رواية ياسمين الفصل السابع7 بقلم مروة الصافي
وانا بفكر في تنفيذ الخطة علاء جاء داخل شايل معاه حاجة مغلفة سلم وقعد قال لي شايفك قبيل عند ناس خالتي كنتي متضايقة حتى الاكل ما اكلتي انا متابعك حسيتك ما مرتاحة
قلت ليه بس كنت حاسة لي بي صداع عشان كدا ماقدرت اكل او اكون بي راحتي في الونسة قال لي عشان كدا مشيت الظلط برا وجبت ليك الاكل دا مخصوص
قلت ليه ليه تعبت نفسك انا شبعانة قال لي ياهو اكلك القبيل دا انا كمان لمن شفتك متضايقة ماقدرت اكل واسه انا جيعان لو مابتاكلي معاي بودي لي ماس البيت واجي ارقد ساي
امممممم خلاص باكل وجا شايل سمك وانا صراحة لي زمن فيه سبحان الله هو كان فيه حنية ماعادية كان بنضف لي السمك من الشوك وانا بعاين ليه ياربي انا فاقدة الاحساس لي الدرجة دي انسان بعمل عشاني اي شي وانا بعاملو بالطريقة الكعبة دي
قلت ليه شكرا (وكان في بالي اني بقول ليه شكرا انك في حياتي بس ماحبيت اوضح ليه عشان ما اعلقو فيني وانا اساسا ماعندي مشاعر تجاهو)
قال لي بتشكريني على شنو قلت ليك انك بتنضف لي في السمك
قعد يضحك وقال اي أقل واجب المهم اكلنا واول مرة اكل بي شراهة كدا قمت غسلت يديني وجيت رقدت في الكنبة قال لي شايفك اتعودتي انا خلاص بقيت كويس بعد دا تنومي في مكانك
قلت ليه كويس وجيت رقدت ونمت صحاني علاء لي الصبح وحسيتو متوتر قلت ليه مالك في شنو حكى لي انو في وحدة مكرهاو بالرسايل ورسايل حب وغرام قلت ليه ماتشتغل بيها احظرها بس قال لي حظرتها وكل ما احظرها تدخل بي رقم جديد
وامس اخر ما اتزصلت ليه قالت لي كان ما اتجاوبت معاي بحرق ليك وش مرتك العاجباك دي وانا ماعارف هي منو وبتعمل كدا ليه
قلت ليه ان شاء الله تاني ما بترسل ليك قال لي عرفتي من وين قلت ليه ممكن تديني تلفونك زي الضهر كدا وحتعرف كل حاجة قدر ماحاول يفهم ابيت اوريه
المهم قمت كن مكاني داك صليت ورتبت الغرفة ومشيت جبت الشاي وجينا شربنا
وهو طلع وانا ناديت لبنى وحكيت ليها على كل الحاصل وطلبت منها تساعدني
وهي وافقت طوالي وطلبت منها تتصل عليها وتقنعها انها تجي عشان لو ماجات معناها خطتي فركشت
المهم عدى اليوم تقيل ولا انا عشان راجية لي موضوع ماعارفة وجا الضهر والنسوان بدن يجن وماشاء الله الجات شايلة كيك والشايلة لقيمات والشايلة بلح شام يعني بالجد عزوني عزة شديدة وزولتنا جات وشايلة ليها كيك شوكلاتة واختها نظام تلفت الانتباه نادية هي العملت الكيكة دي واصلا هي ماشاء الله مبدعة في المطبخ واي شي بتعرفو
قلت ليها كويس عشان لمن تعرس تقدر تمسك بيتها ومطبخها وانا بعلين ليها وهي تلولو في خشمها
لبنى قالت نحن طبعا اي وحدة من صغيرة بعلموها الطبيخ والنضافة عشان تعرف تفتح بيت ولمن يجي يتقدم ليها الراجل ويطلبها من بيتها واهلها تكون جاهزة وغمزت لي انا ابتسمت
اها طبعا عندهم وحدة خبيرة قهوة ولعت النار وقلت البن ودقتو والونسة مدورة انا ولبنى جبنا العدة ورصينا الحاجات وقسمناها على النسوان والقهوة جهزت وكمان كبيناها وقسمناها وكانت احلى قعدة رغم اننا ناوين نختمها بي مشكلة بس صراحة كانت قعدة حلوة
