روية حسرة الفصل الثالث3 بقلم رؤى عمر

روية حسرة الفصل الثالث3 بقلم رؤى عمر

بعد دكتور محمد طلع مشيت على الفصل اول م دخلت قلت علا و ريان وين؟ وقفوا على حيلهم قلت لريان ولي أمرك وين طوالي بكت و قالت لي أمي عيانة شديد م بتقدر تجي قلت ليها طيب تمام المرة دي عفيتك يلا سلموا على بعض و اتصالحوا و فعلا عملوا كدا بعدها قلت ليهم تاني م اشوفكم بتتشاكلوا مفهوم قالوا لي مفهوم و رجعوا مقاعدهم بديت الحصة و بعد خلصت قلت لعلا تلحقني المكتب و طلعت

لمن جاتني قالت لي انا اسفة والله تاني م اتشاكل مع بت قلت ليها طيب تمام لشنو متعبة بابا معاك يا علا دنقرت بس و قالت لي اصلا هو طول اليوم م في و انا قاعدة مع الخدامة بس في البيت قلت ليها اول حاجة م اسمها خدامة دي البت البتعتني بيك و بتساعدكم في شغل البيت م تقولي عليها خدامة قالت لي حاضر قلت ليها طيب عندك مشكلة في مادة معينة قالت لي بس الرياضيات و الانجليزي و العربي و التاريخ قلت ليها دي كل المواد لكن امشي اسي الحصة بدت و تعاليني نهاية اليوم و معاك شنطتك تمام؟ قالت لي تمام و مشت

اتصلت علي سهى و قالت لي يا نور انا عايزة اتكلم معاك في موضوع قلت ليها وين انتي قالت لي طالعة من الجامعة و ماشة على البيت قلت ليها طيب انا الساعة ٢ بجي م بتأخر و قفلت على كدا

نهاية اليوم جاتني علا و راجعت معاها رياضيات و قلت ليها تاني كل يوم تعاليني اراجع معاك مادة من المواد سقت معاي علا الحضانة و جبنا نون لمن طالعين في الباب لقيت ابوها واقف منتظرها لمن شافنا جانا سلم علي و قال لعلا اتأخرتي الليلة و الترحيل فاتك عشان كدا جيت اسوقك قالت ليهو كنت مع أستاذة نور كانت بتدرسني رياضيات قال لي دا درس خصوصي يعني قلت ليهو علا قالت عندها مشكلة في بعض المواد و انا حبيت اساعدها بس لو ح تتأخر و الترحيل يفوتها ممكن اشوف زمن تاني غير نهاية اليوم طوالي قال لي لالا م تعملي كدا انا بجي كل يوم و باخدها من هنا م عندي مشكلة و بكون مبسوط بكدا على الأقل اقضي معاها وقت أكتر قلت ليهو طيب تمام انا ح امشي بعد دا أصر علي الا يوصلني و عشان نون معاي و كانت نايمة وافقت شال مني نون و ركبت في المقعد الورا و علا أصرت تقعد معاي

اتحركنا و كنت كل م ارفع عيني القاهو بعاين لي استغربت بس م ختيت فيها حاجة قلت يمكن عشان علا معاي ورا المهم وصلني و نزل معانا و شال لي نون لباب البيت و قال لي بتك حلوة م شاء الله قلت ليهو دي بت اختي

قال لي انتي م عندك اولاد قلت ليهو انا منفصلة و شلت منو نون و دخلت البيت

 *من جانب محمد:* 

من اول م جات و قعدت قدامي جذبتني شديد و م قدرت انزل عيني منها كان فيها براءة غريبة كدا و طريقة كلامها و شرحها للمشكلة خلتني انتبه معاها شديد اول مرة احس بالإحساس دا من زوجتي الله يرحمها اتوفت بس أستاذة نور حركت حاجة جواي

 كنت في العيادة و اتصل علي سواق الترحيل و قال إنه علا عندها حصة نهاية اليوم ما ح يقدر ينتظرها قلت ليهو خير بمشي بجيبها انا طوالي اتحركت على المدرسة و كنت بدعي تكون حصتها مع أستاذة نور عشان اشوفها حتى لو من بعيد وصلت و انتظرت قدام المدرسة و شفتها طالعة و معاها علا و كمان شايلة طفلة للحظة قلبي وجعني شديد قلت معقولة تكون متزوجة و لعنت حظي نزلت و سلمت عليها كنت متوتر شديد و يمكن هي تكون لاحظت دا

سألتها من حصة علا عشان تتكلم معاي و اسمع صوتها بس و حاولت أطول معاها الكلام لمن قالت لي ممكن تغير زمن الحصص اعترضت عشان اجي كل يوم و اشوفها

و فرحتي كانت كبيرة لما عرفت انها م منفصلة و حسيت انه في أمل و ممكن في يوم انا و هي نكون مع بعض

نور:

دخلت البيت و كنت بفكر في دكتور محمد لاقتني سهى و شالت بتها دخلتها جوا و جاتني قالت لي اتأخرتي انا م قادرة أصبر أكتر من كدا قلت ليها اها طيب احكي مشينا قعدنا في المظلة و طوالي هي قالت لي في واحد قال عايزني و عايز يصل البيت و يقابل أبوي!

