رواية حسرة الفصل الثالث عشر13 بقلم رؤى عمر
لمن محمد قال في زيت في الأرض نهائي م استغربت و طوالي عرفت انه دي من عمايلهم قلت لمحمد اسندني عايزة امشي الغرفة محمد شالني لمن أتلفت لقيت وش سهير م بتفسر ابتسمت ليها و لفيت يدي حول رقبة محمد
بعد دخلنا الغرفة محمد قعد جنبي و قال لي لحدي هنا و بس زي م هم اهلي انتي مرتي وعندك حق علي و البغلط عليك بغلط علي اسي دا الموقف الكم
قلت ليهو انت برضو حسيت انو موضوع الزيت دا م طبيعي صاح؟ قال لي اي بكرة بقول لعمتي تمشي بيت عمي صالح و مي زاتها تمشي م تقعد معانا ابوها قادر يقعدها داخلية أو يعمل ليها ترحيل قلت ليهو لو الحاجة دي بتضايقك م تعمل كدا عشاني قال لي اي يا نور انا متضايق عشانك اصلا انت استحملتي كتير و بكرة انا بحل الموضوع دا م تشيلي هم قلت ليهو لو شايف كدا يبقى خير
الصباح لمن صحيت نزلت عملت الشاي و شلتو وديتو ليهم في الغرفة عمتو مريم قالت لي انحنا م ضيوف دا بيت ولدنا البخلينا نشرب الشاي برانا في الغرفة شنو ولا قعدتنا مع محمد مضايقاك قلت ليها العفو والله طيب ح اختو ليكم في الصالون ماشة اجهز علا للمدرسة
صحيت علا بس هي م اتكلمت معاي دخلت الحمام بدون حتى م تعاين لي قلت بيني و بين نفسي اكيد في زول قال ليها كلام عشان تكرهني انتظرتها لمن طلعت قلت ليها خليني اسرح ليك شعرك قالت لي عمتو سهير ح تسرح لي و طلعت خلتني واقفة استغربت بس قلت بعد تجي من المدرسة ح اتفاهم معاها
سمعت محمد بنادي فيني مشيت ليهو قال لي ناس عمتي صحوا قلت ليهو ايوة و بشربوا في الشاي م اتراجعت عن قرارك قال لي لا م اتراجعت انا لو خليتهم قاعدين كدا ممكن يقدروا يوقعوا بينا و نختلف بسببهم ح اتكلم معاهم براحة م تخافي ولو زعلت بعد فترة ح تروق و تعذرني قلت ليهو طيب انزل ح أرتب شوية هنا و بلحقك
سمعت صوت عمتو مريم عالي و سهير برضو كانت جايطة بس نهائي م طلعت من غرفتي لمن محمد جاء قلت ليهو الحصل شنو قال اتكلمت معاها و قلت ليها يا عمتو امشي بيت عمي عشان تكوني مرتاحة اكتر و قبل م اكمل كلامي بقت تجوط و قالت انا طردتها وأنها تاني ما ح تجي بيتي كلام زعل يعني بس انا م بقدر اسكت اكتر من كدا يا نور انا عارف حركاتهم من البداية و فاهم هم بعملوا كدا لشنو عشان كدا احسن قبل م المشاكل تكبر الناس تاخد حذرها هزيت ليهو راسي بس قال لي ح اوصلهم و بجي سريع غير ملابسو و كان طالع شلت العطر بتاعو و مديتو ليهو مسكني من يدي ووقفني قدامو رش فيني من العطر و ضماني عليهو قال لي المتزوجين بتعطروا كدا🙈 ضحكت و قلت ليهو خلي الاستهبال قال لي بشرب الشاي و بعدها بوصلهم قعدت افكر في الحصل دا و قلت م من حق أي زول يدخل بيني و بين محمد من حقنا نعيش حياتنا برانا و يكون عندنا خصوصية
سمعت صوت ترحيل علا نزلت سريع و ختيت ليها الفطور في الشنطة قفلت الباب و لمن أتلفت لقيت سهير واقفة وراي قلت ليها بسم الله مالك قالت لي مبسوطة كدا يا نور قلبك برد بعد م محمد طردنا قلت ليهو اول حاجة محمد م طردكم وما في حاجة تفرحني و بعدين دا قرار محمد انا م عندي دخل فيهو قالت لي و عايزاني اصدقك مش انت هبلة ولا شنو قلت ليها لو سمحتي اتكلمي معاي بأدب و ألزم حدودك سكت ليك كتير عشان كدا م تتمادي و الكف الضربتيني ليهو م ناسياهو ليك بس احتراما لمحمد انا ساكتة زحي من وشي و لزيتها كنت ماشة غرفتي لمن شفت عمتو مريم و مي بتكلموا مع محمد لمن وصلتهم كانت بتقول ليهو اسي اعمامك يقولوا عليك شنو قال ليها ح يتفهموا قراري دا و شال الشنط و طلع عمتو مريم قالت لي طلعتي أفعى و الناس م جايبة خير ولا رديت ليها مشيت و خليتها واقفة
