رواية ياسمين الفصل الرابع4 بقلم مروة الصافي
وصلنا الشقة وهو على غير العادة صامت ومافتح خشمو نهائي حسيتو متضايق شديد مني بس عادي ماكان هاميني او ما كنت بفهم
دخلت غرفتي وغيرت ملابسي ورقدت بس خالص ماجاني نوم ماعارفة في شنو مسكت التلفون وقعدت ادردش مع ايمان وحكيت ليها بالحصل ايمان قالت لي يعني بقينا نغير قلت ليها غيرة😒 اكيد ماجادة
قالت لي طيب ليه اتضايقتي لمن البت كانت بتعاين ليه قلت ليها لأني معاه مامفروض وحدة تتجرأ تعاين ليه بغض النظر عن علاقتي معاه شنو
المهم دردشنا مسافة وختيت التلفون. استغربت انو علاء نهائي ما جاء ولا عندو حس طلعت اشوفو لقيتو راقد وماسك تلفونو وبدردش في الواتس حاولت اشوف بتراسل مع منو ماقدرت وهو زاتو لمن شافني قفل التلفون وجرا الغطاء وقبل مني
صراحة الحركة دي استفزتني شديد كيف يعمل معاي كدا جريت دخلت اوضتي وقفلتها علي وقعدت في السرير وبفكر في شنو وانا مالي كنت عايزة اعرفو بتكلم مع منو وليه اتضايقت لمن قفل التلفون
رقدت في محلي داك وبفكر لحد مانمت وماحسيت بي روحي الا الصباح قمت خشيت الحمام واتوضيت وصليت وطلعت لقيت علاء لسه نايم على غير العادة صحيتو قوم صلي قال لي صلاة شنو انا صحيت مع الصبح صليت وجيت نمت تاني .صباح الخير قلت ليه صباح النور خلاص قوم عشان عايزة اعمل الشاي
مشيت المطبخ وعملت الشاي وجبتو لقيتو ماف افتكرتو في الحمام مسافة ما طلع
بعد شوية فتح باب الشقة وجا داخل شايل معاه كيك شربنا الشاي بالكيك واثناء ماقاعدين قلت اشاغلو لانو كان جامد من امس
قلت ليه ماشاء الله امس شايفاك تدردش دي منو سعيدة الحظ دي عاين لي 🫤 وواصل في الشاي ما رد علي بعد كمل حتى قال لي ضروري تعرفي بتراسل مع منو
قلت ليه لأ طبعا بس بشاغل فيك ساي قال لي اهااااا تمام
الغريبة اتضايقت شديد ماعارفة ليه امرو بقى بهمني كدا وعدينا على الحال دا اسبوعين ياهو نفس الشي
وانا قاعدة في غرفتي علاء دق الباب قلت ليه خش قال لي اتصل علي ابوي وقال عازمنا في البلد رايك شنو قلت ليه حلو والله على الاقل نكون غيرنا جو وانا لي زمن مامشيت بلدنا
شفت الفرحة في عيونو قال لي طيب نسافر متين قلت ليه لو بكرة مامشكلة بس انا ماعندي طرح اها اسافر بيها
قال لي خلاص اسه نمشي نجيبهم وين المشكلة
فعلا طلعنا مشينا السوق وطقمت طرح لي لبساتي الماشة بيهم والشايلاهم واحنا راجعين قلت ليه ممكن نفعد في مكان نشرب لينا قهوة قال لي حااااااضر بس متين بقينا نشرب القهوة
قلت ليه ماعايز ارح نمشي البيت طوالي قال بهدر معاك ياخ
مشينا شارع النيل وقعدنا وكانت قعدة ظريفة وهادئة
قال لي نشيل لينا غداء جاهز قلت ليه لا نشيل حاجة خفيفة اعملها وخلاص اساسا بكرة مسافرين ماف داعي نشبل حاجو كتيرة
قال لي نسافر بالعربية ولا البص قلت ليه العربية اكيد ماف داعي للتأخير قال لي طيب
غشينا سوبر ماركت شلنا سجوك ومشينا البيت دخلت غيرت وجيت المطبخ عملت السجوك وطلعت شايفة علاء طلع ليه شنطة صغيرة كدا وبخت فيها غيارات قلت ليه بالمناسبة دي نحن حنقعد كم يوم قال لي البريحك بس
قلت ليه عشان اعرف اشيل كم غيار قال لي شيلي كم حاجة يمكن الحال يعجبنا ونقعد كم يوم ق
قلت ليه طيب بس انت اسه اتصل وريهم نحن جايين بكرة عشان يكونو عارفين وكنت متحمسة لي موضوع السفر شديد وفعلا جهزت شنطتي وقفلتها وكنت مستنية الصباح بي فارغ الصبر يجي