قلت ليها يا سهى انا اتكلمت معاك في الموضوع دا مية مرة و قلت ليك شيلي الحاجات دي من راسك و ركزي في قرايتك انتي نسيتي المريتي بيهو قبل ٤ سنة قالت لي أووف و بعدين معاك يا نور انتي كل م تقومي تذكريني و تتعمدي تألميني كدا انت أخت ولا عدو قلت ليها م عدوتك انا أختك و عايزة مصلحتك

 و كمان دا جبتيهو من وين قالت لي م دخلك غلطانة انا الجيت و حكيت ليك قلت ليها طيب اسفة انتي عارفه انا بحبك قدر شنو و عايزة مصلحتك كدي اقعدي و فهميني

قعدت و بدت تحكي لي عنو قالت لي اسمو هشام و دكتور معانا في الجامعة قلت ليها كبير؟ قالت لي لا صغير بكون عمرو ٣٠ سنة كدا و زول محترم و ولد ناس و من اول مرة قال لي عايز اقابل ابوك و انا والله منجذبة ليهو قلت ليها و عارف بقصتك و انه عندك بت؟!!

طوالي سكتت و قالت لي دا المانعني من انو اخليهو يجي البيت قلت ليها يعني م عارف؟ قالت لي اي م وريتو يا نور

 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​قالت لي اي م وريتو يا نور خايفة من أنه يخليني و نظرتو لي تتغير قلت ليها لو بحبك ح يفهمك انتي حاولي وريهو و م تطولي القصة تمام؟ و قمت خليتها بتفكر

دخلت الغرفة و مسكت تلفوني و دخلت الفيس لقيت منشور دعوة زفاف و كانت لعرس أحمد!!

قريت المنشور مرتين و تلاتة في النهاية وعيت و قلت معناها رجع السودان اكيد ح يتزوج و يعيش حياتو و قمت زهجانة شلت لي غيار و دخلت الحمام سامعة سهى بتنادي في امي و لمن طلعت لقيتهم بعاينو لي قلت ليهم مالكم سهى قالت لي أحمد ح يعرس قلت ليها اي عرفت امي قالت لي شوفي أحمد عاش حياتو و اتخطاك و انتي ليوم الليلة دا تتذكري فيهو و رافضة اي عريس يجيك قلت ليها يا أمي انا لا بتذكرو ولا زعلانة عليهو بس انا متحسرة على سنيني الضاعت في علاقة فاضية و كلها أذية من أهلو و كمان م كسبت منها حاجة و انا الكنت حمل تقيل على أحمد كنت حارماهو يكون أب امي قالت لي اسي بتتكلمي كدا انتي مشيتي ولا قابلتي دكتور قلت ليها انا م قابلت لكن أحمد مشى و قالوا ليهو انو سليم معناها العيب فيني و دخلت جوا💔

امي لحقتني و قالت لي يا نور عايزة أسألك انتي شوفتي نتايج فحص أحمد بعينك دي ولا سمعتي كلمة انو سليم دي من خشم الدكتور ؟

قلت ليها لا هو بس وراني قالت لي و انت زي العويرة صدقتي مش؟! شوفي بكرة الصباح ح نمشي عيادة و نقابل دكتور و نشوف هل فعلا انتي م بتلدي قلت ليها و الفايدة شنو لو عرفت أو لا انا تاني و لا مفكرة اتزوج قالت لي م تعاكسيني بكرة ح نمشي يعني ح نمشي!

قلت م خسرانة حاجة ح امشي و افحص

تاني يوم الصباح طلعنا انا و أمي و مشينا مستشفى خاص و أول م دخلنا شفت دكتور محمد! لمن شافني جاء علي و سلم قال لي دي الوالدة قلت ليهو اي سلم عليها كأنو بعرفها و قال لي خير العيان منو يا جماعة امي قالت ليهو جايبة نور دي اعمل ليها فحوصات ضحك و قال لي يا أستاذة نور انتي كمان بجيبوك العيادة زي الأطفال ابتسمت بس و قلت ليهو ح نمشي زمن مقابلتنا جاء سقت امي و مشينا امي قالت لي بتعرفي دكتور وجيه كدا من وين قلت ليها دا ولي أمر تلميذة معاي في الفصل قالت لي م ظاهر عليهو انو متزوج و كمان عندو بت

 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏م ظاهر عليهو انو متزوج و كمان عندو بت قلت ليها اي و اتخيلي زوجتو متوفية بدري قالت لي يا حليلو مسكين

 بعدها دخلت قابلت الدكتورة و عملت لي فحوصات و قالت لي النتيجة بتطلع بعد اسبوع بنتواصل معاك بعد تطلع عشان تجي هنا و نتناقش قلت ليها تمام و رجعنا البيت

بعد أسبوع نزلت لي رسالة بأنه النتيجة طلعت و مفروض اجي العيادة م كلمت امي قلت امشي اشوف النتيجة بعدين اوريها لمن وصلت لقيت الدكتورة م جات استلمت النتيجة و مشيت كافتيريا المستشفى عشان اشرب قهوة لقيت دكتور محمد هناك جاني و قعد معاي و بقينا نتونس قال لي نتيجتك طلعت قلت ليهو اي بس لسه م عرفت الحاصل شنو قال لي ان شاء الله كل خير يا زولة

 ظاهر عليك متوترة شديد قلت ليهو ايوة فعلا متوترة انتبهت للساعة و قلت ليهو اكيد الدكتورة جات ح امشي اشوفها و قمت خليتو قاعد و دخلت للدكتورة و اديتها النتيجة شافتها و قلت ليها اها في مشكلة و إجابتها صدمتني!!

*من المُفارقات العجيبة في هذه الحياة، أننا لا نستطيع أن نضحك على ذاتِ النّكتة مرّتين، بينما نبكي على ذات الجُرح عُمرًا كامِلًا 💔*

يتبع 

                   الفصل الرابع من هنا

لقراءة باقي الفصول من هنا

تعديل المقال