رواية حسرة الفصل السابع عشر17 بقلم رؤى عمر
لمن صحيت سمعت امي و سهى بتكلموا امي كانت بتقول ليها م عارفة اوريها كيف يا بتي م بقدر اقول ليها والله قالت ليها يا أمي اي حاجة في الدنيا دي مقدرة و مكتوبة و بتحصل لخير م بعلمو غير ربنا ربنا بعوضها و ح تحمل تاني بإذن الله
لمن سمعت الكلام دا ختيت يدي في بطني طوالي و قلت ليهو ولدي يا أمي و بكيت جات امي و قعدت جنبي في السرير قالت لي ربنا يصبرك و يعوضك يا بتي قلت ليها حصل شنو فهميني قالت لي لمن جاك المغص الدكتور قال البيبي م عندو نبض و عملوا ليك عملية ختيت يديني في وشي و بكيت بحرقة امي قالت لي م تعملي كدا في نفسك محمد وعلا محتاجين ليك و بالذات علا حالتها تحنن من امس بتبكي قلت ليها وين هي اسي و محمد كيف يا أمي اتحسن مش؟
قالت لي علا جات حبوبتها مريم ساقتها و محمد كويس الحمد لله الدكتور قال السكين م عملت أي أضرار داخلية بس النزيف هو التعبو قلت في سري الحمدلله بس قلبي كان بتقطع على البيبي كل م اتذكر اني خسرتو عيوني بتملوا دموع و ببكي بس قررت اكون قوية عشان محمد زي م امي قالت هو محتاج لي💔
اصريت اني امشي اشوف محمد امي و سهى سندوني لحدي غرفتو قعدت في الكرسي جنبو مسكت يدو و قلت ليهو محمد انت كويس؟ بس كان نايم امي قالت لي خلاص اطمنتي خلينا نرجع غرفتك انتي زاتك محتاجة راحة كنت ح اقوم بس محمد مسك يدي لمن أتلفت لقيتو صاحي امي طوالي طلعت و خلتنا قال لي نور و صوتو كان متقطع قلت الحمدلله على السلامة و قلت ليهو م تتعب نفسك انا جنبك هنا يلا شد حيلك عشان نرجع انا و انت و علا بيتنا خلاص
ابتسم لي و الفرحة كانت ظاهرة في عيونو قال لي و البيبي برضو طوالي انا بكيت و م قدرت اتمالك اعصابي ملامح وشو اتغيرت قال لي في شنو يا نور مالك بتبكي فهميني وريتو بالحصل بكى وقال لي انا السبب مسحت دموعو بيدي و قلت ليهو م تقول كدا ربنا بعوضنا يا محمد
بعد ٣ يوم طلعنا من المستشفى و مشينا البيت امي و سهى كانوا معاي نضفوا البيت و عملوا لينا اكل بعدها مشوا محمد كان تعبان و اغلب الوقت نايم
يوم وانا بجهز في الغداء سمعت صوت الباب مشيت فتحت و كانت دي سهير و معاها امها عمتو مريم قالت لي ما ناوية تخلينا ندخل ولا شنو قلت ليها اتفضلوا سهير عاينت لي بطرف عينها بس و دخلوا مشيت عملت ليهم عصير و جيت
سهير قالت لي سمعنا بالحصل معاك ربنا يعوضك قلت ليها اللهم آميين وقفت قالت لي ماشة اشوف محمد قلت ليها نايم و حتى لو صاحي ماشة داخلة غرفة نومنا؟!!
امها قالت لي يا بت انتي م بتنهدي ولا بتتعبي من المشاكل لمتين ح تكوني مقابلانا كدا قلت ليها يا عمتي انتي م شايفة بتك دي عايزة تعمل شنو يعني دخلتها غرفتنا كدا عادي بالنسبة ليك لو عادي يبقى تاني انا م عندي حاجة اقولها
قالت لي خلي العقد و الكلام الفارغ دا وشوفي لو نيتك اني تخربي علاقتنا بمحمد و علا تبقي غلطانة والله ما بتصلي لمرادك دا قلت ليها والله ولا في بالي حاجة زي دي بس.. محمد جاء وقاطعني و قال ليهم كلام نور صاح م في سبب بخلي سهير تدخل غرفتي ياهو انا جيتكم و انتي يا عمتي اكتر واحدة عارفة نوايا بتك و العملو هي و مي يعني م محتاجة زول يشرح ليك عشان كدا م تحاولي تلومي نور قالت ليهو كدا يا محمد يعني قدرت تقلبك ضدنا بالسهولة دي انا تاني رجلي في بيتك دا م بختها و قامت عشان تمشي أتلفت لمحمد نظام وقفهم بس هو م عمل اي ردة فعل لحدي م طلعت قلت ليها م كان في داعي يا محمد قال لي لا في داعي تاني انا م بجاملهم كفاية الحصل لينا بسببهم و لحدي اللحظة دي م عارفيين غلطهم انا كنت ح اخسرك يا نور
قلت ليهو بس م خسرتني اسي انحنا مع بعض و تاني م في حاجة بتفرقنا بإذن الله
بالمناسبة يا محمد عايزة امشي بيتنا بتأخر قبل المغرب ان شاء الله بجي قال لي طيب معليش م ح اقدر اوصلك قلت ليهو م مشكلة
