رواية ياسمين الفصل الثالث3بقلم مروة الصافي
علاء نزل يجيب الاكل وانا جهزت الصفرة في المسافة دي جا داخل جاب الاكل كتير قلت ليه دا شنو انت عازم ناس قال لي لأ طبعا بس ناكل البناكلو والباقي يدخل الثلاجة عشان ماتتعبي بكرة
المهم ختيت قدر الشي البشبعنا ولفيت باقي الاكل وختيتو في الفريزر كملنا اكلنا وشلت العدة غسلتها ورتبت المكان
حياة مملة شديد ماف جديد دخلت غرفتي واتصلت على ايمان اتونست معاها وقفلت ونمت صحيت زي وقت العشاء كدا قمت اخدت شاور وصليت طلعت الصالة لقيت علاء نايم صخبتو قلت ليه قوم صلي وفي المسافة دي بعمل شاي لبن طبعا انا خبيرة في شاي اللبن
اها عملتو وجبتو جبت لقيتو صلى وقاعد يقرأ قرآن طبعا ماشاء الله عندو صوت في التلاوة مبالغة انجذبت للصوت شديد وانا واقفة في مكاني لحد ما خلص قراية قلت ليه ماشاء الله تلاوتك جميلة قال لي شكرا
كبيت الشاي وبقى يشرب ويتبسم انا بقيت عاملة كدا 😎 فهمت انو الشاي عجبو قال لي ماشاء الله اول مرة اشرب شاي سمح كدا تسلم يدك قلت ليه الله يسلمك
اها بقينا على الحال الممل دا اسبوع كامل نفس البرنامج نفس اليوم بتكرر بي حذافيرو ماف اي جديد وهو سبحان الله صابر علي شديد بالعكس بعاملني احسن معاملة ماشفت منو حاجة كعبة ودايما بشوفو مبتسم يمكن دا لو اي زول في مكانو كاو طلقني وريح دماغو
المهم بعد تم اسبوع وانا حاسة بي زهج ماطبيعي قلت ليه ممكن نطلع اي مكان نغير جو انا زهجانة من القفلة دي
قال لي طوالي 😍 انا كل يوم بفكر اقول ليك نطلع بس خايف ترفضي قلت ليه خلاص نص ساعة كدا وبكون جاهزة
دخلت غرفتي واخترت لي فستان بي طقمو من الاشتريتهم في الشيلة وظبطت نفسي وجيت طالعة (طبعا انا كنت مابلبس طرحة) لقيتو جاهز طبعا اول ماشافني ماقدر ينزل عيونو
بس كان ساكت خايف يعلق وانا احرجو
والصراحة هو كمان متشيك واخر لبس وعطور صراحة انبهرت بيه بس قبلت سريع ماحبيت احسسو بي حاجة
قلت ليه يلا نطلع وهو متنح فيني ضربتو في كتفو يلا ضحك وقال لي ممكن طلب قلت ليه اتفضل قال لي بس ياريت لمن تكوني طالعة معاي البسي طرحة
قلت ماف داعي للنقاش قلت ليه طيب
المهم دخلت فتشت الشنطة لقيت طرحة حقت عباية سوداء وجاية مع الطقم لبستها وطلعت قلت ليها كدا كويس قال لي تمام شديد اها يلا نطلع
طلعنا ركبنا العربية قال لي اها نمشي على وين قلت ليه لو قلت ليك تقوم تضحك فيني قال لي ليه اضحك المكان العايزاه نمشي ليه
قلت ليه عايزة امشي حتة تكون قريبة للبحر شارع النيل او اي مكان جنب البحر عايزة اشم هواء طبيعي ونقي قال لي تمام
دور العربية وطول الطريق ساكتة هو بديتي نظرة بي الجنبة ويقبل
ومشينا بي شارع النيل طوااااالي لحد ماوصلنا مكان العوامات ونزلنا جنب وحدة قال لي اها دا طلبك ولا نغير قلت ليه عز الطلب طلعنا الطابق الفوق وقعدنا في طاولة مقابلة للبحر طوالي