وصحيت من اذان الصبح وصليت ودخلت المطبخ عملت الشاي وجيت اتجهزت وكنت مبسوطة حاسة علاء فرحان شديد عشان شايفني سعيدة
نزلنا ركبنا العربية واتحركنا وطلبت منو يشغل حاجة عشان الطريق طويل قال لي جدا وشغل اغاني لي ود الامين ويغني معاه ساي وانا شوية اعاين ليه وشوية اعاين للطريق
قلت ليه ما قربنا قال لي خلاص نحن في دخلة الحلة
قمت طلعت مكياجاتي وظبطت مكياجي وهو يعاين لي ساي
قلت ليه بتعاين مالك عروس لازم اكون مجيهة قال لي عروس؟ 🙂
ما تتخيلو وقع الكلمة دي كان صعب علي كيف حسيت قدر شنو كنت ظالماه معاي بس اعمل شنو انا لفيت نفسي في دوامة فجأة من غير يكون عندي فيها يد
ماحبيت اتناقش معاه قلت ماف داعي اسه بعد نرجع بعرف اتكلم معاه
المهم وصلنا البلد ومشينا على بيتهم طوالي استقبلونا احسن استقبال وضب*حو لينا ماشاء الله
انا دخلت على بيت النسوان وهو مشى الصالون مع الرجال ماتتصورو كنت مبسوطة كيف كمية الحب اللاقوني بيها مرة عمي وبناتها وجو الاهل والجيران سلمو علي وقعدنا نتونس ونضحك صراحة حسيت بي راحة نفسية
شوية وجو داخلين بالفطور فطور ناس عمي والجيران كل وحدة جات شايلة حاجة ماشاء الله كرم وحب ماطبيعيات وكل وحدة تعزمك على اكلتها الجابتها وبعد الفطور الشاي والقهوة وبعد كدا كل وحدة شالت عدتها ومشت البيت فضى علينا انا ومرة عمي وبنات عمي
قالو لي شكلك تعبانة من المشوار نحن جهزنا ليكم غرفة بي حوشها وحمامها عشان تاخدي راحتك قلت ليهم والله حاسة بتعب شوية وعايزة اخد لي حمام وانوم شوية
ساقوني على البيت الجهزوهو لينا وشالو شنطتي وشنطة علاء وجابوهم لي انا شلت غياري واخدت لي شاور وجيت رقدت في الغرفة ونمت ماصحيت الا سمعت الباب بدق قمت فتحت الباب لقيتو علاء
قال لي دا كلو نوم جيت كم مرة دقيت الباب عايز لي غيار قلت ليه خش شيلو دخل شال غيار ومشى الحمام وجاء جاب الهدوم الكان لابسها
قلت ليه اقعد نتونس شوية عشان مانحسس الناس بي حاجة المهم دخل وقعدنا نتونس وطبعا هو دمو خفيف جدا بقى يحكي لي في قصص ونكات وانا اضحك لحد ماجات اختو دقت الباب قلت ليها اتفضلي
قالت لي في ناس جايين يسلمو عليكم قلت ليها جدا طلعنا مشينا عليهم كانت مرة ومعاها بتين لمن جيت اسلم عليهم عليهم وحدة منهم حسيت سلامها ماحلو ونظراتها لي ماياها
المهم قعدت خالتو فاطمة (ام علاء) قالت لي دي خديجة بت خالتي وديل بناتها
قلت ليها اتشرفنا وديك تعاين لي 😒😏
بعد شوية جاء علاء داخل يسلم كان اشوف ليك الماتتسمى قامت فوق تسلم عليه هو اختصرها ومد يدو سلم عليها وبقى نظرها كلو على علاء لحد ما هو طلع ماشالت عينها منو
انا طبعا اتوترت شديد بس ماحبيت اوضح
قعدت معاهم شوية وقلت ليهم عن اذنكم ومشيت غرفتي وطبعا متوترة شديد البت دي ليه عملت كدا وليه بتعاين لي كدا اصلا شنو البربطها بي علاء وقلت لازم اعرف الحاصل شنو بس الا بعدين لمن يجي حتى اسألو
بعد شوية جو نادوني للغداء مشيت لقيت في جيران برضو جايبين اكلهم والمرة قاعدة بي بناتها كنت فاكراهم مشو طلعو ماعندهم احساس
المهم قعدت وخالتو فاطمة ماشاء الله تشيل وتخت لي الاكل جنبي وشغالة لي يابتي اكلك بطيء كدا ليه ماشايفة الناس بياكلو كيف
قلت ليها باكل كويس والله وفلانة ديك مغيوظة شديد خصوصا من معاملة خالتو فاطمة لي وانا لمن حسيتها مغيوظة بقيت اتدلع زيادة