لمن مشيت البيت شفت أحمد واقف في بداية الشارع اتوترت و نفسي قام حسيت بضيق نفس و عرقت شديد حسيت بالخوف العشتو لمن خطفني دخلت البيت وقلت لأمي اديني موية سريع زي الشفت أحمد برا يا أمي ادتني موية و قالت لي اي طلع شكلو اتعالج عرفت من جارة سوسن قلت ليها يعني م كنت بتخيل بس كويس انو اتعالج ربنا يهديهو
قلت لأمي سهى وين قالت لي ليها يومين بتاكل و بتشرب براها و عيونها ديل وارمات ظاهر انها بتبكي بس قالت عندها نزلة و متعباها م حبيت اتكلم معاها كتير استغربت وقلت ليها خليني امشي اشوفها
لمن دخلت لسهى و شافتني قامت بسرعة و حضنتني و بكت قلت ليها بسم الله يا سهى في شنو بس م قالت حاجة قعدتها في السرير و قلت ليها م تبكي و حاولي فهميني في شنو قالت لي هشام يا نور قلت ليها اها مالو حاصلة ليهو حاجة؟
قالت لي حسبي الله ونعم الوكيل فيهو ربنا ينتقم منو اتخلعت طبعا لاني آخر مرة اتكلمت معاها قالت إنها بتحبو و هو عايز يتقدم قلت ليها في شنو مالو قالت لي طلع عواليق يا نور كم مرة كان بلمح لي و بقول كلام م تمام بس انا مشيتو آخر مرة قال لي اجيهو في شقتو ختيت يدي في خشمي وقلت ليهو بتقولي في شنو انتي يابت دا كلام شنو كمان قالت لي زي م بقول ليك كدا قالها لي بصريح العبارة و لمن رفضت أساء لي و قال لي كلام م بقدر اقولو ليك كسر قلبي و شخصيتي دمرني يا نور
حضنتها وقلت لي م بستاهل ولا دمعة اوعك تبكي شوفي يا سهى كويس انك عرفتي حقيقتو اكيد نصيبك موجود في الحياة دي و ربنا شايل ليك الأحسن حاولي انسي و م توقفي حياتك عليهو اتكلمت معاها كتير و انتبهت للساعة لقيت الزمن اتأخر قلت ليها انا ح امشي بعد دا رأيك شنو تمشي معاي البيت اقعدي معانا يومين تغيري جو وعلى الأقل امي م تحس بحاجة قالت لي طيب طلعت و خليتها تجهز امي قالت لي مالها اختك صحي عيانة قلت ليها اي تعبانة شوية ح اسوقها معاي يوم يومين و بترجع
لمن وصلنا البيت لقينا محمد جايط في التلفون و رافع صوتو سهى طوالي مشت غرفة علا انا بقيت بعاين لمحمد كان بقول بينا المحاكم بس و اشوف ح تقدروا ولا لا بعد خلص جدع التلفون في الكنبة وكان الغضب ظاهر عليهو م عرفت زاتي اقول شنو قلت ليهو محمد خير في شنو كنت بتتكلم مع منو قبل شوية قال لي دا خال علا قلت ليهو و في شنو طيب و مش انت قلت انهم م قاعدين يسألوا منها من امها اتوفت قال لي اي صاح بس هسي قالوا عشان انا اتزوجت عايزين تجي و تقعد معاهم حبوبتها قالت م بتخلي مرة غريبة تربي بت بتها قلت ليهو دا كلام غريب هم اصلا م جايبين ليها خبر و طول السنين دي م عارفين عنها حاجة يعني بس فجأة حكمت ليهم يعملوا كدا؟؟!
الموضوع دا م طبيعي قال لي طبيعي أو لا انا بتي م بديها ليهم خالها دا لو لقاها في الشارع م أظن يعرفها عشرة سنة زول سأل منها م في ولا يحلموا انهم يسوقوها مني ختيت يدي في كتفو وقلت ليهو م تشيل هم اتكلم معاهم براحة و أي مشكلة عندها حل هز لي راسو بس مشيت لعلا و سهى عشان اشوفهم لقيت علا نايمة و سهى قاعدة في الكرسي قلت ليهو امشي نومي في غرفة الضيوف قالت لي الحاصل شنو حكيت ليها قالت لي و مالهم من زمان الموضوع دا م طبيعي يا نور و بكرة تقولي سهى قالت لي
قلت ليها والله م عارفة احتمال كلام ساي هم لو عايزين علا تجيهم ممكن كان يطلبوا بالحسنى يعني م في داعي للمشاكل دي
بعدها سهى مشت و انا مسكت تلفوني لقيت رسالة من حساب بإسم ياقوت لمن فتحتها كان مكتوب فيها لسه م شفتي حاجة يانور والله الا اكرهك حياتك دي و صحي المرة دي محمد م مات بس المرة الجاية م بطلع منها سليم ودورك برضو جاي زي م حياتي اتدمرت بسببك حياتك ح تدمر و ح تشوفي الويل والله يانور اما طلعت حقي من عينك م برتاح حياتك دي ببقيها ليك جحيم
حاولت استوعب الرسالة والكلام المكتوب دا و دخلت شفت معلومات الحساب بس م كان منشور فيهو حاجة فجأة اتذكرت لمن كان رفعت صورتنا انا و محمد في الفيس و الحساب دا اتفاعل لي بأغضبني خفت على محمد وعلا شديد وقلت معاناها داك م كان حرامي في زول حاول يقتل محمد!!