ما تتخيلو الاحساس رهيب كيف اول مرة من بدا برنامج العرس احس نفسي مبسوطة
وهو حسيتو فرحان شديد لمن شافني مبسوطة كدا يلا جابو لينا المنيو قال لي تطلبي شنو طلب كابتشينو وهو كمان نفس الطلب
وانا سرحانة بعاين في البحر ومرة اعاين للناس القاعدين لاحظت في بنتين قاعدات براهم وحدة منهم شايفاها مركزة مع علاء شديد (طبعا هو ماشاء الله وجيه ولبيس) اول مرة احس بي احساس غريب كدا حسيت اني اتضايقت من نظراتها عاينت ليه لقيتو بعاين لي بس مركز معاي شديد
(استغربت اني اتضايقت من حركات البت دي ليه تاني قلت يمكن برستيجي هو الخلاني اتضايق كيف اكون معاه انا بجمالي دا كلو ووحدة تحاول تلفت نظرو)
قلت ليه يلا نمشي قال لي بسم الله مالك فجأة كدا والطلبات قلت ليه لو ما ماشي انا بمشي براي قال لي خلاص طيب ارح نحاسب لانو هو بكون جهزها خلاص قلت ليه طيب مشينا حاسبنا عليها وطلعنا مشينا العربية ركبنا
قال لي ممكن اعرف مزاجك قلب فجأة ليه
سكت ابيت اتكلم قال لي طيب سكت شوية وقلت ليه شايفة النظرات مع البت قال لي نظرات شنو وبت منو قلت ليه البت الفي العوامة
قال لي يعني دا الموضوع القلب مزاجك فجأة
قلت ليه لأ طبعا وليه يتقلب مزاجي (بريستيجي اهم شي)
قال لي والله ويشهد الله انا لاعاينت لي بت ولا بتذكر انو اساسا كان في بت في العوامة انا ماشلت عيوني منك (طبعا انا ابتسمت بسمة خفيفة كدا وختيت المنديل عشان مايشوف ابتسامتي وصراحة انا ابتسمت ليه ماعارفة)
قال لي اها نمشي وين قلت ليه البيت قال لي بي ضيقك دا ممكن اعزمك المرة دي انا على مزاجي قلت ليه طيب دور طوالي ومشينا مطعم اول مرة اشوفو مكان مبالغة وفيه قعدات رهييييبة اماكن فردية للاسر
قال لي يلا عشان ماتقولي بت وغيرها هنا القعدات فردية طبعا اتكيفت شديد طلبنا الاكل ولحد ماجات الطلبات نحن ساكتين ماف واحد اتكلم وانا بي مسكت تلفوني وقعدت العب ومرة ادردش مع صحباتي
جابو الاكل اكلت شوية وقمت قال لي مالك قلت ليه شبعت هو طوالي قام قلت ليه كمل اكلك قال لي انا كمان شبعت حسيتو اتضايق شوية رجعت قعدت وبقيت اكل شوية شوية (اغرب حاجة ماهان علي انو اتضايق )
ولأول مرة اسألو عن حياتو كانت كيف وهو تقريبا ماصدق وبقى يحكي عن حياتو من اول ما سافر لحد ماجاء اسه وقال لي انا ماخد اجازة ستة شهور بس شكلي ما حاكملها قلت ليه ماحتكملها ليه
قال لي انتي رايك شنو اتم الستة شهور ولا اقعد شوية وارجع قلت ليه طبعا انت البتحدد انا رأيي مامهم
قال لي بالعكس رأيك مهم شديد بالنسبة لي قلت ليه والله البريحك بس
سكت لقى ماف فايدة معاي وقال لي ممكن نرجع البيت قلت ليه طيب يلا حاسبنا وركبنا عربيتنا ورجعنا البيت