رواية ياسمين الفصل الخامس5 بقلم مروة الصافي
خلصنا غداء وقمت اغسل يدي خشيت الحمام اسمع ليك الاخوات الاتنين بتكلمو وحدة قالت للتانية اسه دي احسن مني بي شنو عشان يخليني ويعرسها
اختها قالت ليها ضفرك بس بي رقبتها ولا يهمك اصبري بس نطفشها ويرجع ليك مزلول زي الكلب
قالت ليها شوفي خالتك وبناتها بعاملوها كيف دي مابنقدر عليها قالت ليها اصبري بس انتي
جيت طالعة لمن اتخلعن بس ماحسستهم اني سمعت عشان افهم عايزين يعملو شنو
ناديت لبنى اخت علاء ومشيت غرفتي استنيتها هناك بعد شوية جات وشايلة الشاي قالت لي مالك ماجيتي للشاي قلت ليها كدي خلينا من الشاي اسه عايزاك في موضوع
قالت لي اها قلت ليها بت خالتك دي مالها معاي من قبيل حسيت نظراتها ماياها (ماحبيت اقول ليها الكلام السمعتو )
قالت لي قصدك نادية قلت ليها مابعرف اسمها بس الصغيرة تقريبا قالت لي ياها نادية
قلت ليها اها مالها قالت لي حاوريك بس ماتسألي علاء قلت ليها طيب قالت لي علاء كان جاء قبل سنتين كدا وهي من شافتو علقت فيه وهو نهائي مامديها وش كان وماخلت شي ماعملتو عشان تلفت انتباهو بس هو ما اشتغل بيها واسه لمن شافتك النار انطلقت فيها
قلت ليها معقول وحدة تتعلق بي زول من غير ماتلقى منو اشارة قالت لي والله علاء دا من يوم قمنا سمعناه عايزك انتي بس وبنات الحلة ديل كلهن عارفات كدا
قلت ليها اهاااااا ابتسمت وسكت
قالت لي زي ما قلت ليك سر علاء مايعرف قلت ليها طيب قالت لي بتقدري تطلعي اسه قلت ليها وين قالت لي نمشي الخلا قلت ليها كويس
لبست لي عباية وطلعنا وطبعا ماشاء الله الشارع كلو يسلم ويعرفوني عليهم في البوقفوني انا فلانة ببقى ليك كدا وانا فلان ابوك ود ماعارفة شنو
وصلنا الخلا ماشاء الله الزراعة والبقر والاغنام حياة رهيبة والطبيعة دايما تفوز بتعجبني جدا استمتعت شديد بالكلعة دي قلت ليها لازم كل يوم العصر نجي هنا
قاات لي طوالي بس راجلك دا مايقوم يشغلها لينا وقعدنا نضحك ونحن راجعين اشوف ليك علاء جاي من هناك ومعاه شباب سلمو علينا ومشو جاتني لفتة لقيت علاء متلفت بعاين لي لحد ما دخل في الطين القدامو
انا غايتو ضحكت ضحك ماطبيعي😂😂😂😂😂 وهو صر وشو وبدل يواصل رجع البيت بي سرعة فاتنا نحن مسافة حتى وصلنا البيت لقيتو مستنيني جنب غرفتنا اول ماشفتو اتفقعت بالضحك وهو بس عامل 😡
قلت ليه براحة وشك بقع منك قال لي ادخلي اديني غيار عشان الحق المغرب قلت ليه طيب وانا اشيل واضحك
اديتو غيار مشى الحمام غير وطلع مشى الجامع . بعد صليت المغرب انا مشيت قعدت مع ناس خالتو فاطمة ولقيتهم بعملو في فطير قعدت اشوفهم بعملو كيف واتونسنا مسافة لحد العشاء جا قمت صليت وجيت لقيتهم عملو لي الفطير باللبن انا اول مرة اضوقو ماحصل اكلتو لقيتها وجبة حلوة شديد
بعد اتعشيت رسلت لي علاء قلت ليه انا نعسانة ممكن تجي بعد دا ما تمت خمسة دقايق جاني قال لي ارح
مشينا بيتنا قال لي انا تضحكي فيني قلت ليه لو ضحكي زعلك اسفة جدا قال لي لا عادي