غمزت لي لبنى عشان تقوم تجيب التلفون جابتو وجات ادتني ليه بالدس وانا بي تحت التوب اتصلت على الرقم الكان براسل علاء
وفعلا تلفون نادية ضرب ولمن عاينت انو علاء هو الضارب اتخلعت ونططت عيونها وبقت تتلفت وانا متابعاها
قامت شالت التلفون وطلعت برا وردت وانا ختيت التوب وفتحت الاسبيكر عشان الناس كلها تسمع واتفقت مع لبنى تشغل اخت نادية
المهم سلمت عليها وقلت ليها ممكن اعرفك منو انا ماعندي مانع الاقيك في اي مكان بس وريني انتي منو وليه عايزة تحرقي وش مرتي
قالت لي عشان انا بحبك طول عمري وانت عمرك مافكرت فيني ماعندك غير ياسمين ياسمين اسه هي احسن مني بي شنو
قلت ليها طيب انتي منو انا لحد الان ماعرفتك يمكن تكوني عاجباني من زمان بس مالقيت منك تجاوب وخليتك قلت ليه انا نادية بت خالتك خديجة وهدا انت عرفت حتعمل شنو
قلت ليها طيب مش كان افضل تكلميني وش لي وش ماهدا انا قريل في نفس البلد بدل الجرجرة دي وتهددي بي حريق وش ياسمين
قالت لي تاني رجعت لي ياسمين قلت ليها ما انتي هددتي عشان كدا قالت لي اي هددت وبهدد تاني لو ما اتجاوبت معاي حا احرق وش مرتك والتبقى تبقى
زحيت التوب واتكلمت ليها بي صوتي وقلت ليها بي تهديدك دا ممكن امشي افتح فيك بلاغ وشهودي ٢٠ نفر هديل كلهم حاضرين وسمعو كل كلامك وتهديدك
بالله قفلت الخط وجات طايرة لقت الناس قلهن قاعدات وبعاينو ليها بي اشمئزاز قلت ليهم شايفين الحصل شنو الزولة دي كانت عايزة علاء بأي شكل تحرق لي وشي ولا تعمل اي شي غلط عشان تصل لي علاء
وانا عشان البلد والناس الطيبين الفيها ما حاعمل ليها حاجة بس كفاية عليها الفضيحة الاتفضحتها قدام الناس والخجلة الخجلتها والنسوان كل وحدة تديها كلمة وخسارة التربية الاتربتها
قلت ليها تتذكري لمن قلتي لي اتأدبي اها شايفة تربيتك الاتربيتيها وفضيحتك قدام الاهل والجيران هدي مكانتك البتستاهليها خالتو فاطمة بقت تعتذر لي بالنيابة عنها
قلت ليها انتي خالتي وبحترمك شديد وكلامك على عيني وراسي واصلك ماتعتذري لي وحدة زي
وكل الناس بقو بعتذرو بالنيابة عنها وزعلانين شديد من حركتها
قلت ليها الوحدة لو قعدت معززة مكرمة نصيبها بجيها لحد عندها بس تقعد تقابض في الرجال وترمي نفسها عليهم اكيد ما بعاينو ليها نظرتهم ليهم انها خفيفة ودا شين في حق اي بت
لمن الكلام كتر عليها طلعت طوالي مشت بيتهم ونحن واصلنا ونستنا واعتذرت ليهم من الحصل دا بس كان غصبا عني اني اكشفها قدام الجميع عشان تعرفو هي كانت ناوية على شنو
وانا عايزة اسافر ومايكون في جوا زول حاجة مني ويشهد الله عشت معاكم احلى ايام وان شاء الله تاني حا اجي كتير كل ما احس اني زهجانة بجيكم حتى بعد علاء يرجع ان شاء الله وشكرتهم على القعدة الجميلة
اها ودعونا وطلعو وانا مسكت لبنى وشكرتها على المساعدة وخالتو فاطمة اتكيفت مني وقالت لي يا بتي ربنا يحفظكم ويبعد عنكم اي شر واي زول عايز يفرقكم من غير احس قلت ليها امييييييين