رواية ياسمين الفصل العاشر10 الاخير بقلم مروة الصافي
جهزت وطلعنا مشينا ناس امي كنت مشتاقة ليهم شديد من يوم العرس تاني ماشفتهم
اول ماوصلنا دقينا الباب فتح لينا بكري وسلمنا عليه ودخلت جري على امي كنت مشتاقة ليها شديد مسكتها وقعدت ابكي وانا ماعارفة بيكي من شوقي ليها ولا من الوجع الجواي وبعدها مشيت سلمت على ابوي
وجيت قعدت مع امي واتونست معاها وعلاء بعد دخل مشى لي ابوي حتى جا سلم على امي وقعد معانا امي ضربت لي خالتي وبناتها جو
وبكري اخوي طلع شوية وجاء داخل بي خروف وسريع سريع ضب-حو وكسرو وجابو جاهز ناس امي قامو عليه عشان يظبو اللحمة
قلت ليهم نحن اكلنا لحمة في البلد اظن تكفينا سنة قدام امي قالت لي اصلا ناس البلد ناس واجب وكرم انا من زمان لمن امشي ليهم بشيلوني في عيونهم قلت ليها فعلا يا امي مافضل ليهم الا يشيلوني من الارض.
دخلت على غرفتي كنت مشتاقة ليها شديد ولي كل ركن فيها اساسا كلها يومين وراجعة ليك اتذكرت لما في الغرفة دي كنت ببكي لاني ماعايزة علاء واسه ببكي لاني ماعايزاه يسافر عايزاه يقعد بس للاسف ماحاقدر اكلمو
وانا قاعدة كدا امي جات قالت لي علاء بسأل منك قلت ليها دقايق اغير واطلع ليه
فعلا غيرت ملابسي وطلعت ليه لقيتو واقف في الصالة قال لي عندي مشوار نص ساعة كدا وبجي تمام
قلت ليه ماشي بعيد قال لي لأ بعيد مابتأخر نص ساعة بالكتير وبجي قلت ليه كويس
طلعت لي ناس امي وقعدت اتونس معاهم وكمان لقيت جاراتنا جو يسلمو علي كانت احلى لمة مع انها كانت عفوية وما مرتب ليها بس كانت حلوة وشوية غيرت لي من نفسيتي لاني كنت تعبانة ومتضايقة شديد
قلت اتصل على ايمان عشان تجي تتعشى معانا اتصلت عملت لي التلفون مشغول قبت خلاص يمكن عندها حاجة رسلت ليها رسالة قلت ليها انا عند ناس امي وضابحين لينا تعالي اتعشي ويعدين بنرجعك في طريقنا عارفاك بتحبي الطقة
بعد شوية ردت لي بي رسالة اوك انا اصلا برا البيت بجي عليك طوالي
شوية كدا وعلاء جا داخل ومشى الصالون لي ناس ابوي
انا طبعا خبيرة شطة بس ظيطت ليهم الشطة وانا في المطبخ ايمان جات داخلة
قالت لي اها عملتي شنو اتكلمتي مع علاء ولا لسه قلت ليها بعد طلعتي بي شوية هو جاء وانا اتشجعت وقلت اصارحو بس للاسف لقيتو قطع التذكرة يوم السبت وخلاص ماف طريقة اني اتكلم معاه
قالت لي انتي هبلة ولا شنو لسه قدامك ثلاثة ايام كيف ماف زمن يمكن يغير رايو ويقعد قلت ليها كمان ماممكن اكون انانية واضيع ليه شغلو
قالت لي هو مش قال ليك اجازتي ستة شهور كيف شغلو يضيع قلت ليها هو خلاص قطع تذكرتو واكيد قطع الاجازة هناك
سكتت وناقلت حاجة تاني
المهم الكل جهز وشالو للرجال وختو لينا نحن اكلنا
بعد شوية علاء اتصل علي قال لي خلاص نطلع قلت ليه كويس كلمت ايمان عشان نوصلها في طريقنا وفعلا طلعنا ووصلنا ايمان ومشينا البيت
قلت ليه رايك شنو بكرة نمشي الجبل رحلة قال لي قدااااام اصلا انا مشواري القبيل مشيت قدمت التذكرة لي بعد بكرة قلت ليه شنو قال لي الخميس من السبت مافرقت عشان كدا قدمت الزمن
قلت ليه البريحك طبعا
ودخلت غرفتي وانا زعلانة زعل لكن ازعل ليه فعلا كلامو صاح الخميس من السبت مافرقت
