رواية ياسمين الفصل السادس6 بقلم مروة الصافي
طلعنا مشينا الخلا لفينا مسافة صراحة انا كل ما امشي بحس بي راحة نفسية لقينا ناس من الاهل سلمنا عليهم وقعدنا نتونس مساااافة لحد ما الساعة جات اتنين
علاء قال بي يلا نرجع نسيتو عمي محمد ولا شنو قلت ليه تصدق لمن اجي هنا مابحس بي روحي ولا الزمن ارح سريع عشان مايقول الناس ديل ماعايزين يجوني
رجعنا البيت واتجهزنا ومشينا بيت عمو محمد الله على الاستقبال وعلى الكرم والراحة الفي بيتهم مرة عمي واولادها واخواتها ياسلام عليهم
عشنا معاهم ساعات كنت بتمنى ما تنتهي خالص
خلص اليوم ونحن راجعين في الطريق اشوف ليك نادية ومعاها وحدة وجايين علينا انا اتوترت منها وماحسيت الا وانا بمسك يد علاء هو زاتو لمن اتخلع
لمن وصلو سلمو علينا ومشو ونحن واصلنا في طريقنا وقمت بسرعة فكيت يدو عاين لي وسكت ما اتكلم وانا اتحرجت شديد من الحركة دي ومشيت سريع سريع وصلت قبلو سلمت على ناس البيت واستأذنتهم تعبانة
مشيت بيتنا ودخلت الغرفة وبقيت بتذكر الحركة العملتها دي واسه هو بفكر في شنو لازم اشغلو عشان ينسى الحاجة دي يعد شوية جا دق الباب قلت ليه اتفضل دخل وقعد في الكنبة عايز يتكلم كدا تلفونو ضرب رد الو الو الو ماف زول بتكلم
قفل تاني الرقم اتصل برضو ماف زول يتكلم المهم زهج وعمل التلفون صامت ورقد قلت ليه حتنوم قال لي تعبان شوية قلت ليه طيب
نام كدا اشوف ليك تلفونو منور قلت اشوف المتصل منو عاينت رقم غريب مع اني مابحب ارد على تلفون زول بس جاني حب استطلاع اعرف دا منو
رديت الو اسمع ليك وحدة باقول لاصقة فيه النهار كلو حتى التلفون ما مدياه فرصة فيه خلي لينا شوية انا بقيت مخلوعة و قلت ليها انتي منو اول شي وتاني شي اتكلمي معاي بي ادب قالت لي اتأدبي انتي اول اجي يا الاتأدب انا انتي عارفة منو طوالي قفلت الخط
راسي بقى يودي ويجيب دي منو وليه اتكلمت معاي بالاسلوب دا وعلاقتها بي علاء شنو والمشكلة مابقدر اسألو من الموضوع دا لاني انا الفتحت الخط وهو كان نايم واصناء ما انا بفكر المغرب اذن صحيت علاء لقيت جسمو ناااار
جريت عبايتي سرعة وقلت ليه يلا نمشي الدكتور في الاول رفض بي بعد اصرار مني قام قلت لي لبنى ارح معانا المركز مشينا وقايلنا الدكتور وكتب ليه كم فحص كدا عمل الفحوصات
ونحن راجين النتايج تطلع اشوف ليك المابتغباني جات داخلة وكنزشافتنا جات تتظارف وتتكبكب خير مالكم في ڜنو اناما رديت ردت لبنى انو علاء عيان وفحصنا ليه ومنتظرين النتيجة قالت كر علي ماكان كويس قبيل مالو فجأة
اصلي ما اشتغلو بيها بالجد كان شاغلني مرض علاء
البت جابت النتايج وندهت اسم علاء شلنا النتيجة ودخلنا الدكتور طلعت عندو ملاريا كتب ليه علاجات ومسكن
اها رجعنا البيت ومشينا غرفتنا قلت لي لبنى جيبي ليه لبن عشان اديه الحبوب