محمد جاني راجع و قال لي م بتأخر بوصلهم و بجي قلت ليهو طيب
بعد طلعوا ضربت لأمي و وريتها بالحصل قالت لي كدا احسن البُعد محنة بعد فترة براهم بروقوا و الوضع بتصلح اتونسنا شوية و قمت جهزت الفطور و نضفت جعت و لمن محمد اتأخر فطرت ضربت ليهو رد و قال لي عمي مسكني الفطور قلت ليهو طيب م مشكلة كويت ملابس محمد و حضرت لي فيلم لمن علا جات من المدرسة فتحت ليها الباب و قلت ليها ممكن نتكلم شوية هزت لي رأسها بس مشيت قعدت و أشرت ليها بمعنى اقعدي جنبي قعدت و كانت بتعاين بعيد قلت ليها يا علا انتي زعلانة مني؟
قالت لي زعلانة من بابا قلت ليهو لشنو طيب قالت لي هو تاني ما ح يحبني زي زمان عشان انتي جيتي و ح يكون عندو اولاد غيري و بابا ح يحبهم اكتر مني استغربت كيف طفلة في عمرها بتعرف تقول كلام زي دا قلت ليها و منو قال ليك كدا قالت لي تيتا مريم و عمتو سهير ولا اتفاجأت ياها دي تصرفاتهم فهمتها انه مستحيل ابوها يعمل كدا وقلت ليها طول العمر بابا ح يفضل يحبك تاني م تفكري كدا كلامي طمنها حضنتني و قالت لي شكرا يا ماما ❤️
لمن محمد رجع سألتو من ردة فعل عمو قال لي م زعل و قال لي انتوا زاتكم عرسان و انا مريم كلمتها تقعد معاي بس كانت مصرة تقعد معاك قلت ليهو الحمدلله انو م زعل
الأيام عدت و حياتنا كانت حلوة فيها مشاكل بس لمن انا كنت بشد محمد برخي و العكس و علاقتي بأهلو بدت تتصلح و كانوا اي دعوة أو مناسبة يدعوني و بصروا علي عشان أمشي
قاعدة و ماسكة تلفوني رسلت لي بت عم محمد اسمها رانيا قالت لي بكرة عازمنكم غداء و لازم تجوا قلت ليها طيب بنجي علا نادتني و قمت عشان امشي ليها حسيت بدوخة و اتذكرت انو البريود مواعيدها جات و فاتت فرحت و قلت يارب يكون حمل مشيت لعلا شفتها كان عندها واجب اشتغلتو معاها
امي ضربت لي سلمت علي و ورتني انو جلال نازل السودان و قال عايز يتزوج قلت ليها و هو خطب من ورانا ولا شنو قالت لي لالا لسه انا عايزة اعرس ليهو بت اخوي قلت ليها قصدك تيسير ولا ليلى قالت لي ليلى كدي انتي بكرة تعالي عشان نتفاهم في الموضوع دا قلت ليها يا أمي عندي أعراض كدا و حاسة اني حامل فرحت شديد و قالت اي بس دا ياهو الحمل قلت ليها يا أمي م تتحمسي ساي برضو يمكن م اكون حامل بجيك بكرة نمشي انا و انتي عشان اعمل فحص قالت لي اي تعالى بدري و هاك سهى دي عايزاك بقت تصرخ في اضاني و بتقول لي ح ابقى خالة ضحكت و قلت ليها يا بت اصبري خلينا نتأكد سمعت محمد بنادي فيني قلت ليها محمد بنادي شكلو عايز حاجة برجع ليك بعدين و قفلت الخط مشيت غرفتي لقيت محمد بفتش في الدولاب قلت ليهو نعم يا محمد بتفتش في شنو في حاجة رايحة ليك قال لي اي كان عندي مسبحة جبتها لمن مشينا العمرة م لاقيها شفتيها؟ قلت ليهو اي دخلتها تحت تيابي دقيقة اطلعها ليك رفعت التياب و دخلت يدي بس م لقيتها طلعت التياب في السرير و أتلفت عشان افتشها كويس لقيت محمد ماسك حبوب في يدو و بعاين لي قلت ليهو دا شنو قال لي م تسأليني يا نور انا المفروض اسأل دا شنو قلت ليهو كدي وريني شلت الحبوب من يدو و انصدمت لمن شفتهم قلت ليهو ديل لقيتهم وين بس م رد لي قلت ليهو محمد لقيتهم في دولابي ولا شنو قال لي بتستعملي حبوب منع حمل يا نور؟!