دق لي الباب فتحت قال لي نسيتي تقولي تصبح على خير قلت اقول ليك انا طبعا استفذاني شديد قلتةليه وانت من اهله في حاجة تاني قال لي لأ بس اجهزي بدري عشان نقغدعد اطول فترة في الجبل
قلت ليه كويس ورجعت رقدت وبقيت اتقلب في السرير للصياح مانمت
الصباح قمت عملت الشاي وجهزت وطلعنا وطول الطريق مشغل اغاني حقت وداع وفراق ومابعرف شنو وانا بالجد قلبي وجعني شديد وكل ما اقول ليه غير الاغنية دي يشغل وحدة غيرها في النهاية سكت
وصلنا الجبل وكان عازم اصحابو كمان قلت ليه ماكلمتني انا اسه حاقعد كيف براي وسط اصحابك قال لي عادي مامشكلة وشال التلفون ومشى بعيد وكان واضح انو بوصف لي زول المكان شويتين وفي عربية وقفت ونزلو منها ايمان ومعاها صحباتي اتنين
انا بقيت عاملة 😳 ديل الجابهم شنو
جريت عليهم قلت ليهم وقت جايين هنا كان تكلموني ولا بقيتو تبيعوني اثناء مابتكلم لقيت علاء جاي علينا وقال ليهم اتأخرتو ليه
عاينت ليه بي خلعة كدا قلت ليه انت عارف انهم جايين قال لي عشان اصلا انا العزمتهم مش الليلة اخر يوم لي هنا سكت ومارديت عليه مشيت قعدت وجو كلهم قعدو معاي
واحد من اصحابو قال لينا ارح نلعب انا سرحانة وماشغالة بيهم ايمان قالت ليهم نلعب لعبة الصراحة انا خفت من كلامها عرفت ناوية لي على حاجة قلت ليهم انا برا مامعاكم
المهم كلهم بقو يحنسو فيني لحد ماوافقت وبدو اللعبة وكل واحد يسأل في اليتقيف القارورة قصادهم لحد ما لفوها ووقعت قصادي انا وايمان وكمان ايمان هي الحتسألني
انا قلت ليه برا مامعاكم جروني بالغصب وايمان تعاين لي قالت لي اها رايك شنو اسألك السؤال داك ولا لأ
قلت ليها لأ طبعا
قالت لي حاسألك
ياسمين وجهة نظرك شنو في الزواج
قلت ليها مودة ورحمة وتفاهم واحترام
قالت لي طيب والحب رايك فيه شنو (هنا شميتها شمة)
قلت ليها انسان لقى الانسان البشبهو وبشبه روحو انسان قليك يميل ليه زي ماهو بنفس طبايعو انسان تحس يي سعادتك معاهو واصعب حاجة لو غاب عنك لحظة حتحس انو اي شي واقف حتى النفس بتحس انو مكتوم وماقادر تتنفس
رفعت عيوني لقيت علاء بعاين لي وبدمع وانا من غير احس دمعت قلت ليها خلاص شوفو غيري ومشيت العربية
ايمان جات لاحقاني قالت لي اسفة بس كنت عايزة علاء يحس بي مشاعرك حتى من غير تقولي اسمو وقالت لي امشي عربيتنا في حاجة حقتك
مشيت وفتحت الباب لقيت في هدية وفيها ورقة مكتوب فيها
(ياسمين بت عمي المن يوم اتولدت وانا عشقتها وصبرت سنين لحد ماكونت نفسي وكنت معاهد نفسي اني لازم اعزها وما اخلي انسانة احسن منها
ياسمين انتي حبيبتي واحلى حاجة في حياتي انتي كل حياتي ولو مامكتوب لي اعيش معاك برضو حافضل احبك لاخر نفس في حياتي
وانا اسه بقول ليك لو انتي عايزاني وبتحبيني واهم شي يتحبيني دي بس اشري لي بي راسك بالموافقة وانا بلغي سفري واقعد معاك )
وانا بقرا في الكلام ودموعي ماراضية تقيف واتلفت لقيتو واقف بي وراي قلت ليه موافقة اكيد
اتا ماعارفة متين حبيتك بس لقيت نفسي بحبك وكل ماكنت بتجيب سيرة السفر انا كنت بتوجع شديد وبحس قلبس حيقيف قال لي سلامة قلبك ياغالية
قلت ليها انا اسفة على اي لحظة وجعتك فيها على كل يوم نمت وانت زعلان بي سببي وكل لحظة ضيق انت مريت بيها وشكرا انك صبرت علي
قال لي خلاص بطلي دراما اها بكرة حتوصليني المطار 😌ضربتو وقعدنا نضحك.....
تمت بحمد الله