جابت اللبن في الاول رفض قال ماعايز وبطنو طامة المهم حنستو شربو وبلع الحبة وقال عايزة يصلي المغرب والعشاء صلى وجا رقد في الكنبة عملت ليه مكمدات واديتو المسكن بلعو الحمى نزلت شوية
حنيت عليه قلت ليه ارقد في السرير رفض وقال لي انتي حتنومي وين قلت ليه بتصرف بس انت ارفد في السرير ولز رفضت انا برقد في الارض
سمع كلامي ورقد في السرير شوية كدا وغرق في النوم وانا جريت الكنبة جنب السرير ورقدت فيها وظبطت المنبه عشان مواعيد الحبوب
ومن التعب نمت ماصحيت الا على هضربة علاء قمت مخلوعة لقيت جسمو نار صحيتو واديتو بندول وعملت ليه مكمدات وفضلت صاحية لحد ما زمن الحبوب جاء صحيتو اديتو لبن ومعاه الحبة شرب اللبن وبلع الحبة وكان خلاص الصبح حيأذن قام اتوضأ وجا صلى ركعتين اول وقعد مسافة يقرأ قران وطبعا بي صوتو الرهيب داك
لحد ما اذن الصبح وصلى وجا رقد قال لي انتي صاحية من بالليل ولا شنو عشان ما احسسو بي حاجة قلت ليه صحيت بالمنبه
قال لي ممكن تديني التلفون جبتو ليه فتحو ونزلت ليه رسايل كتيرة وانا عندي الفضول حيقعلني نفسي اعرف من منو بس ماوضحت ليه
انا طبعا مسحت المكالمة عشان ما يقول بتجسس عليه .
المهم عدى يومين علاء بقى كويس ودورنا للعزومات تاني وكان الرقم دا بتصل عليه على طول لحد ماحظرو من المكالمات في النهاية بقت تجيه رسايل من الرقم زاتو
في يوم ونحن معزومين وطلعت العازمانا اخت خالتو خديجة ام نادية لمن مشينا لقيت العارض دي قاعدة كالعادة مابتخلينا في حالنا
وانا واقفة بتكلم في التلفون هم ماشافوني نادية وبت خالتها بتكلمو قالت ليها دي مابتقدرو عليها دي واضح انو بحبها شفتي بعاين ليها كيف
قالت ليها نحن عملنا خطة وشلنا رقم علاء من نلفونو يوم كنا عازمنهم وشلناه عشان نشككها فيه
انا قلت اهاااات يعني الكانت بتتكلم معاي دي انتي اصبري لي بس بأدبك وقدام الما حافضحك واخلي الحلة كلها تعرف قلة ادبك والايام بينا
مشيت سريع سريع عشان مايحسو بي وقعدت جنب علاء
عدى الوقت تقيل شديد لحدي ماجابو الاكل واكلنا طبعا الاكل غلبني وقاعدة على جمر متين نطلع
المهم اليوم بي خيرو وشرو عدى ونحن راجعين علاء قال لي اها نرجع متين قلت ليه خلينا نقعد بكرة وبعد بكرة وبعدو نسافر قال لي طيب
انا طبعا في بالي لاااااااازم في اليومين ديل افضحها واخليها تعترف قدام الناس بالناوية تعملو بس لازم القى زول يساعدني قلت علاء تاني قلت لا ماعايزة الفت انتباهو لي اي حاجة بس ماف الا لبنى
وصلنا البيت وغيرت ملابسي وجيت قعدت مع خالتو فاطمة ولبنى وشربت معاهم احلى قهوة
خالتو فاطمة قالت لي بالمناسبة دي نسوان الحلة قالن بكرة جايات يشربن معاك الجبنة قلت في سري بس دي الفرصة المناسبة لفضح نادية
قلت ليها ان شاء الله نحن زاتنا بعد دا خلاص حنرجع بعد دا تكون وداع
رجعت غرفتي وبقيت افكر في خطة عشان اخليها تعترف براها قدام الناس وتقول كانت ناوية انها تفرقنا انا وعلاء ولقيت خطة جهنمية 👌