المهم اتونسنا شوية وقلت ليه انت حتنوم وين قال لي في الكنبة دي قلت ليه كويس انا رقدت وماحسيت بي روحي من التعب نمت للصبح كدا علاء صحاني قال لي انا ماشي الجامع وانتي رتبي البيت عشان مايجي زول ويفهم حاجة
طلع وانا قمت سريع سريع رتبت الحتة وقمت صليت وجيت رقدت تاني وبقيت افكر مهما ضايقتو هو بتعامل معاي كدا ليه ليه مابتضايق من تصرفاتي معاه ليه دايما حنين كدا ومابهمو شي الا اكون مرتاحة
وانا بفكر كدا علاء جاء داخل سلم وقعد قال لي اها يا ياسمين رايك في البلد وهل نقعد لينا كم يوم ولا نرجع
قلت ليها خلينا نقعد اسبوع كدا انا حبيت البلد شديد وعايزة ازور الناس بيت بيت قال لي طيب انا سعيد انك مبسوطة ابتمست و
(قلت في سري انا اول مرة احس بي اني فرحانة انك مبسوط اول مرة احس بي انو امرك بهمني) قال لي سرحتي وين قلت ليه ماسرحت بس بفكر ليه انا ليه لي زمن طويل ماجيت البلد واستمتعت بي الطبيعة والحياة الهادية دي
قال لي مامشكلة كل فترة والتانية بعد اسافر تعالي قلت ليه تسافر؟ قال لي اكيد لازم ارجع لي شغلي يوم
قلت ليها اها وحسيت بي ضيق كدا من قال اسافر دي قال لي مالك قلت ليه ماف حاجة واثناء مابنتكلم باب الحوش دق طلع علاء لقاهم جايبن الشاي باللقيمات قدر ما اقول ليكم الناس ديل كريمين كيف ماتتخيلو كل وحدة جاية بي صبارة شاي وكل وحدة عايزة يشربو الشاي حقها
المهم بعد شربنا الشاي علاء قال لي خالتي خديجة عازمانا فطور قلت ليه ام نادية قال لي ايوا قلت ليها امممممم قال لي مالك قلت ليه ماف حاجة (قلت النسوان ديل عايزين يعملو فينا شنو كمان بالسرعة دي عازمننا فطور كمان )
قلت ليه خلاص قبل نطلع بي ساعة كدا وريني عشان اجهز قال لي معناها اجهزي اسه الناس هنا بفطرو بدري قلت ليه اللقيمات لاسه ماهضمتها ندخل في برنامج فطور
المهم بعد طلع كلمت لبنى وصريت انها تمشي معانا وفعلا جهزنا ومشينا ومن دخلنا نادية قامت على الحركات حقتها وتلولو في خشمها وكمان تتراشق قدام علاء وهو لمن شاف حركاتها قام من مكانو وجا قعد جنبي انا عاينت ليه وابتسمت
(الحركة دي برغم بساطتها بس معناها كبير عندي ويمكن دا سبب من اسباب التغيير تجاهو بقت نظرتي ليه مختلفة )
ختو الاكل وقعدنا اكلنا علاء خت تلفونو في السرير وهو طبعا ما نوع الناس البعملو رمز للتلفون
يلا منى اخت نادية شالت تلفونو ورنت في تلفونها وحفظت الرقم وطبعا عايزة تعمل مصيبة
المهم اكلنا وشربنا عصير وشاي وشكرتهم على العزومة وطلعنا رجعنا البيت وانا ساكتة وبس بفكر في علاء وفي الحاجات البعملها تجاهي وانا ولا يوم حسستو انو مهم بالنسبة لي حسيت قدر شنو هو انسان كويس
وصلنا البيت كدا خالتو فاطمة قالت لينا عمكم محمد قال ليكم تجو تتغدو معاه طبعا اهلنا ديل مابقبلو عذر نهائي قلت ليهم خلاص طيب نطلع نلف شوية عشان نهضم الفطور ونستعد للغداء قعدو يضحكو علاء قال لي خلاص ارح نمشي نزور الاهل قلت ليه كان مشينا ياداب الماحنقدر نهضم اكيد اي مكان نمشي حيضيفونا بي حاجات خلينا نمشي الخلا
قال لي كويس