمة : ماشي وين
وليد: ماشي على مصطفى انا وريتك ي امي مصطفى بكرة حيمشي يتقدم لي مديحة
حجة فاطمة: يا سلاااااام والله الاتنين اولاد حلال وبتشابهو في اي حاجة
وليد: فعلا ي امي
حجة فاطمة: عقبالك اشوفك انت عريس
وليد: ي حجة قولي دكتووور كبييير كدا
حجة فاطمة: ومالو دكتور وعريس
وليد: امين (في سرو هو في بت تستاهل غير مديحة ياريت لو القى وحدة زي مديحة)
وليد طلع ومشى لي مصطفى
مصطفى: ي ولي كيفك
وليد: الحمد لله انت كيف ي عريس
مصطفى: يسمع منك ربنا ماعرف يوم بكرة دا ماعايز يجي ليه
وليد: ي عمك ابرد هانت طيب انت حاتصبر سنة كيف هههههههه
مصطفى : كان ما وعدت مديحة كان اقول العرس الشهر الجاي
وليد: والله ي مصطفى ربنا بحبك شديد مديحة دي لو في منها اتنين كان البلد دي اتعدلت ياخ نفسي القى بت زيها
مصطفى: الفضل برضو يرجع ليك ي وليد ماعارف اجازيك كيف بس انت اتخرج واعمل خدمتك وانا عندي قريبي عندو مستشفى خاص اخلي يشغلك
وليد: تكون خدمتني والله
مصطفى: ان شاء الله
يلا الفطور
وليد: فطور من 10
مصطفى : مالو ياخ نفسي مفتووووووحة
وليد : ان شاء الله دايما
مصطفى: عقبالك يلا قوم
فطرو ووليد قعد شوية ورجع البيت
مشى اليوم طويل على الكل وسلمى لسه بتبكي وكل ماتتذكر وليد بتبكي اكتر...
واخيرا جا اليوم المنتظرنو مصطفى ومديحة
رقية (والدة مديحة) : محمد قوم جيب لينا الحاجات الفي الورقة دي سريع الليلة الجمعة والمحلات بتقفل بدري
محمد: حاضر ي امي
مديحة: ي امي ماتتعبو ماتجيبو حاجات كتيرة ماف داعي للتبذير اصلا هو تعارف ساي
رقية: ي بتي انا عندي كم مديحة والحمد لله الحال ميسور ابوك الله يرحمو كان بتمنى يشوفك عروس
مديحة: الله يرحمو انا نفسي يكون معانا بس الحمد لله ...
مصطفى: ي حجة اها بشيلو شنو عشان امشي اجيبهم
امال: بارد وحلاوة وقروش اسمها قولة خير وبعد يوافقو تشتري الشبكة وكريمات ولبسات للعروس
مصطفى: خلاص اسه بمشي بجيب الحلاوة والبارد